Un Cuminda Nobo

BO SA ta kico e hendenan ta piki for di suela? E ta parce sneu. E ta blanco y fini manera scama di pisca. Pero no ta sneu, e ta algo pa come.

Ta rond di un luna so a pasa desde cu e Israelitanan a sali for di Egipto. Nan ta den desierto. Masha poco cuminda ta crece ei, y p’esei e pueblo ta keha, bisando: ‘Mihor Jehova a mata nos den Egipto. Ei por lo menos nos tabatin cuanto cuminda cu nos tabata kier.’

P’esei Jehova a bisa: ‘Mi ta bai haci cuminda cai for di shelo.’ Y esei ta loke Jehova a haci. Su manece ora cu e Israelitanan a mira cu e tera tabata cubri cu algo blanco, nan a puntra otro: ‘Kico esei ta?’

Moises a bisa: ‘Esei ta e cuminda cu Jehova a duna boso pa come.’ E pueblo a yam’e MANA. El a smak manera buscuchi traha cu miel.

Moises a bisa e pueblo: ‘Boso tin cu piki net loke cada persona por come.’ P’esei tur mainta esei ta loke nan a haci. Anto, ora cu solo tabata bira cayente, tur mana cu a sobra riba tera tabata dirti.

Moises a bisa nan tambe: ‘Ningun hende mag warda mana te e siguiente dia.’ Pero algun hende no a scucha. Bo sa kico a sosode? Su manece e mana cu nan a warda tabata yen di bichi, y a cuminsa hole malo!

Sinembargo, tin un dia di siman cu Jehova a laga e pueblo recohe dobel e cantidad di mana. Esei tabata e di seis dia. Anto Jehova a bisa nan pa warda un tiki mana pa e siguiente dia, pasobra lo e no a laga ningun mana cai e di shete dia. Ora nan a warda mana pa e di shete dia, e no a yena cu bichi y no a hole malo! Esei ta un otro milager!

Tur e añanan cu e Israelitanan tabata den desierto, Jehova a duna nan mana pa nan come. Exodo 16:1-36;