Bo Ta Corda Bisa Danki?

BO A come awe?— Bo sa ta ken a prepara e cuminda?— Por ta bo mama of un otro hende. Pero, pakico bo mester bisa Dios danki pa e cuminda?— Door cu ta Dios ta pone mata crece pa nos haya cuminda. Pero nos mester gradici esun cu a prepara e cuminda y esun cu a saca cuminda pa nos tambe.

Tin biaha nos ta lubida di bisa danki ora hende haci cos bon pa nos, no? Tempo cu e Gran Maestro tawata na tera, un par di hende leproso a lubida di bisa danki.

Bo sa kico ta un leproso?— Leproso ta hende cu tin un malesa cu yama lepra. E malesa ei por pone asta hende su carni cai for di nan weso. Tempo Hesus tawata na tera, hende leproso tawatin cu biba apart for di otro hende. Anto ora un leproso a mira un otro hende ta bin, e mester a grit’e pa e keda leu. Nan tawatin cu haci asina pa otro hende no yega mucho serca anto pega cu nan malesa.

Hesus tawata trata hende leproso cu hopi bondad. Un dia cu Hesus tawata bai Herusalem, e mester a pasa door di un pueblo chikito. Ora el a yega serca di e pueblo, dies leproso a bin serca dje. Nan a tende cu Hesus tawatin poder di Dios pa cura tur tipo di malesa.

E leprosonan no a yega serca di Hesus. Nan a keda para un tiki leu. Pero nan tawata confia cu Hesus por a cura nan lepra. Pesei, ora e leprosonan a mira e Gran Maestro, nan a grit’e: ‘Hesus, Maestro, yuda nos!’

Bo ta sinti duele di hende malo?— Wel, Hesus tawatin duele di nan. E tawata sa con malo hende cu lepra ta pasa. Pesei el a contesta nan: “Bai y mustra boso mes na e sacerdotenan.”—Lucas 17:11-14.

Dicon Hesus a bisa nan haci e cos ei? Ta door di e lei cu Yehova a duna Su pueblo tocante hende cu lepra. E lei a bisa cu un sacerdote di Dios mester a wak curpa di e leproso. Ta e sacerdote mester a bisa e leproso ki ora su malesa a cura completo. Ora el a bira bon e por a bai biba hunto cu hende salu atrobe.—Levitico 13:16, 17.

Pero e leprosonan aki tawatin e malesa ainda. Nan a bai serca e sacerdote toch, manera Hesus a bisa nan?— Si, nan a hacie mesora. Ta parce cu e hombernan aki a confia cu Hesus lo cura nan malesa. Kico a sosode?

Wel, ora nan tawata cana bai serca e sacerdote, nan malesa a kita. Nan cuero a cura. Nan a bira bon! Door cu nan a confia cu Hesus tawatin poder pa cura nan, nan a haya un recompensa. Esta contento nan a bira, no! Pero, kico nan mester a haci e ora ei pa mustra cu nan ta gradicido? Kico abo lo a haci?—

Un di e hombernan cu a cura a bai bek serca Hesus. El a cuminsa duna gloria na Yehova door di bisa cos bon tocante Dios. Y el a haci bon di duna gloria na Dios, pasobra ta Dios a duna Hesus poder pa cur’e. E homber a cai na rudia tambe dilanti e Gran Maestro y gradicie. E tawata masha gradicido pa loke Hesus a haci.

Pero kico a para di e otro nuebe hombernan? Hesus a puntra: ‘No ta dies leproso a cura? Unda e nuebe otronan a keda? Ta un so a bin bek pa duna gloria na Dios?’

Si, ta asina mes. Di e dies hombernan, ta uno so a duna Dios gloria, of alabansa, y a bin bek pa bisa Hesus danki. Anto e homber ei tawata Samaritano, un hende di un otro tera. E otro nuebe hombernan no a gradici ni Dios, ni Hesus.—Lucas 17:15-19.

Manera cua di e hombernan ei abo ta? Nos kier ta manera e Samaritano. Of no?— Pesei, ora un hende haci un cos bon pa nos, kico nos mester corda haci?— Nos mester lag’e sa cu nos ta gradicido. Hopi bes hende ta lubida di bisa danki. Pero ta bon pa nos bisa danki. Yehova Dios y su Yiu Hesus ta keda contento ora nos hacie.

Si bo para pensa, lo bo corda yen di cos cu hende a yega di haci pa bo. Por ehempel, bo a yega di bira malo?— Kisas nunca bo no a yega di bira mes malo cu e dies leprosonan. Pero kisas bo a yega di haya un ferkout pisa, of haya dolor di stoma. Un hende a cuida bo?— Por ta nan a duna bo remedi y haci mas cos pa bo. Bo a keda contento cu nan a yuda bo bira bon?—

E Samaritano a haci Hesus contento door di bis’e danki cu el a cur’e. Bo ta kere cu bo mama of bo tata lo keda contento si bo bisa nan danki ora nan haci cos pa bo?— Si, nan lo bira contento.

Tin hende ta haci cos pa bo tur dia, of tur siman. Kisas ta nan trabou nan ta haci, y kisas nan ta parce asta contento di haci e cosnan ei. Pero lo bo por lubida di bisa nan danki. Kisas bo maestro na scol ta traha duro pa yuda bo siña. Ta su trabou e ta haci. Pero lo e keda contento si bo bis’e danki cu e ta yuda bo siña.

Tin bes loke hende ta haci pa bo ta djis cos chikito. Hende sa tene porta habri pa bo? Hende sa sirbi bo cuminda ora di come? Ta bon pa nos bisa danki asta pa e cos chikitonan ei.

Si nos corda bisa hende na tera danki, tin mas chens cu nos lo corda bisa nos Tata den shelo tambe danki. Y tin masha hopi cos cu nos mester gradici Yehova p’e! El a duna nos bida y tur cos bon cu ta haci bida dushi. Pesei, nos tin tur motibo pa duna Dios gloria door di papia cos bon tocante dje tur dia.