E Colebra di Koper

E COLEBRA lora rond di e palo ei no ta parce di berdad? Pero e no ta di berdad. E ta un colebra traha di koper. Jehova a bisa Moises pa colg’e na e palo pa e pueblo por wak e y sigui biba. Pero tur e otro colebranan abou na suela ta di berdad. Nan a morde hende y a haci nan malo. Bo sa pakico?

Esei ta dor cu e Israelitanan a papia contra Dios y Moises. Nan a keha: ‘Pakico bo a trece nos for di Egipto pa nos muri aki den desierto? No tin ni awa ni cuminda. Y nos no por soporta di come mana mas.’

Pero mana tabata bon cuminda. Jehova a duna nan mana dor di un milager. Y dor di un milager el a duna nan awa tambe. Pero e pueblo no a mustra gratitud pa e manera cu Dios a cuida nan. P’esei Jehova a manda colebra venenoso pa castiga e Israelitanan. Colebra a morde nan, y hopi di nan a muri.

Finalmente e pueblo a bini cerca Moises y a bisa: ‘Nos a peca dor cu nos a papia contra Jehova y contra bo. Awor, pidi Jehova kita e colebranan ei.’

P’esei Moises a haci oracion pa e pueblo. Y Jehova a bisa Moises pa traha e colebra di koper ei. El a bisa pa colg’e riba un staca, y ken cu colebra a morde mester a wak e. Moises a haci net loke Dios a bisa. Y e hendenan cu colebra a morde a wak e colebra di koper y nan a bira bon atrobe.

Tin un les pa siña for di esei. Den un sentido nos tur ta mescos cu e Israelitanan cu colebra a morde. Nos tur ta moribundo. Tuma nota y bo por mira cu hende ta bira bieu, ta bira malo y ta muri. Esei ta dor cu e prome homber y muher, Adam y Eva, a aparta nan mes for di Jehova, y nos tur ta nan yiunan. Pero Jehova a habri caminda pa nos por biba pa semper.

Jehova a manda su Yiu, Hesucristo, na mundo. Nan a colga Hesus na un staca, pasobra hopi hende a kere cu e tabata un mal hende. Pero Jehova a manda Hesus pa salba nos. Si nos acudi na dje, si nos siguie, nos por gana bida eterno. Pero, nos lo siña mas tocante esei despues.