Libra For di Prizon

MIRA e angel ei ta tene e porta di prizon habri. E ta libra e apostelnan di Hesus. Laga nos mira pakico nan tabata den prizon.

Ta djis un poco tempo so a pasa desde cu spirito santo a ser drama riba e discipelnan di Hesus. Y esaki ta loke a sosode: Pedro y Juan a drenta e tempel na Jerusalem un atardi. Cerca di e porta tabatin un homber cu a nace coho. Hende tabata carg’e trece einan tur dia pa e por pidi placa cerca e hendenan cu tabata drenta e tempel. Ora el a mira Pedro y Juan, el a pidi nan dun’e algo. Kico e dos apostelnan a haci?

Nan a para y a wak e pober homber. Pedro a bisa: ‘Mi no tin placa, pero mi ta duna bo loke mi tin. Den nomber di Hesus, lanta y cana!’ Anto Pedro a tene man drechi di e homber, y el a bula lanta mesora y a cuminsa cana. Ora e hendenan a mira esei nan a keda asombra y masha contento cu e milager maraviyoso.

Pedro a bisa: ‘Ta cu e poder di Dios, kende a lanta Hesus for di morto, nos a haci e milager ei.’ Mientras Pedro y Juan tabata papia, algun lider religioso a pasa. Nan a rabia pasobra Pedro y Juan a bisa e pueblo cu Dios a lanta Hesus for di morto. P’esei nan a gara Pedro y Juan y a sera nan den prizon.

Su siguiente dia e lidernan religioso a tene un reunion grandi. Nan a trece Pedro y Juan hunto cu e homber cu nan a cura nan dilanti. E lidernan religioso a puntra nan: ‘Cu ki poder boso a haci e milager aki?’

Pedro a bisa nan cu ta cu e poder di Dios, kende a lanta Hesus for di morto. E sacerdotenan no sa kico pa haci, pasobra nan no por nenga cu un milager maraviyoso realmente a sosode. P’esei nan a spierta e apostelnan pa no papia mas tocante Hesus, y despues a laga nan bai.

Segun cu dianan a pasa e apostelnan a sigui predica tocante Hesus y a cura hende enfermo. Noticia di e milagernan ei a plama. Y p’esei asta for di e pueblonan rond di Jerusalem multitud di hende tabata trece hende enfermo pa e apostelnan cura nan. Esei a haci e lidernan religioso jaloers, y p’esei nan a cohe e apostelnan y a sera nan den prizon. Pero nan no a keda ei hopi tempo.

Durante anochi un angel di Dios a habri porta di e prizon, manera bo ta mira ei. E angel a bisa: ‘Bai y para den e tempel, y sigui papia cu e pueblo.’ Su manece ora e lidernan religioso a manda homber na e prizon pa trece e apostelnan, nan no tabat’ei. Despues, nan a haya nan siñando hende den tempel y nan a hiba nan na e sala di Sanedrin.

E lidernan religioso a bisa nan: ‘Nos a prohibi boso strictamente pa no siña mas tocante Hesus. Pero boso a yena Jerusalem cu boso siñansa.’ Anto e apostelnan a contesta: ‘Nos mester obedece Dios como gobernante mas bien cu hende.’ P’esei nan a sigui siña e “bon nobo.” Esei no ta un bon ehempel pa nos sigui?