E Registro di Noe Tin Nificacion pa Nos?

ORA Hesus a duna e profecia tocante e señal di su binida [“presencia”, NW] y di fin di mundo, el a bisa: “E binida di e Yiu di hende lo ta mescos cu e dianan di Noe.” (Mateo 24:3, 37) Hesus a profetisa na un manera cla cu loke ta pasando den nos tempo tin un paralelo cu e tempo di Noe. Un relato confiabel y exacto di e susesonan di e dianan di Noe por ta un gran tesoro pa nos.

E registro di Noe ta un gran tesoro asina? E tin e credencialnan pa ta un berdadero documento historico? Nos por determina realmente ki tempo e Dilubio a tuma luga?

Ki Tempo e Dilubio A Tuma Luga?

Bijbel ta duna informacion cronologico cu ta permiti nos conta bai bek den tempo y yega te na cuminsamento di historia humano. Na Genesis 5:1-29, nos ta haya un registro con e generacionnan a sigui otro for di creacion di e prome homber Adam te na nacemento di Noe. E Dilubio a cuminsa “den e di seisshen aña di bida di Noe.”—Genesis 7:11.

Pa nos saca afo ki tempo e Dilubio a tuma luga, nos tin cu cuminsa cu un fecha crucial, es decir, un fecha conoci den historia seglar y cu ta coresponde cu un suseso particular skirbi den Bijbel. For di un punto crucial asina, basa riba e kalender gregoriano cu nos ta uza awor, nos por calcula e tempo y yega na un fecha pa e Dilubio.

Un di e fechanan crucial ei ta aña 539 prome cu nos era, e aña den cua Rei Ciro di Persia a tumba Babilonia. E fuentenan cu ta mustra na ki tempo el a reina ta entre otro e inscripcionnan den piedra cu nan a haya na Babilonia y documentonan di Diodoro, Africano, Eusebio y Tolomeo. Pa motibo di un decreto emiti pa Ciro, un resto Hudiu a bandona Babilonia y a yega nan patria na aña 537 prome cu nos era. Esei a marca e fin di Huda su desolacion di 70 aña, cu segun e registro biblico a cuminsa na aña 607. Door di calcula e periodo cu huesnan a manda den Israel y e periodo cu reinan a goberna Israel, nos por determina cu e Exodo di e Israelitanan for di Egipto a tuma luga na aña 1513 prome cu nos era. Contando un 430 aña mas bai bek den historia di Bijbel, nos ta yega na e pacto cu Dios a sera cu Abraham na 1943 prome cu nos era. Siguientemente nos tin cu tuma na consideracion e nacemento y duracion di bida di Tare, Nacor, Serug, Reu, Peleg, Heber y Sala, y tambe Arfaksad, cu a nace “dos aña despues di dilubio.” (Genesis 11:10-32) Di e manera ei nos por establece cu e Dilubio a cuminsa den e aña 2370 prome cu nos era.a

Awa A Cuminsa Yobe

Prome cu nos repasa e susesonan di e tempo di Noe, lo ta bon pa bo lesa Genesis capitulo 7 versiculo 11 pa capitulo 8 versiculo 4. En conexion cu e awasero pisa cu a cai, Bijbel ta bisa nos: “Den e di seisshen aña di bida di Noe [aña 2370], den e di dos luna, riba e di diesshete dia di e luna, riba e dia ei tur e fuentenan di e gran abismo a rementa, y e bentananan di shelo a wordo habri.”—Genesis 7:11.

Noe a reparti e aña den 12 luna di 30 dia cada un. Den antiguedad, e prome luna tawata cuminsa rond di meimei di luna di september riba nos kalender. E awanan a cuminsa basha den “e di dos luna, riba e di diesshete dia di e luna” y a sigui cai 40 dia y 40 anochi durante e lunanan di november y december di aña 2370 prome cu nos era.

Mas aleu Bijbel ta informa nos relaciona cu e Dilubio: “Shenticincuenta dia largo e awa a prevalece riba tera. . . . Y pocopoco e awa a cuminsa baha for di tera, y despues di shenticincuenta dia e awa a sak. Y den e di shete luna, riba e di diesshete dia di e luna, e arca a keda wanta riba e seronan di Ararat.” (Genesis 7:24–8:4) Di manera cu e tempo cu a transcuri for di momento cu awa a tapa tur e tera te na momento cu e awa a baha tawata 150 dia, of cinco luna. E ora ei e arca a bin baha riba e seronan di Ararat den april di aña 2369.

Awor lo ta bon pa bo lesa Genesis 8:5-17. E cabes di e seronan a aparece casi dos luna y mei (73 dia) despues, “den e di dies luna [juni], riba e prome dia di e luna.” (Genesis 8:5)b Tres luna (90 dia) despues—“den e di seisshentiun aña [di Noe], den e prome luna, riba e prome dia di e luna”, o sea, meimei di september di aña 2369—Noe a kita e tapa di e arca. E por a mira e ora ei cu “e superficio di suela a seca.” (Genesis 8:13) Un luna y 27 dia (57 dia) despues, “den e di dos luna, riba e di bintishete dia di e luna [meimei di november di aña 2369], tera tawata seco.” E ora ei Noe y su famia a sali pafo di e arca riba tera seco. Pues anto, Noe y su famia a pasa un aña lunar y dies dia (370 dia) den e arca.—Genesis 8:14.

Kico e registronan exacto aki cu tin di aber cu susesonan, detayenan y factornan di tempo ta proba? Nan simplemente ta proba cu e profeta Hebreo Moises a presenta echonan, no un mito. Aparentemente el a basa e relato di Genesis riba registronan cu el a ricibi. Pesei e Dilubio tin gran nificacion pa nos awe.

Con Otro Escritornan di Bijbel A Mira e Dilubio?

Fuera di e relato di Genesis, den Bijbel tin hopi referencia mas na Noe of e Dilubio. Por ehempel:

(1) E investigado Esdras a inclui Noe y su yiunan (Sem, Cam y Jafet) den e lista di desendencia di e nacion di Israel.—1 Cronicanan 1:4-17.

(2) Lucas, docter y escritor di Evangelio, ta inclui Noe den su lista di antepasadonan di Hesucristo.—Lucas 3:36.

(3) Ora apostel Pedro a skirbi rumannan cristian el a referi na e relato di Dilubio mas cu un biaha.—2 Pedro 2:5; 3:5, 6.

(4) Apostel Pablo ta papia di e gran fe cu Noe a desplega ora el a construi e arca pa su famia por a sobrevivi.—Hebreonan 11:7.

Por tin e menor duda cu e escritornan inspira di Bijbel aki a acepta e relato di Genesis tocante e Dilubio? Sin duda nan a consider’e un suseso real.

Hesus y e Dilubio

Hesucristo tawatin un existencia prehumano. (Proverbionan 8:30, 31) E tawata un criatura spiritual den shelo durante e Dilubio. Pesei como testigo, Hesus ta duna nos e confirmacion principal den Bijbel tocante Noe y e Dilubio. Hesus a bisa: “E binida di e Yiu di hende lo ta mescos cu e dianan di Noe. Pasobra mescos cu den e dianan ei cu tawata prome cu e dilubio, nan tawata come y bebe, nan tawata casa y duna pa casa, te dia cu Noe a bai den e arca, y nan no a compronde te ora cu e dilubio a bin y a bai cu nan tur, asina e binida di e Yiu di hende lo ta.”—Mateo 24:37-39.

Hesus lo uza un mito pa spierta nos tocante e benidero fin di e mundo aki? Claro cu no! Nos tin sigur cu el a uza un ehempel real di e manera cu Yehova ta ehecuta su huicio riba e malbadonan. Si, hopi hende a perde nan bida, pero nos por haya consuelo for di e echo cu Noe y su famia a sobrevivi e Dilubio.

“E dianan di Noe” tin hopi nificacion pa hende cu ta biba awe, durante “e binida di e Yiu di hende”, Hesucristo. Ora nos ta lesa e relato detaya di e Dilubio mundial conserba den un registro cu Noe a tene, nos por ta sigur cu e ta un documento historico real. Y e relato di Genesis inspira pa Dios tocante e Dilubio tin un gran nificacion pa nos. Mescos cu Noe, su yiunan y nan casanan a pone fe den Dios su medio di sobrevivencia, asina nos awe por haya e proteccion di Yehova a base di nos fe den Hesus su sacrificio di rescate. (Mateo 20:28) Ademas, nos por tin e speransa di ta entre e sobrevivientenan di e fin di e sistema di cosnan aki mescos cu Noe su diario di nabegacion ta mustra con e y su famia a sobrevivi e Dilubio cu a pone fin na e mundo malbado di e tempo ei.

[Nota]

[Cuadro na pagina 5]

Di Berdad Nan A Biba Asina Largo?

“TUR e dianan di Noe tawata 950 aña y el a muri”, Bijbel ta bisa. (Genesis 9:29) E welo di Noe, Matusalen, a biba 969 aña—mas cu tur otro hende. E dies generacionnan for di Adam te Noe a biba como promedio mas cu 850 aña. (Genesis 5:5-31) Di berdad e hendenan di e tempo ei a biba asina largo?

E proposito original di Dios tawata pa hende biba pa semper. E prome homber, Adam, a ser crea cu e oportunidad di hiba un bida cu lo no a caba nunca si el a keda obediente na Dios. (Genesis 2:15-17) Pero Adam a desobedece Dios y a perde e oportunidad ei. Adam a biba 930 aña. Pocopoco pero sigur su curpa a bai atras te ora el a muri y a bolbe bek na e suela for di cua el a ser tuma. (Genesis 3:19; 5:5) E prome homber a pasa e herencia di pica y morto pa tur su desendientenan.—Romanonan 5:12.

Sinembargo, e hendenan cu a biba den e periodo di tempo ei tawata mas serca di e perfeccion original di Adam y aparentemente pa e motibo ei a biba mas largo cu e hendenan cu a nace mas despues. Pesei, como promedio hende tawata biba casi mil aña durante e periodo prome cu e Dilubio, pero despues di e Dilubio esei a baha rapidamente. Abraham, por ehempel a biba 175 aña so. (Genesis 25:7) Y mas o menos 400 aña despues cu e patriarca fiel ei a muri, profeta Moises a skirbi: “E dianan di nos bida ta setenta aña, of si hende tin hopi forsa, ochenta aña; toch nan orguyo no ta nada otro cu molester y pena.” (Salmo 90:10) E situacion awe ta practicamente mescos.

[Grafiek/Plachi na pagina 6, 7]

Contando Bai Bek for di e Decreto di Ciro, Cu A Permiti e Hudiunan Bolbe for di Nan Exilio, te na e Dilubio den Dia di Noe

537 Decreto di Ciroc

539 Ciro di Persia ta tumba Babilonia

68 aña

607 Huda su desolacion di 70 aña ta cuminsa

1513 Exodo di Israel for di Egipto

1943 Confirmacion di e aliansa cu Abraham

205 aña

2148 Nacemento di Tare

222 aña

2370 Cuminsamento di e Dilubio

[Nota]