CAPITULO DIESCUATER
Con Yehova Ta Dirigi Su Organisacion?
1. Kico Bijbel ta revela tocante Yehova su organisacion, y dicon ta importante pa nos sa esei?
DIOS tin un organisacion? E Scritura inspira ta bisa nos cu si. Den su Palabra, Dios ta duna nos djis un idea con e parti celestial impresionante di e organisacion ei ta. (Ezekiel 1:1, 4-14; Daniel 7:9, 10, 13, 14) Aunke nos no por mira e parti invisibel aki, toch e tin su impacto riba adoradonan berdadero djawe. (2 Reinan 6:15-17) Yehova su organisacion ta consisti tambe di un parti visibel riba tera. Bijbel ta yuda nos comprende kico e ta y con Yehova ta dirigie.
Identidad di e Parti Visibel
2. Cua congregacion nobo Dios a forma?
2 Pa 1.545 aña e nacion di Israel tawata e congregacion di Dios. (Echonan 7:38) Pero Israel no a cumpli cu e leinan di Dios y asta a rechasa su Yiu. Pesei Yehova a rechasa e congregacion ei y a bandon’e. Hesus a bisa e Hudiunan: “Mira, boso cas ta keda desola pa boso!” (Mateo 23:38) Anto Dios a forma un congregacion nobo, cu cua El a cera un pacto nobo. E congregacion aki lo a bai consisti di 144.000 persona cu Dios lo a scohe pa uni cu su Yiu den shelo.—Revelacion 14:1-4.
3. Kico a tuma luga na Pentecoste di aña 33 Era Comun como evidencia bon cla cu awor Dios tawata uza un congregacion nobo?
3 Yehova a ungi e prome personanan di e congregacion nobo ei cu su spirito santo na Pentecoste di aña 33 Era Comun. Nos ta lesa relaciona cu e suceso remarcabel ei: “Y ora cu e dia di Pentecoste a yega, nan tur tawata hunto na un luga. Y diripiente a bin un zonido for di shelo, manera un biento violento y fuerte, y esaki a yena henter e cas caminda nan tawata sinta. Y nan a mira loke tawata parce lenganan di candela, cuanan a separa for di otro, y a bai para riba cada un di nan. Y nan tur a wordo yena cu spirito santo.” (Echonan 2:1-4) Asina Dios su spirito santo a duna evidencia bon cla cu awor esaki tawata e grupo di hende cu Dios lo a uza pa cumpli cu su proposito bou di guia di Hesucristo den shelo.
4. Ken awe ta forma Yehova su organisacion visibel?
4 Awe, ta un resto so di e 144.000 tin riba tera. Pero na harmonia cu profecia biblico, “un multitud grandi” di ‘otro carne’, miyones di nan, ta asocia cu e resto ungi. Hesus, e Bon Wardado, a uni e otro carnenan aki cu e resto di manera cu hunto nan ta forma un solo tou bou di dje como nan solo Wardado. (Revelacion 7:9; Huan 10:11, 16) Nan tur hunto ta forma un solo congregacion uni, Yehova su organisacion visibel.
Un Organisacion cu un Structura Teocratico
5. Ken ta dirigi e organisacion di Dios, y den ki manera?
5 E expresion biblico “e iglesia [congregacion, NW] di e Dios bibo” ta revela ta ken ta dirigie. E organisacion ta teocratico, es decir, e ta ser dirigi door di Dios. Yehova ta guia su pueblo via Hesus, cu El a nombra como Cabes invisibel di e congregacion, y tambe via Bijbel, cu ta Su propio Palabra inspira.—1 Timoteo 3:14, 15; Efesionan 1:22, 23; 2 Timoteo 3:16, 17.
6. (a) Con guia celestial di e congregacion tawata bisto den prome siglo? (b) Kico ta mustra cu ainda Hesus ta Cabes di e congregacion?
6 E guia celestial ei tawata masha bisto na Pentecoste. (Echonan 2:14-18, 32, 33) Tambe e tawata bisto ora e angel di Yehova a dirigi cosnan pa e bon nobo plama bai te Africa, ora Hesus su bos a duna instruccion na e ocasion cu Saulo di Tarso a comberti, y ora Pedro a cuminsa predica na e hendenan di e nacionnan. (Echonan 8:26, 27; 9:3-7; 10:9-16, 19-22) Pero cu tempo, e Cristiannan no tawata tende bos mas for di shelo, ni mira angel, ni ricibi donnan milagroso di spirito. Sinembargo, Hesus a priminti: “Mira, mi ta cu boso semper, te na fin di mundo.” (Mateo 28:20; 1 Corintionan 13:8) Awe, Testigonan di Yehova ta confirma cu ta Hesus ta guia nan. Sin esei, lo no tawata posibel pa proclama e mensahe di Reino apesar di e oposicion intenso cu nan ta enfrenta.
7. (a) Ta ken ta forma “e esclabo fiel y prudente”, y dicon? (b) Ki asignacion e “esclabo” aki a haya?
7 Djis prome cu su morto, Hesus a conta su disipelnan tocante “e esclabo fiel y prudente” cu e como Doño of Shon lo a confia cu responsabilidad special. E “esclabo” ei lo tawata presente ora e Señor a bai shelo y ainda lo e ta trahando duro ora Cristo regresa na un manera invisibel den poder di Reino. Un descripcion asina no por ta referi na un solo persona, pero si e ta cuadra cu Cristo su congregacion ungi. Como cu Hesus a cumpr’e cu su sanger, e ta referi na dje como su “esclabo.” El a encarga su miembronan pa haci disipel y pa alimenta e disipelnan progresivamente, dunando nan “nan cuminda [spiritual] na su debido tempo.”—Mateo 24:45-47; 28:19; Isaias 43:10; Lucas 12:42; 1 Pedro 4:10.
8. (a) Ki responsabilidad e grupo di esclabo tin awor? (b) Dicon ta importante pa nos haci caso di e instruccion percura via e canal di Dios?
8 Siendo cu e grupo di esclabo tawata haciendo e trabou di e Shon fielmente ora el a regresa na un manera invisibel na aña 1914, tin evidencia cu nan a ricibi mas responsabilidad na 1919. E añanan cu a pasa desde e tempo ei tawata un periodo pa duna un testimonio mundial di e Reino, y actualmente nan ta reuniendo un multitud grandi di adorado di Yehova cu e proposito di conserva nan na bida atrabes di e gran tribulacion. (Mateo 24:14, 21, 22; Revelacion 7:9, 10) E multitud grandi aki tambe tin mester di alimento spiritual, y e grupo di esclabo ta sirbi nan esei. Pues anto, pa nos agrada Yehova nos tin cu acepta e instruccion cu e ta percura via e canal aki y actua na harmonia cu e instruccion.
9, 10. (a) Ki areglo tawatin den prome siglo pa soluciona pregunta tocante doctrina of pa guia e predicacion di e bon nobo? (b) Ki areglo tin awe pa cordina e actividadnan di Yehova su pueblo?
9 Tin biaha ta surgi pregunta tocante doctrina y e manera di haci cosnan. Kico mester haci e ora ei? Echonan capitulo 15 ta conta nos con a soluciona un cuestion cu a surgi tocante hende di e nacionnan cu a comberti. Nan a presenta e asunto na e apostel- y ancianonan na Herusalem, cu a sirbi como un cuerpo gobernante central. E hombernan ei no tawata infalibel, es decir hendenan cu no por a faya, pero ta nan Dios tawata uza. Nan a considera loke e Scritura a bisa relaciona cu e cuestion y tambe e evidencia cu tawatin di e manera cu Dios su spirito a obra pa habri e teritorio di e nacionnan. Caba, nan a tuma un decision. Dios a bendiciona e areglo ei. (Echonan 15:1-29; 16:4, 5) E cuerpo central ei tawata manda personanan otro luga pa yuda e predicacion di Reino bai dilanti.
10 Den nos tempo e Cuerpo Gobernante di Yehova su organisacion visibel ta consisti di ruman hombernan ungi cu spirito for di varios pais, y ta ubica na e sede mundial di Testigonan di Yehova. Bou di e liderato di Hesucristo, e Cuerpo Gobernante ta yuda adoracion puro bai dilanti den tur pais, y ta cordina e actividad di predica di Testigonan di Yehova den nan decenas di miles di congregacion. Esnan cu ta forma parti di e Cuerpo Gobernante tin e mesun punto di bista cu apostel Pablo, kende a skirbi compañeronan Cristian: “No cu nos tin dominio riba boso fe, ma nos ta trahado hunto cu boso pa boso goso; pasobra den boso fe boso ta para firme.”—2 Corintionan 1:24.
11. (a) Con anciano y sirbido ministerial ta ser nombra? (b) Dicon nos tin cu copera estrechamente cu esnan nombra?
11 Testigonan di Yehova rond mundo ta laga e Cuerpo Gobernante scohe ruman hombernan cualifica cu, na nan turno, ta ser autorisa pa nombra anciano y sirbidonan ministerial pa atende e congregacionnan. Bijbel ta bisa cua ta e rekisitonan cu esnan nombra mester cumpli cu ne y ta tene cuenta cu e hombernan ei no ta perfecto y ta faya. E ancianonan cu ta recomenda ken por bira anciano y sirbido ministerial y esnan cu ta haci e nombramento ta carga un responsabilidad serio dilanti Dios. (1 Timoteo 3:1-10, 12, 13; Tito 1:5-9) Pesei, nan ta haci oracion pa pidi Dios su spirito yuda nan y nan ta busca guia den su Palabra inspira. (Echonan 6:2-4, 6; 14:23) Laga nos demostra nos aprecio pa e “donnan na hende” aki, cu ta yuda nos tur alcansa “e unidad di fe.”—Efesionan 4:8, 11-16.
12. Con Yehova ta uza hende mohe den e areglo teocratico?
12 E Scritura ta manda pa hende homber supervisa cosnan den e congregacion. Esaki no ta rebaha hende mohe, pasobra algun di nan ta heredero di e Reino celestial, y nan ta haci gran parti di e trabou di predica. (Salmo 68:11, SAB) Tambe door di atende nan responsabilidadnan di famia fielmente, hende mohe ta contribui na e bon reputacion di e congregacion. (Tito 2:3-5) Pero ta hende homber cu a ser nombra tin e encargo di duna siñansa den e congregacion.—1 Timoteo 2:12, 13.
13. (a) Bijbel ta urgi ancianonan pa nan tin ki punto di bista di nan posicion? (b) Den ki privilegio nos tur por participa?
13 Pa mundo, un persona cu tin un puesto prominente ta un hende importante, pero den Dios su organisacion e regla ta: “Esun cu comport’e como un menor den boso tur ta esun cu ta grandi.” (Lucas 9:46-48, NW; 22:24-26) E Scritura ta conseha ancianonan pa tene cuidou pa nan no domina esnan cu ta Dios su herencia sino mas bien, bira ehempel pa e tou. (1 Pedro 5:2, 3) No ta solamente un par di hende scohi, sino tur Testigo di Yehova, homber y mohe, tin e privilegio di representa e Soberano di universo door di papia humildemente den su nomber y conta hende na tur parti tocante di su Reino.
14. Uzando e textonan biblico menciona, trata e preguntanan na fin di e paragraf.
14 Nos ta haci bon di puntra nos mes: ‘Di berdad mi ta comprende y aprecia e manera cu Yehova ta dirigi su organisacion visibel? Mi actitud, mi abla y mi accionnan ta refleha esei?’ Cada un di nos por examina su mes door di rasona riba e siguiente puntonan.
Si di berdad mi a somete mi na Cristo como Cabes di e congregacion, kico lo mi mester ta haciendo, manera e siguiente textonan ta indica? (Mateo 24:14; 28:19, 20; Huan 13:34, 35)
Ora mi ta acepta cu aprecio e percuracionnan spiritual cu ta bini di e grupo di esclabo y su Cuerpo Gobernante, na ken mi ta mustra respet? (Lucas 10:16)
Con tur hende den congregacion, specialmente e ancianonan, mester trata otro? (Romanonan 12:10)
15. (a) Kico nos ta demostra cu e actitud cu nos tin pa Yehova su organisacion visibel? (b) Ki oportunidadnan nos tin pa duna prueba cu Diabel ta un mentiroso y haci Yehova su curason contento?
15 Yehova ta guia nos awe via su organisacion visibel bou di mando di Cristo. Nos actitud pa cu e areglo aki ta demostra kico nos ta pensa di e cuestion di si Dios tin derecho di ta e gobernante supremo. (Hebreonan 13:17) Satanas ta pretende cu nos ta interesa solamente den nos mes. Nos ta duna prueba cu Diabel ta un mentiroso ora nos ta sirbi den cualkier manera cu ta necesario y ta evita cosnan cu ta hala indebido atencion na nos mes. Si nos ta stima y respeta esnan cu ta hiba delantera den nos, pero ta nenga di ‘labia hende pa nos saca probecho’, nos ta haci Yehova contento. (Hudas 16; Hebreonan 13:7) Door di keda fiel na Yehova su organisacion, nos ta mustra cu Yehova ta nos Dios y cu nos ta uni den su adoracion.—1 Corintionan 15:58.
Como Repaso
• Ken ta forma Yehova su organisacion visibel awe? Kico ta su proposito?
• Ken ta nombra como Cabes di e congregacion, y via ki areglo visibel e ta percura guia amoroso pa nos?
• Ki actitudnan saludabel nos tin cu cultiva pa e personanan den Yehova su organisacion?
[Plachi na pagina 133]
Yehova ta guia nos via su organisacion visibel bou di mando di Cristo