Dios Ta Priminti un Paradijs

ESAKI ta un plachi di un paradijs, kisas manera esun cu Dios a mustra su profeta Isaias. Isaias a biba poco tempo despues di Jonas.

Paradijs kiermen “hofi” of “parke.” Esei ta haci bo corda algo cu bo a yega di mira den e buki aki caba? E ta parce e hofi bunita cu Jehova a traha pa Adam cu Eva masha hopi, no ta berdad? Pero henter e Tera por bira un paradijs?

Jehova a bisa su profeta Isaias pa skirbi tocante e benidero paradijs nobo pa e pueblo di Dios. El a bisa: ‘Lobo y carne lo biba hunto na pas. Yiu di baca y yiu di leon lo come hunto, y mucha chikito lo cuida nan. Ni colebra venenoso lo no haci daño na un baby cu hunga banda di dje.’

Hopi hende ta bisa: ‘Esei no por sosode nunca. Semper tabatin dificultad riba Tera, y semper lo tin.’ Pero, pensa un rato: Ki clase di luga di biba Dios a duna Adam cu Eva?

Dios a pone Adam cu Eva den un paradijs. Ta debi cu nan a desobedece Dios nan a perde nan bunita luga di biba, a bira bieu y a muri. Dios a priminti cu lo e duna hende cu ta stim’e net e cosnan cu Adam cu Eva a perde.

Den e benidero paradijs nobo nada lo no causa daño ni destruccion. Lo tin pas perfecto. Tur hende lo tin bon salud y lo ta felis. Lo e ta manera Dios tabata kier na principio. Pero nos lo siña despues con Dios lo haci esei.