Dina Ta Hay’e den Dificultad

BO TA mira ken Dina ta bai bishita? E ta bai cerca algun mucha muher cu ta biba na e tera di Canaan. Su tata Jacob lo a keda contento cu esei? Pa yuda bo contesta e pregunta, purba corda loke Abraham y Isaak a pensa di e muhernan di Canaan.

Abraham tabata kier pa su yiu Isaak casa cu mucha muher di Canaan? No, e no tabata kier esei. Isaak y Rebeca tabata kier pa nan yiu Jacob casa cu mucha muher Cananeo? No, nan no tabata kier. Bo sa pakico?

Esei tabata pa motibo cu hende di Canaan tabata adora dios falso. Nan no tabata bon hende pa casa cu ne como esposo of esposa, y nan no tabata bon hende pa nan tin como amigo intimo. P’esei nos por keda sigur cu Jacob lo no a keda contento cu su yiu a bira amiga cu mucha muher Cananeo.

Y en berdad, Dina a hay’e den dificultad. Bo ta mira e homber Cananeo cu ta wak Dina riba e plachi? Su nomber ta Sikem. Un dia ora Dina a bini pa un bishita, Sikem a cohe Dina y a fors’e pa drumi cu ne. Esei tabata malo, pasobra hende homber y muher casa so por drumi cu otro. E cos malo cu Sikem a haci cu Dina a resulta den hopi mas problema.

Ora e rumannan di Dina a tende loke a sosode, nan a bira masha rabia. Dos di nan, Simeon y Levi, a bira asina rabia cu nan a tuma spada y a bai na e stad y a cohe nan di sorpresa. Simeon y Levi y nan rumannan a mata Sikem y tur e otro hombernan. Jacob a rabia pa motibo cu su yiunan a haci e mal cos ei.

Con bini tur e dificultadnan aki a cuminsa? Debi cu Dina a sera amistad cu hende cu no tabata obedece e leinan di Dios. Nos no kier tin amigonan asina, no ta berdad?