Un Homber sin Miedo

MIRA e hendenan tene mofa di e hoben ei. Bo sa ken e ta? Esei ta Jeremias. E ta un profeta masha importante di Dios.

Un poco despues cu Rei Josias a cuminsa destrui e imagennan den e pais, Jehova a bisa Jeremias pa bira Su profeta. Sinembargo, Jeremias a kere cu e tabata mucho jong pa ta profeta. Pero Jehova a bisa cu lo e yud’e.

Jeremias a bisa e Israelitanan bandona nan maldad. El a bisa: ‘E diosnan cu hende di e nacionnan ta adora ta falso.’ Pero hopi Israelita a prefera di adora imagen en bes di e Dios berdadero Jehova. Ora Jeremias a bisa e pueblo cu Dios lo castiga nan pa nan maldad, nan a hari so.

Añanan a pasa. Josias a muri, y tres luna despues su yiu homber Joakim a bira Rei. Jeremias a sigui bisa e pueblo: ‘Jerusalem lo ser destrui si boso no cambia di boso mal caminda.’ E sacerdotenan a gara Jeremias y a grita: ‘Mester mata bo pa e cosnan cu bo ta papia.’ Anto nan a bisa e prinsnan di Israel: ‘Jeremias mester muri, pasobra e ta papia contra nos stad.’

Kico Jeremias a haci awor? E no a tene miedo! El a bisa nan tur: ‘Jehova a manda mi bisa boso e cosnan ei. Si boso no cambia boso mal manera di biba, Jehova lo destrui Jerusalem. Pero keda sigur di esaki: Si boso mata mi, boso ta mata un hende cu no a haci nada malo.’

E prinsnan a laga Jeremias na bida, pero e Israelitanan no a cambia di nan mal caminda. Despues Rei Nabucodonosor di Babilonia a bini y a bringa contra Jerusalem. Finalmente Nabucodonosor a haci e Israelitanan bira su esclabo. El a hiba miles di nan Babilonia. Imagina bo con lo bo sinti si hende straño saca bo for di bo cas y hiba bo un tera straño!