E Palabra di Jehova Ta Bibo

Puntonan Sobresaliente di e Buki di Isaias—II

ISAIAS ta eherciendo su encargo como profeta fielmente. E declaracionnan formal cu el a expresa contra e reino di dies tribu di Israel a cumpli caba. Awor e tin mas di bisa tocante e futuro di Jerusalem.

E ta profetisa cu e stad di Jerusalem lo ser destrui y su habitantenan lo ser hiba preso. Pero e desolacion lo no ta permanente. Despues di un tempo, adoracion berdadero lo keda restaura. Esaki ta e mensahe basico di Isaias 36:1–66:24.a Nos lo beneficia di un consideracion di loke tin para den e capitulonan aki pasobra hopi di e profesianan den e seccion aki tin nan cumplimento principal, of final, den nos tempo of lo cumpli den futuro cercano. E parti aki di e buki di Isaias ta contene tambe profesianan emocionante relaciona cu e Mesias.

“MIRA, E DIANAN TA BIN”

(Isaias 36:1–39:8)

Den e di 14 aña di e reinado di Rei Ezekias (aña 732 P.E.C.), e Asirionan ta invadi Juda. Jehova ta priminti di defende Jerusalem. E menasa di ser invadi ta termina ora cu un solo angel di Jehova ta mata 185.000 solda Asirio.

Ezekias ta bira malo. Jehova ta contesta su oracion y ta cur’e, dunand’e 15 aña mas di bida. Rei di Babilonia ta manda mensaheronan bin felicit’e, anto Ezekias di un manera imprudente ta mustra nan tur su tesoronan. Isaias ta entrega Jehova su mensahe na Ezekias, bisando: “Mira, e dianan ta bin cu tur loke tin den bo cas, y tur loke bo tatanan a acumula te dia djawe, lo wordo hiba Babilonia.” (Isaias 39:5, 6) Un poco mas cu 100 aña despues, e profesia ei ta cumpli.

Contesta Riba Pregunta Biblico:

38:8—Ta riba ki “trapi” Dios a laga e sombra bolbe bai patras? Como cu pa siglo 8 prome cu nos era, hende tabata uza holoshi di solo tanto na Egipto como na Babilonia, esaki por ta referi na e tretnan di un holoshi di solo cu e tata di Ezekias, Acaz, lo a obtene. Of lo e por ta referi tambe na un trapi paden di e palacio. Un pilar canto di e trapi kisas gradualmente a tira sombra riba e tretnan, locual por a sirbi como un manera pa wak tempo.

Les pa Nos:

36:2, 3, 22. Aunke Sebna a perde su puesto como mayordomo, e tabatin mag di sigui den servicio di rei como secretario di esun cu a tuma su luga. (Isaias 22:15, 19) Si pa un motibo of otro nos ser kita for di un puesto di responsabilidad den e organisacion di Jehova, nos tambe lo no tin cu sigui sirbi Dios den cualkier capasidad cu e ta permiti?

37:1, 14, 15; 38:1, 2. Den tempo di angustia lo ta sabi di nos parti pa acudi na Jehova den oracion y pone pleno confiansa den dje.

37:15-20; 38:2, 3. Ora cu Jerusalem tabata bou di menasa di Asiria, Ezekias su precupacion principal tabata cu derota di Jerusalem lo a trece reproche riba e nomber di Jehova. Ora cu Ezekias a haya sa cu lo e muri di su malesa, su precupacion a bai mas leu cu su interesnan personal. Loke mas a precup’e tabata kico e echo cu lo e muri sin un heredero lo a nifica pa e liña di rei for di David. Tambe e tabata precupa tocante ken lo a dirigi e lucha contra e Asirionan. Mescos cu Ezekias, nos ta considera santificacion di e nomber di Jehova y cumplimento di su proposito mas importante cu nos propio salbacion.

38:9-20. E cantica aki di Ezekias ta siña nos cu no tin nada mas importante den bida cu e oportunidad di alaba Jehova.

“LO BO WORDO CONSTRUI”

(Isaias 40:1–59:21)

Despues di a predeci e destruccion di Jerusalem y e cautiverio na Babilonia cu esei lo hiba na dje, Isaias ta profetisa tocante restauracion di adoracion berdadero. (Isaias 40:1, 2) Isaias 44:28 ta declara tocante Jerusalem: “Lo bo wordo construi.” Hende lo carga e imagennan di e diosnan di Babilonia bai cu ne manera ekipahe. (Isaias 46:1) Babilonia lo ser destrui. Tur esaki ta cumpli dos siglo despues.

Jehova lo duna su sirbidor como “un lus pa e nacionnan.” (Isaias 49:6) E “shelo” babilonico, esta e grupo cu tabata na mando, lo “ser plama den fragmento mescos cu huma”, y su subditonan “lo muri manera sangura”; pero e ‘yiu muher catibo di Sion lo libra su mes for di e cadenanan cu tin rond di su garganta.’ (Isaias 51:6, NW; 52:2) Jehova ta bisa na esnan cu bin cerca dje y cu ta scucha: “Lo mi sera un aliansa eterno cu boso, segun e misericordianan fiel mustra na David.” (Isaias 55:3) Ora un hende ta biba na harmonia cu e rekisitonan husto di Dios, esei ta hib’e na haya ‘delicia den Jehova.’ (Isaias 58:14) Di otro banda, e erornan di e pueblo ta ‘causa separacion entre nan y nan Dios.’—Isaias 59:2.

Contesta Riba Pregunta Biblico:

40:27, 28—Dicon Israel a bisa: “Mi caminda ta scondi pa SEÑOR, y mi Dios no ta haci caso di mi derecho”? Algun Hudiu den Babilonia kisas a pensa cu Jehova no tabata mira e inhusticianan cu nan tabata sufri, cu eseinan tabata scondi p’e. P’esei nan a haya e recordatorio cu Babilonia no tabata fuera di alcance di e Creador di Tera, kende no ta cansa ni fatiga.

43:18-21—Dicon Dios a bisa e exiliadonan cu tabata biniendo cas bek pa nan “no recorda e cosnan di antes”? Esaki no tabata den e sentido cu nan mester a lubida Jehova su actonan di liberacion di pasado. Mas bien, Jehova tabata kier pa nan alab’e a base di “algo nobo” cu nan mes lo a experencia, manera por ehempel nan regreso sano y salvo na Jerusalem, kisas via un ruta mas directo atrabes di desierto. “Un multitud grandi” cu lo sali for di “e gran tribulacion” tambe lo tin motibonan nobo y personal pa glorifica Jehova.—Revelacion 7:9, 14.

49:6—Con e Mesias ta “un lus pa e nacionnan”, a pesar cu su ministerio terenal tabata limita na e yiunan di Israel? Esaki ta debi na loke a sosode despues di e morto di Hesus. Bijbel ta aplica Isaias 49:6 na su discipelnan. (Echonan 13:46, 47) Awe, cristiannan ungi, cu yudansa di un multitud grandi di adorado, ta fungi como “un lus pa e nacionnan”, dunando iluminacion na hende “te na e finnan di Tera.”—Mateo 24:14; 28:19, 20.

53:10, NW—Den ki sentido Jehova tabatin placer den aplasta su Yiu? Lo mester a duel Jehova, e Dios di compasion y empatia, pa mira su Yiu stima sufri. Asina mes, E tabatin placer den e manera di buena gana cu Hesus a obedec’e y den tur loke Hesus su sufrimento y morto lo a logra.—Proverbionan 27:11; Isaias 63:9.

53:11—Kico ta e conocemento pa medio di cua e Mesias “lo hustifica hopi hende”? Esaki ta e conocemento cu Hesus a adkiri ora el a bin na Tera, bira hende y sufri inhustamente te na morto. (Hebreonan 4:15) Asina el a percura un sacrificio di rescate cu tabata necesario pa yuda cristiannan ungi y e multitud grandi haya un posicion husto dilanti di Dios.—Romanonan 5:19; Santiago 2:23, 25.

56:6—Ken ta “e stranheronan”, y den ki manera nan ta “tene firme na [Jehova su] aliansa”? “E stranheronan” ta e “otro carnenan” di Hesus. (Juan 10:16) Nan ta tene firmemente na e pacto of aliansa nobo den e sentido cu nan ta obedece e leinan relaciona cu e aliansa ei, ta coopera plenamente cu e areglonan haci mediante dje, ta tuma di e mesun alimento spiritual cu cristiannan ungi y ta sostene e unginan den e trabou di predica e Reino y haci discipel.

Les pa Nos:

40:10-14, 26, 28. Jehova ta fuerte y suave, todopoderoso y di sabiduria infinito, y su comprondemento ta hopi mas grandi di loke nos por capta.

40:17, 23; 41:29; 44:9; 59:4. Aliansanan politico y imagennan di diosnan falso ta “nada”, nan ta insignificante. Confia den nan no tin ningun balor.

42:18, 19; 43:8. Si nos ta sera nos wowo pa Dios su Palabra skirbi y ta sera nos horea pa no tende su instruccion duna mediante “e esclabo fiel y prudente”, nos ta bira ciego y sordo den sentido spiritual.—Mateo 24:45.

43:25. Jehova ta kita nos transgresionnan pa su mes causa. Santificacion di e nomber di Jehova ta e cos di mas importante. Nos liberacion for di sclabitud na pica y morto y nos hayamento di bida eterno ta di segundo importancia.

44:8. Nos tin e sosten di Jehova. E ta stabil y firme manera un baranca. Nunca nos no mester tin miedo di duna testimonio tocante su Divinidad!—2 Samuel 22:31, 32.

44:18-20. Idolatria ta indicacion di un curason corumpi. Nada lo mester ocupa e luga di Jehova den nos curason.

46:10, 11. Un prueba absoluto di Jehova su Divinidad ta cu e tin e capasidad di ‘establece su proposito’, es decir, di cumpli cu ne.

48:17, 18; 57:19-21. Si nos ta acudi na Jehova pa salbacion, ta hala cerca dje y ta presta atencion na su mandamentonan, nos pas lo ta mes abundante cu e awanan di un riu cu ta core y nos echonan di husticia lo ta mes abundante cu e olanan di lama. Hende cu no ta presta atencion na e Palabra di Dios ta manera “lama bruto.” Nan no tin pas.

52:5, 6. E Babilonionan kibocadamente a conclui cu e Dios berdadero tabata suak. Nan no a reconoce cu Israel tabata den cautiverio pasobra Jehova tabata mal contento cu su pueblo. Ora otro hende ta confronta calamidad, lo ta sabi di nos parti pa nos no saca conclusionnan pura relaciona cu kico lo ta e causa.

52:7-9; 55:12, 13. Nos tin por lo menos tres motibo pa participa cu goso den e trabou di predica e Reino y haci discipel. Nos pianan ta bunita pa hende humilde cu tin hamber spiritual. Nos ta mira Jehova ‘cu nos mes wowo’, es decir, nos tin un relacion intimo cu ne. Ademas, nos ta disfruta di prosperidad spiritual.

52:11, 12. Pa nos ta cualifica pa carga ‘e articulonan-di-uzo di Jehova’—su provisionnan pa sirbishi sagrado—nos mester ta limpi den sentido moral y spiritual.

58:1-14. Desplega devocion y husticia na un manera hipocrita ta en vano. Adoradonan berdadero mester abunda cu expresionnan sincero di devocion na Dios y echonan di amor fraternal.—Juan 13:35; 2 Pedro 3:11.

59:15b-19. Jehova ta observa asuntonan humano y ta interveni na su debido tempo.

LO E “TA UN CORONA DI BUNITESA”

(Isaias 60:1–66:24)

Señalando na e restauracion di adoracion berdadero den tempo antiguo y tambe den nos tempo, Isaias 60:1 ta declara: “Lanta, briya pasobra bo lus a yega, y e gloria di SEÑOR ta briya riba bo.” Sion lo ta ‘un corona di bunitesa den e man di Jehova.’—Isaias 62:3.

Isaias ta haci oracion na Jehova na fabor di su paisanonan cu lo arepenti durante nan exilio na Babilonia. (Isaias 63:15–64:12) Despues di mustra e contraste entre sirbidornan berdadero cu esnan falso, e profeta ta declara con Jehova lo bendiciona esnan cu ta sirbie.—Isaias 65:1–66:24.

Contesta Riba Pregunta Biblico:

61:8, 9—Kico ta e “aliansa eterno”, y ken ta e “yiunan”? Esaki ta e aliansa nobo cu Jehova a sera cu cristiannan ungi. E “yiunan” ta e “otro carnenan”, esta, e miyones di hendenan cu ta reacciona faborablemente riba nan mensahe.—Juan 10:16.

63:5—Con Dios su furia a sosten’e? Dios su furia ta un emocion controla, su indignacion husto. E furia aki ta sosten’e y motiv’e pa ehecuta su huicionan husto.

Les pa Nos:

64:6. Hende imperfecto no por salba nan mes. Pa loke ta hacimento di expiacion pa pica, nan actonan husto no ta bal mas cu paña sushi.—Romanonan 3:23, 24.

65:13, 14. Jehova ta bendiciona su sirbidornan fiel, satisfaciendo nan necesidadnan spiritual na abundancia.

66:3-5. Jehova ta odia hipocresia.

“Sea Contento”

Esta un gran consuelo e profesianan di restauracion di adoracion berdadero lo mester tabata pa e Hudiunan fiel cu a biba como exiliado na Babilonia! Jehova a bisa nan: “Sea contento y regociha pa semper den loke mi ta crea; pasobra mira, mi ta crea Jerusalem pa goso, y su pueblo pa alegria.”—Isaias 65:18.

Nos tambe ta bibando den un tempo cu scuridad ta tapa e Tera y e nacionnan ta den scuridad profundo. (Isaias 60:2) Nos ta confronta “temponan trabahoso.” (2 Timoteo 3:1) Pues, Jehova su mensahe di salbacion cu tin den e buki biblico di Isaias ta un gran animacion pa nos.—Hebreonan 4:12.

[Nota]

[Plachi na pagina 8]

Bo sa cua ta e motibo principal pakico Ezekias a pidi Dios salb’e di e Asirionan?

[Plachi na pagina 11]

“Ki bunita riba e seronan ta e pianan di esun cu ta trece bon nobo!”