Caha di pregunta

◼ Kico nos mester siña nos yiunan pa nan crece den sentido spiritual?

Mayornan cristian ta haci hopi esfuerso pa lanta nan yiunan “den e disciplina di Jehova y inculca su manera di pensa den nan.” (Efe. 6:4) Por ehempel, nan ta analisa e texto di dia tur mainta cu nan yiunan pasobra nan sa cu esey ta duna bon resultado. Durante Adoracion Como Famia y na otro ocasion, algun famia ta papia riba video cu nan a wak hunto, trata algun material specifico di e articulonan online di Los jóvenes preguntan, hunga escenanan di relatonan biblico of tene sesionnan di practica. Sinembargo, pa nos yiunan “alcansa madurez”, nan mester siña tambe berdadnan profundo di Bijbel.—Heb. 6:1.

Pensa un rato riba loke nos ta siña hende den teritorio. Por lo general, for di e bishita inicial of na e siguiente bishita, nos ta haci esfuerso pa cuminsa un estudio di Bijbel for di e buki Kico Bijbel Ta Siña Realmente? Despues di e publicacion ey, nos ta uza e buki “Keda den e Amor di Dios.” Dicon nos ta haci esey? E buki Bijbel Ta Siña ta duna e studiante e conocemento basico di e Scritura, mientras cu e buki “Amor di Dios” ta siñ’e con pa aplica principionan di Bijbel den su bida. E dos publicacionnan aki ta yuda esnan nobo pa ta “hancra” den Cristo y bira “stabiel den fe.” (Col. 2:6, 7) Pero e material aki lo no ta bon tambe pa nos yiunan? Nan tambe mester siña di e rescate, e Reino y e condicion di e mortonan. Nan tin cu compronde tambe dicon Dios ta permiti sufrimento y con nos por sa cu nos ta biba den e ultimo dianan di e mundo malbado aki. Nos yiunan mester ta convenci cu testigonan di Jehova tin e berdad. Ademas, nan tin cu siña principionan di Bijbel y entrena “nan capacidad di compronde.” (Heb. 5:14) Ta berdad cu mayornan tin cu tene cuenta cu e edad di nan yiunan y kico nan por capta. Pero ta bon pa no balota nan, pasobra hopi mucha tin e capacidad pa compronde berdadnan profundo di Bijbel for di un edad hopi jong.—Luc. 2:42, 46, 47.