Kico Hesus Tabata Kiermen cu “Sigui Mi”?

1, 2. Cua ta e mihor invitacion cu un hende por haya, y ki pregunta nos lo por haci nos mes?

CUA ta e mihor invitacion cu bo a yega di haya? Podise tabata e biaha cu bo a haya un invitacion pa asisti na un ocasion special, kisas e casamento di dos hende cu bo tin hopi cariño p’e. Of lo bo por pensa riba e dia cu bo a haya e invitacion pa acepta un trabou importante. Si bo a yega di haya e tipo di invitacionnan ei, sin duda bo a sinti bo masha emociona, asta honra, di a haya nan. Pero echo ta cu bo a haya un invitacion hopi mas mihor. Cada un di nos a haya e invitacion ei. Anto e manera cu nos ta reacciona riba dje lo tin un efecto profundo riba nos. Ta e decision di mas importante cu nos lo tuma den bida.

² Cua invitacion esei ta? E ta bin di Hesucristo, e Yiu unigenito di Dios Todopoderoso, Jehova, y e ta para skirbi den Bijbel. Na Marco 10:21 nos ta lesa e palabranan aki di Hesus: “Bin, sigui mi.” En realidad, ta un invitacion cu Hesus ta extende na cada un di nos. Ta bon pa nos puntra nos mes: ‘Con lo mi reacciona riba e invitacion ei?’ Podise bo ta pensa cu e contesta mester ta bisto. Ta ken lo nenga un invitacion maraviyoso asina? Pa straño cu por parce, mayoria di hende ta neng’e. Dicon?

3, 4. (a) Kico hende lo por a haya envidiabel di e homber cu a acerca Hesus pa puntr’e tocante bida eterno? (b) Ki bon cualidadnan Hesus lo a mira den e hoben gobernante rico?

³ Ban wak e ehempel di un homber cu a haya e invitacion ei directamente for di Hesus un 2.000 aña pasa. E tabata un homber masha respeta. E tabatin por lo menos tres cos cu hende sa considera deseabel, asta envidiabel: hubentud, rikesa y poder. Segun e relato biblico, e tabata un “hoben”, tambe e tabata “masha rico mes” y e tabata un “gobernante.” (Mateo 19:20; Lucas 18:18, 23) Sinembargo, e yoncuman aki tabatin un cualidad mas importante ainda. El a tende di e Gran Maestro, Hesus, y el a gusta loke el a tende.

⁴ Mayoria di gobernante den e tempo ei no a duna Hesus e respet cu el a merece. (Juan 7:48; 12:42) Pero e gobernante aki si a actua diferente. Bijbel ta conta nos: “Ora cu [Hesus] tabata sali bai pa sigui su caminda, un homber a core bin cerca dje y a cai na rudia su dilanti y a puntr’e: ‘Bon Maestro, kico mi mester haci pa hereda bida eterno?’” (Marco 10:17) Bo a nota con ansioso e homber aki tabata pa papia cu Hesus? El a core bin cerca Hesus den publico, mescos cu cualkier hende pober y di condicion humilde kisas lo a haci. Es mas, el a hinca rudia respetuosamente dilanti di Cristo. Pues e tabatin un grado di humildad y tabata conciente di su necesidad spiritual. Hesus a aprecia e tipo di bon cualidadnan ei. (Mateo 5:3, NW; 18:4) Ta di compronde anto cu ‘ora Hesus a wak e, el a stim’e.’ (Marco 10:21) Con Hesus a contesta e pregunta di e homber hoben aki?

Un Invitacion Unico

5. Kico Hesus a contesta e homber hoben y rico, y con nos por sa cu e “un cos” cu e tabata falta no a nifica cu e mester tabata pober? (Wak tambe e nota na pia di pagina.)

⁵ Hesus a mustra e homber cu su Tata a duna informacion caba riba e pregunta importante ei tocante con pa haya bida eterno. Hesus a referi na e Scritura, y e homber a confirma cu e tabata obedece e Lei di Moises fielmente. Pero Hesus, cu su comprondemento penetrante extraordinario, a ripara algo mas profundo. (Juan 2:25) El a ripara cu e gobernante aki tabatin un problema spiritual, anto un problema serio. P’esei Hesus a bis’e: “Un cos bo falta.” Kico e “un cos” ei tabata? Hesus di cu ne: “Bai y bende tur loke bo tin, y duna na hende pober.” (Marco 10:21) Acaso Hesus tabata kiermen cu un persona mester ta completamente bashi pa e por sirbi Dios? No.a Cristo kier a revela algo di gran importancia.

6. Ki invitacion Hesus a extende na e hoben gobernante rico, y kico su reaccion a revela tocante su curason?

⁶ Pa saca na cla kico e homber tabata falta, Hesus a ofrec’e un oportunidad maraviyoso: “Bin, sigui mi.” Djis imagina: E Yiu di e Dios Haltisimo a invita e homber ei personalmente pa siguie! Tambe Hesus a primintie un recompensa inimaginabel. Hesus a bis’e: “Lo bo tin tesoro den shelo.” E hoben gobernante rico a probecha di e oportunidad aki, e invitacion magnifico aki? E relato ta bisa: “E palabranan aki a hacie bira masha aflihi, y el a bai tur tristo, pasobra e tabata doño di hopi propiedad.” (Marco 10:21, 22) Pues Hesus su palabranan inespera a revela un problema den e homber aki su curason. Su curason tabata mucho pega na su propiedad y, sin duda, pega na e poder y prestigio cu rikesa ta trece cu ne. Lamentablemente, su amor pa e cosnan ei a surpasa e amor cu e tabatin pa Cristo. Pues anto, e “un cos” cu e tabata falta ta amor di henter su curason pa Hesus y Jehova, un amor di sacrificio propio. Como cu e homber hoben tabata falta e amor ei, el a rechasa e mihor invitacion di su bida! Pero, kico esaki tin di aber cu abo?

7. Dicon nos por tin sigur cu Hesus su invitacion ta inclui nos awe?

⁷ Hesus su invitacion no tabata limita na e homber ei; tampoco e tabata pa solamente un par di hende. Hesus a bisa: “Si un hende kier bin mi tras, lag’e . . . sigui mi.” (Lucas 9:23) Tuma nota cu “un hende” por ta un siguido di Cristo si di berdad e “kier.” Dios ta hala e tipo di personanan ei di curason honrado na su Yiu. (Juan 6:44) No ta hende rico so, ni hende pober so, ni esnan di cierto rasa of nacion so ni tampoco esnan cu a biba den e tempo ei so, sino tur hende ta haya e oportunidad pa acepta Hesus su invitacion. Pues e palabranan di Hesus, “Bin, sigui mi”, en berdad ta aplica na abo tambe. Pakico lo bo kier sigui Cristo? Y kico precies esei ta ensera?

Pakico Sigui Cristo?

8. Ki necesidad tur hende tin, y dicon?

⁸ Tin un berdad cu nos mester reconoce: Como hende, nos tin e necesidad basico di haya bon liderato. No ta tur hende ta admiti cu nan tin e necesidad aki, pero e t’ei si. Jehova a inspira su profeta Jeremias pa skirbi e berdad eterno aki: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.” (Jeremias 10:23) Hende no tin ni e capasidad ni e derecho di goberna nan mes. En realidad, gran parti di historia humano ta un registro di mal liderato. (Eclesiastes 8:9) Den tempo di Hesus, e lidernan a oprimi e pueblo, abusa di nan y engaña nan. Hesus a duna un bon descripcion di hende comun ora el a bisa cu nan tabata “manera carne sin wardado.” (Marco 6:34) Awe humanidad ta den mesun situacion. Como grupo y como personanan individual, nos tin mester di liderato cu nos por confia y respeta. Hesus ta satisface e necesidad ei? Ban considera varios motibo pakico e contesta ta si.

9. Kico ta distingui Hesus for di tur otro lider?

⁹ Na prome luga, ta Jehova Dios a scohe Hesus. Mayoria lider humano ta ser scohi pa otro hende imperfecto, kendenan hopi biaha ta ser engaña y ta inclina pa husga cosnan robes. Hesus ta un otro tipo di lider. E titulo cu e tin mes ta indica esei. E palabra “Cristo”, mescos cu e palabra “Mesias”, ta nifica “Ungi.” Y esun cu a ungi Hesus—es decir, dun’e un nombramento special na un posicion sagrado—ta netamente e Señor Soberano di universo. Jehova Dios a bisa di su Yiu: “Ata mi sirbidor cu mi a scohe, mi stima, den kende mi alma tin goso; lo mi pone mi spirito riba dje.” (Mateo 12:18) No tin ningun otro persona cu sa mihor cu nos Creador ki tipo di lider nos mester. Jehova su sabiduria ta infinito, pues nos tin suficiente motibo pa confia e persona cu el a scohe.—Proverbionan 3:5, 6.

10. Dicon Hesus su ehempel ta e mihor ehempel pa hende sigui?

¹⁰ Na di dos luga, Hesus a pone un ehempel perfecto pa nos, un ehempel cu ta inspira nos. E mihor tipo di lider tin cualidadnan cu su subditonan por admira y imita. E ta dirigi hende mediante su ehempel, y ta inspira nan pa bira mihor hende. Cua ta e cualidadnan cu lo bo admira mas den un lider? Curashi? Sabiduria? Compasion? Kico di perseverancia ora e ta confronta dificultad? Segun cu bo ta studia e registro di Hesus su bida riba Tera, lo bo descubri cu e tabatin tur e cualidadnan ei, y asta mas! Siendo cu Hesus tabata un refleho perfecto di su Tata celestial, e tabatin tur cualidad divino a la perfeccion. E tabata di berdad un hende perfecto den tur sentido. Pues den tur loke el a haci, den delaster un palabra cu el a expresa, den delaster un sintimento cu el a revela, nos ta haya algo cu ta bale la pena pa nos imita. Bijbel ta bisa cu el a ‘laga un ehempel pa bo sigui den su pasonan’ cu sumo cuidou y atencion.—1 Pedro 2:21.

11. Con Hesus a duna prueba di ta “e bon wardado”?

¹¹ Na di tres luga, Cristo a cumpli cu su afirmacion: “Ami ta e bon wardado.” (Juan 10:14) Pa hende den tempo biblico, e comparacion di wardado tabata basa riba algo conoci. Wardadonan tabata traha duro pa cuida e carnenan cu tabata na nan encargo. Un “bon wardado” tabata pone e siguridad y bienestar di su tou prome cu di dje mes. Por ehempel, Hesus su antepasado David tabata un wardado tempo cu e tabata hoben, y na mas cu un ocasion, el a risca su bida pa defende su carnenan contra atake di bestia feros. (1 Samuel 17:34-36) Hesus a bai asta mas leu na fabor di su siguidonan humano. El a entrega su bida pa nan. (Juan 10:15) Cuanto lider tin tal actitud di sacrificio propio?

12, 13. (a) Den ki sentido un wardado conoce su carnenan, y den ki manera nan conoc’e? (b) Dicon abo lo kier ta bou di e liderato di e Bon Wardador?

¹² Hesus tabata “e bon wardado” den un otro sentido tambe. Referiendo na e carnenan, el a bisa: “Mi conoce esnan cu ta di mi, y esnan cu ta di mi, conoce mi.” (Juan 10:14) Medita un rato riba Hesus su ilustracion. Pa un observado casual, un tou di carne lo por parce simplemente un boshi di lana riba otro. Sinembargo, e wardado conoce cada un di su carnenan. E sa cua embra pronto lo tin mester di su yudansa ora di werp, cua ta e lamchinan cu ainda e tin cu carga pasobra nan ta mucho chikito y suak pa cana riba nan mes forsa, y cua carne recientemente tabata malo of herida. E carnenan tambe conoce nan wardado bon. Nan ta reconoce su bos, y nunca ta bruha kere cu ta bos di un otro wardado. Ora e bos di e wardado tin un tono di alerta of ta indica cu tin algo urgente, nan ta reacciona rapidamente. Caminda e dirigi nan, nan ta siguie. Anto e wardado sa precies unda e tin cu hiba nan. E sa unda tin yerba berde na abundancia, unda tin awa limpi y refrescante, unda tin sabana fuera di peliger. Segun cu e ta vigila e carnenan, nan ta sinti cu nan ta sano y salvo.—Salmo 23.

¹³ Abo no ta anhela un liderato asina? E Bon Wardador tin un registro incomparabel di ta trata su siguidonan precisamente asina. E ta priminti di guia bo for di awor na un bida felis cu ta duna satisfaccion y tambe na un futuro eterno! (Juan 10:10, 11; Revelacion 7:16, 17) P’esei nos mester sa kico precies sigui Cristo ta ensera.

Loke Ta Nifica Sigui Cristo

14, 15. Pa un hende ta un siguido di Cristo, dicon no ta basta pa e djis declara cu e ta un cristian of pa e forma un laso emocional cu Hesus?

¹⁴ Awe, miyones y miyones di hende probablemente ta sinti cu nan a acepta Cristo su invitacion. De echo, nan ta yama nan mes cristian. Podise nan ta pertenece na e religion den cua nan mayornan a batisa nan. Of kisas nan ta pretende cu nan tin un laso emocional cu Hesus y ta acept’e como nan Salbador personal. Pero acaso esei ta haci nan siguido di Cristo? Ta esei Hesus tabatin na mente ora el a invita nos pa bira su siguido? Esaki ta ensera hopi mas cos.

¹⁵ Considera e mundo di cristiandad, esta, e nacionnan caminda mayor parti di nan ciudadanonan ta pretende di ta siguido di Cristo. Cristiandad ta practica e siñansanan di Hesucristo? Of nos ta mira den e paisnan ei e mesun odio, opresion, criminalidad y inhusticia cu nos ta haya den e resto di mundo? E lider hindu respeta Mohandas Gandhi a yega di bisa: “Mi no sa di ningun hende cu a haci mas pa humanidad cu Hesus. Pa bisa berdad, no tin nada malo cu cristianismo.” El a agrega: “E problema ta cu boso, cristiannan. Boso no ta ni aplica boso mes siñansanan.”

16, 17. Kico ta falta hopi biaha den e hendenan cu ta pretende di ta cristian, y kico ta distingui nan for di berdadero siguidonan di Cristo?

¹⁶ Hesus a bisa cu su berdadero siguidonan lo ta conoci principalmente pa nan accionnan y no simplemente a base di loke nan ta bisa of e nomber cu nan ta duna nan mes. Por ehempel, el a bisa: “No ta tur hende cu bisa mi: ‘Señor, Señor’, lo drenta e reino di shelo; ma esun cu haci e boluntad di mi Tata cu ta den shelo.” (Mateo 7:21) Dicon asina tanto hende cu ta pretende cu Hesus ta nan Señor no ta haciendo e boluntad di su Tata? Corda riba e hoben gobernante rico. Hopi biaha, tin ‘un cos cu ta falta’ den e hendenan cu ta pretende di ta cristian. Esei ta amor di henter nan alma pa Hesus y pa Esun cu a mand’e.

¹⁷ Con esei por ta? E miyones di hendenan cu ta yama nan mes cristian no ta pretende tambe di ta stima Cristo? Indudablemente cu si. Pero amor pa Hesus y pa Jehova ta ensera mas cu simpel palabra. Hesus a bisa: “Si un hende ta stima mi, e lo warda mi palabra.” (Juan 14:23) Anto papiando como wardado, el a bisa un biaha mas: “Mi carnenan ta tende mi bos, y mi conoce nan, y nan ta sigui mi.” (Juan 10:27) Si, e berdadero prueba di nos amor pa Cristo no ta simplemente loke nos ta bisa ni loke nos ta sinti sino principalmente loke nos ta haci.

18, 19. (a) Ki efecto loke nos ta siña tocante Hesus mester tin riba nos? (b) Kico ta e proposito di e buki aki, y con lo e beneficia personanan cu ya pa hopi tempo ta considera nan mes siguido di Cristo?

¹⁸ Sinembargo, nos accionnan ta origina for di algo. Nan ta refleha e persona cu nos realmente ta di paden. Ta einan nos trabou mester cuminsa. Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Juan 17:3) Si nos adkiri conocemento exacto tocante Hesus y medita riba dje, esei lo tin efecto riba nos curason. Nos lo bin stim’e mas y mas, y cultiva den nos mes un deseo cada bes mas grandi pa siguie diariamente.

¹⁹ Ta esaki ta e proposito di e buki aki. Su meta no ta pa duna un resumen completo di e bida y ministerio di Hesus, sino pa yuda nos mira den un forma mas cla con nos por sigui Hesus.b E buki aki ta prepara di tal manera cu e ta yuda nos wak den e spil di e Scritura y puntra nos mes: ‘Di berdad mi ta siguiendo Hesus?’ (Santiago 1:23-25) Podise ya pa hopi tempo bo ta considera bo mes un carne cu ta sigui e guia di e Bon Wardador. Sinembargo, bo no ta di acuerdo cu semper nos por haya maneranan pa mehora? Bijbel ta urgi nos: “Samina boso mes pa wak si boso ta den e fe; samina boso mes!” (2 Corintionan 13:5) Ta bale la pena pa nos haci sigur cu en berdad nos ta ser guia pa nos amoroso Bon Wardador, Hesus, kende Jehova mes a nombra pa guia nos.

20. Kico nos lo considera den e siguiente capitulo?

²⁰ Nos ta spera cu bo estudio di e buki aki lo yuda bo fortalece bo amor pa Hesus y pa Jehova. Segun cu e amor ei ta guia bo den bida, lo bo haya e pas y satisfaccion di mas grandi cu ta posibel den e mundo bieu aki. Ademas, lo bo biba pa alaba Jehova pa semper pa e echo cu el a percura e Bon Wardador pa nos. Claro cu nos estudio di Cristo mester ta basa riba e fundeshi corecto. P’esei ta na su luga cu den Capitulo 2 nos lo bai analisa Hesus su papel den Jehova su proposito universal.