Un Sociedad sin Distincion di Clase Realmente Ta Posibel?

JOHN ADAMS, kende tawata e segundo presidente di Merca, ta un di esnan cu a firma e famoso Declaracion di Independencia. Den dje tin e siguiente palabranan noble: “Nos ta kere cu e berdadnan aki ta masha cla, cu tur hende a ser crea igual.” Toch ta parce cu John Adams tawatin su dudanan en cuanto si hende ta igual di berdad, pasobra el a skirbi: “Dios Todopoderoso a crea hende asina distinto for di otro pa loke ta Mente y Curpa cu ningun plan maestro por pone nan bira igual.” Na contrast, e historiado Britanico H. G. Wells si por a imagina su mes un sociedad den cua tur hende lo ta igual. Pa logra esaki, el a pensa cu tres cos ta necesario: un religion comun rond mundo cu ta puro y sin contaminacion, educacion pa tur hende, y no mester tin trupanan arma.

Te awe no tin ningun sociedad den cua tur hende ta igual manera Wells a visualisa. Hende ta leu di ta igual, y te ainda distincion di clase ta un caracteristica dominante di sociedad. Tal separacion di clase a yuda sociedad den su totalidad? No. Ora posicion social ta existi, esei ta dividi hende, e ta pone hende odia y envidia otro. Ademas, e ta duna nan dolo di curason y ta causa dramamento di sanger. E mentalidad cu un tempo a existi na Africa, Australia y Nort America, esta cu rasa blanco ta superior, a causa sufrimento pa hende di otro rasa. Un ehempel di esaki ta e masacre completo di e habitantenan original di e Tera di Van Diemen (awor Tasmania). Na Europa nan tawata considera rasa Hudiu como inferior, y esei a hiba na e Holocaust. E rikesa inmenso di aristocrat y e echo cu esnan di e clase inferior y e clase medio tawata malcontento, ta factornan cu a hiba na e Revolucion di Francia di siglo 18 y na e Revolucion Bolshewiki di Rusia den siglo 20.

Un homber sabi di pasado a skirbi: “Hende a domina hende pa su perhuicio.” (Eclesiastes 8:9, NW) Loke el a bisa ta conta tanto pa hende individual cu ta domina otro como pa clase social cu ta domina otro. Ora un grupo ta halsa su mes riba un otro, e consecuencia inevitabel ta sufrimento y miseria.

Dilanti Dios Tur Hende Ta Igual

Acaso tin grupo di hende cu di naturalesa ta superior cu otro grupo? No den bista di Dios. Bijbel ta bisa: “For di un sanger El a traha tur nacion di hende pa biba riba henter mundo.” (Echonan 17:26) Ademas e Creador “no ta duna preferencia na prinsnan, ni ta duna e rico mas atencion cu e pober, pasobra nan tur ta obra di Su mannan.” (Job 34:19) Tur hende ta bin di e mesun antepasadonan, y dilanti Dios tur a nace igual.

Corda tambe cu ora un hende muri, tur su pretencionnan di cu e ta superior cu otro hende ta disparce. E Egipcionan di antiguedad no a kere esei. Ora un farao a muri, nan tawata pone articulonan di hopi balor den su graf pa asina e por a disfruta di nan segun cu el a sigui ocupa su puesto halto den un otro bida. Esei tawata e caso? No. Gran parti di e rikesa ei a bin cai den man di ladron di graf, y varios cos cu e ladronnan no a bai cu ne por ser mira awe den museonan.

Siendo cu farao tawata morto, sigur e no por a haci uzo di tur e cosnan caro ei. E mortonan no ta pertenece na un clase inferior ni superior, ni no ta rico ni pober. Bijbel ta bisa: “Hende sabi ta muri; e bobo y esnan sin sinti ta perece na e mesun manera . . . Ma hende cu tur su honor no ta permanece; e ta mescos cu bestia cu ta perece.” (Salmo 49:10, 12) Sea cu nos ta rei of catibo, e palabranan inspira aki ta conta pa nos tur: “Ma e mortonan no sa nada, ni nan no tin recompensa mas, . . . pasobra no tin ni actividad ni planificacion ni sabiduria den Seol, caminda bo ta bai.”—Eclesiastes 9:5, 10.

Nos tur a nace igual den Dios su bista, y nos tur ta muri igual. Pesei no ta bale la pena pa halsa un grupo riba otro durante nos bida cortico!

Con un Sociedad sin Distincion di Clase Lo Ser Logra?

Pero, tin speransa cu un dia lo tin un sociedad di hende na bida den cua clase social lo no ta importante mas? Si, tin speransa. Casi 2.000 aña pasa, ora Hesus tawata riba tera, el a pone fundeshi pa un sociedad asina. Hesus a entrega su bida como un sacrificio di rescate pa “ken cu kere den djE no bai perdi, ma tin bida eterno.”—Juan 3:16.

Pa mustra cu ningun di su siguidonan mester halsa nan mes riba otro compañero creyente, Hesus a bisa: “Boso no mester wordo yama rabi, pasobra ta Un ta boso Maestro, y boso tur ta ruman. Y no yama ningun hende riba tera boso tata, pasobra ta Un ta boso Tata, Esun cu ta den shelo. Y boso no mester wordo yama maestro, pasobra ta Un ta boso Maestro, esta, Cristo. Ma esun di mas grandi meimei di boso lo ta boso sirbido. Y ken cu halsa su mes lo wordo humiya, y ken cu humiya su mes lo wordo halsa.” (Mateo 23:8-12) Pa Dios, tur berdadero disipel di Hesus ta igual den fe.

E Cristiannan di prome a considera nan mes igual cu otro? Esnan cu a capta e sentido di loke Hesus a siña a haci esei. Nan tawata considera otro como igual den fe y a demostra esaki door di yama otro “ruman.” (Filemon 1, 7, 20) Hesus no a anima ningun persona pa pensa cu e ta miho cu otro hende. Mira por ehempel e manera humilde cu Pedro a describi su mes den su di dos carta: “Simon Pedro, un sirbido y apostel di Hesucristo, na esnan cu a ricibi e mesun fe precioso cu nos.” (2 Pedro 1:1) Hesus personalmente a duna Pedro instruccion, y como apostel, e tawatin un posicion di hopi responsabilidad. Toch, el a considera su mes un sirbido of esclabo y el a reconoce cu otro Cristiannan den e berdad tawatin mesun privilegio cu ne.

Algun hende kisas ta bisa cu e echo cu den tempo precristian Dios a haci Israel su nacion special, ta contradeci e ideal di igualdad. (Exodo 19:5, 6) Por ta nan ta bisa cu esaki ta un ehempel di superioridad di rasa, pero esei no ta asina. Ta berdad cu e Israelitanan, como desendiente di Abraham, tawatin un relacion special cu Dios y nan tawata Su canal di revelacion. (Romanonan 3:1, 2) Pero esei no tawata cu e proposito di halsa nan. Tawata mas bien pa ‘tur e nacionnan ser bendiciona.’—Genesis 22:18; Galationan 3:8.

Pero loke a sosode ta cu mayoria Israelita no a imita e fe di nan antepasado Abraham. Nan no tawata fiel y a rechasa Hesus como Mesias. Pa e motibo ei Dios a rechasa nan. (Mateo 21:43) Ma esei no kier men cu esnan manso entre humanidad lo a keda sin haya e bon cosnan cu a ser priminti. Na Pentecoste di aña 33 Era Comun, e congregacion Cristian a cuminsa funciona. A yama e organisacion di Cristiannan aki cu a ser ungi pa spirito santo “e Israel di Dios”, y el a resulta di ta e canal mediante cua e bendicionnan ei lo bini.—Galationan 6:16.

Mester a siña algun miembro di e congregacion ei cu tur hende ta igual. Por ehempel, disipel Santiago a duna conseho na esnan cu tawata trata Cristiannan rico cu mas honor. (Santiago 2:1-4) Esei no tawata corecto. Apostel Pablo a mustra cu Cristiannan cu no tawata Hudiu di ningun manera tawata inferior cu e Cristiannan Hudiu, y cu mohenan Cristian di ningun manera tawata inferior cu homber. El a skirbi: “Boso tur ta yiunan di Dios door di fe den Cristo Hesus. Pasobra boso tur, cu a wordo batisa den Cristo, a bisti boso mes cu Cristo. Awor no tin ni Hudiu ni Griego, no tin ni esclabo ni hende liber, no tin ni homber ni mohe; pasobra boso tur ta un den Cristo Hesus.”—Galationan 3:26-28.

Un Pueblo sin Distincion di Clase Social Awe

Awe Testigonan di Yehova ta purba biba segun e principionan biblico. Nan sa cu clase social no tin ningun nificacion special den bista di Dios. Pesei, nan no tin un division entre clero y laico, y nan no ta parti den grupo segun colo di cuero of rikesa. Maske algun di nan kisas ta rico, nan no ta concentra riba ‘e exhibicion grandioso di nan medio di biba’ pasobra nan sa cu e cosnan ei ta pasahero. (1 Juan 2:15-17, NW) Mas bien, nan adoracion na Yehova Dios e Soberano Universal, ta uni nan.

Cada un di nan ta asumi nan responsabilidad di predica e bon nobo di e Reino na nan prohimo. Mescos cu Hesus, e Testigonan ta honra esnan oprimi y neglisha door di bishita nan na nan cas, y ofrece pa siña nan e Palabra di Dios. Esnan di condicion humilde den bida ta traha hunto cu esnan cu algun hende kisas ta considera como di alta sociedad. Loke ta conta pa nan ta cualidadnan spiritual y no posicion social. Manera tawata e caso den prome siglo, nan tur ta ruman den e fe.

Igualdad No Ta Nifica Cu No Por Tin Variedad

Naturalmente, igualdad no kier men cu tur cos mester ta mescos. Homber y mohe, hoben y bieu, tur ta ser representa den e organisacion Cristian aki cu ta inclui hende cu ta bin di masha hopi antecedente racial, linguistico, nacional y economico. Nan habilidadnan mental y fisico ta varia di un persona pa otro. Pero e diferencianan ei no ta haci esun superior of inferior cu e otro. En bes di esei, e diferencianan ei ta resulta den un variedad agradabel. E Cristiannan aki ta reconoce cu cualkier talento cu nan tin ta bini di Dios y cu no tin motibo pa sinti nan superior.

Division di clase social ta consecuencia di e echo cu hende a purba di goberna nan mes en bes di sigui Dios su guia. Pronto e Reino di Dios lo tuma over e gobernacion di tur dia riba e tera aki. E ora ei lo bin un fin na e distincion di clase social cu hende a crea y tambe na e otro cosnan cu a causa sufrimento durante siglonan. E ora ei si ‘e humildenan mes lo hereda e tera.’ (Salmo 37:11) Hende lo no tin motibo mas pa broma cu nan ta superior cu otro. Nunca mas Dios lo permiti clase social separa e hermandad mundial di hende.

[Komentario na pagina 5]

E Creador “no ta duna preferencia na prinsnan, ni ta duna e rico mas atencion cu e pober, pasobra nan tur ta obra di Su mannan.”—Job 34:19.

[Plachi na pagina 6]

Testigonan di Yehova ta mustra honor na nan prohimo

[Plachi na pagina 7]

Loke ta conta entre e Cristiannan berdadero ta cualidadnan spiritual