“Reuni e Pueblo”
1. Den ki sentido congresonan di districto y internacional ta mescos cu e reunion importante cu e Israelitanan tabatin despues cu nan a sali for di Egipto?
1 Poco despues cu e Israelitanan a sali for di Egipto, Jehova a manda Moises pa “reuni e pueblo” na Sero Sinai pa nan scucha Su palabranan, haya temor di Dje y siña nan yiunan cana den Su camindanan. (Deu. 4:10-13) E ocasion memorabel aki sin duda a fortalece nan fe. Den e proximo lunanan, Jehova su pueblo tambe lo reuni na nan congresonan di districto y internacional pa Jehova siña nan. Kico nos tin cu haci pa nos beneficia plenamente di e ocasion aki?
2. Kico nos tin cu haci pa nos “ta cla” pa nos congreso?
2 Bo Mester “Ta Cla”: Jehova a bisa e Israelitanan cu nan mester ‘tabata cla’ pa e reunion ey na Sero Sinai. (Ex. 19:10, 11) Awe tambe, tur hende cu lo asisti na e congresonan mester prepara, pues, no solamente esnan cu ta participa den e programa. Por ehempel, hopi ruman cu ta traha tin cu pidi dia liber. Kisas bo ta den e mesun situacion cu Nehemias, copero di Rey Artaherhes. Nehemias tabata kier tuma liber pa e por a bay Jerusalem y yuda cu reconstruccion di e murayanan, pero e tabata sa cu e Rey kisas lo no a dun’e liber. Pesey, Nehemias a haci un oracion, pensa bon kico e lo a bay bisa anto cu curashi el a haci su peticion. E Rey a dun’e liber y hasta a apoya e proyecto di construccion. (Neh. 2:1-9) Ademas di pidi bo doño di trabou dia liber, bo a regla asunto di transporte y, si mester, luga di keda caba? Si bo mester di yudansa, e ancianonan lo ta cla pa duna un man den esey. Percura pa bo ta trempan na tur sesion y pa bo ta cla pa “presta mas atencion cu di custumber” na e palabranan cu lo bo scucha.—Heb. 2:1.
3. Kico lo yuda nos prepara nos curason pa congreso?
3 Pa nos por “ta cla”, ta importante tambe pa nos prepara nos curason pa scucha y siña. (Esd. 7:10, NW) For di antemano lo pone e programa di congreso riba nos website jw.org, cu e temanan di tur discurso hunto cu un of dos texto clave. Lo ta bon pa nos trata e informacion aki den nos Adoracion Como Famia durante e simannan prome cu e congreso cu nos ta asigna na dje. Algun publicador ta print e programa y uz’e pa haci anotacion cortico durante e congreso.
4. Con mayornan por uza e congreso pa nan siña nan yiunan?
4 ‘Siña Bo Yiunan’: Un di e motibonan pakico Jehova a bisa e pueblo di Israel pa reuni na Sero Sinai tabata pa e mayornan “siña nan yiunan.” (Deu. 4:10) Mayornan tin e mesun bunita oportunidad aki na congreso. Pa logra esaki, mayornan tin cu laga nan yiunan sinta banda di nan durante e sesionnan y yuda nan presta atencion. Asina, cada miembro di e famia por conta kico el a siña di e programa na fin di cada dia of despues, durante nan Adoracion Como Famia.
5. Con nos lo beneficia ora nos asisti na nos binidero congreso?
5 E congreso historico na Sero Sinai a yuda e Israelitanan balora nan privilegio sin igual di ta e pueblo di Dios. (Deu. 4:7, 8) E meta di nos binidero congreso ta pa motiva nos den mesun direccion. Pa tres dia nos lo por ta den nos paradijs spiritual refrescante y disfruta di compania edificante, leu for di e mundo cruel di Satanas cu ta manera un desierto. (Isa. 35:7-9) Segun cu e dia di Jehova ta yega cerca, laga nos no perde e oportunidad aki di reuni hunto pa anima otro.—Heb. 10:24, 25.