Bo Por Tin Paz Mental a Pesar di Guera
Gary, kende antes tabata den servicio militar, a bisa: “Prome cu mi a cuminsa studia Bijbel, mi no tabata sa dicon tin asina tanto crueldad, inhusticia y problema na mundo. Pero awor si mi tin paz mental. Mi sa cu Jehova Dios lo haci mundo un luga trankil y safe pa biba.”
No ta Gary so ta sinti asina. Wak con Bijbel a yuda otro hende tambe.
BIJBEL TA BISA: “O Jehova, bo ta bon y semper cla pa pordona.”—Salmo 86:5.
CON E TEXTO AKI TA YUDA? “E texto aki ta sigura mi cu Jehova ta misericordioso. Mi sa cu e ta cla pa pordona mi pa tur e cosnan cu mi a haci tempo cu mi a bringa den guera.”—Wilmar, Colombia.
BIJBEL TA BISA: “Lo mi crea cielo nobo y un Tera nobo. Hende lo no corda riba e cosnan di antes mas, ni e cosnan ey lo no keda tormenta nan curason.”—Isaias 65:17.
CON E TEXTO AKI TA YUDA? “Mi ta sufri di stress postraumatico y di depresion debi na e cosnan cu mi a experencia tempo cu mi tabata den servicio militar. Pero e texto aki ta corda mi cu pronto Jehova lo laga mi lubida tur mal recuerdo cu mi tin; nan lo disparce pa semper. Esta un bunita regalo esey ta!”—Zafirah, Merca.
BIJBEL TA BISA: “Durante su reinado, hende husto lo ta manera mata cu ta spruit di nobo, y lo tin paz tur caminda te ora cu luna no existi mas.”—Salmo 72:7.
CON E TEXTO AKI TA YUDA? “Hopi biaha, mi ta pensa riba e palabranan di e texto aki. Pronto, guera y tur e cosnan malo cu e ta causa lo no existi mas. Nos lo no mester preocupa mas pa siguridad di nos sernan keri.”—Oleksandra, Ucrania.
BIJBEL TA BISA: “Bo mortonan lo biba ... Boso cu ta morto den stof, spierta y grita di alegria!”—Isaias 26:19.
CON E TEXTO AKI TA YUDA? “Casi tur e miembronan di mi famia a muri den e genocidio di e tribu Tutsi. Pero e texto aki ta sigura mi cu lo mi mira nan atrobe. Mi ta anhela di tende nan stem atrobe y mira con contento nan lo ta ora nan ser resucita!”—Marie, Ruanda.
BIJBEL TA BISA: “Djis aki, lo no tin hende malbado mas ... Pero hende manso lo hereda Tera, y nan lo disfruta di paz na abundancia.”—Salmo 37:10, 11.
CON E TEXTO AKI TA YUDA? “Aunke e guera a stop, ainda tin inhusticia y hende cu ta haci cos malo. E versiculonan aki a yuda mi hopi. Jehova ta mira tur cos y e ta compronde mi situacion. E ta priminti cu pronto tur sufrimento lo caba y lo pasa pa olvido.”—Daler, Tadjikistan.
E personanan cu nos a caba di menciona ta entre e miyones di testigonan di Jehova cu a haya paz mental despues di analisa loke Bijbel ta bisa. Nan a siña con pa vence odio cu ta existi entre rasa, nacion y tribu. Nan a siña tambe con pa vence tur otro tipo di odio. (Efesionan 4:31, 32) Testigonan di Jehova ta keda neutral den asunto politico y nan no ta participa den ningun acto violento.—Juan 18:36.
Ademas, mundialmente, testigonan di Jehova ta yuda otro y sostene otro manera famia. (Juan 13:35) Por ehempel, Oleksandra, menciona anteriormente, a hay’e ta huy bay cu su ruman muher na un otro pais debi na guera. El a bisa: “Ora nos a crusa frontera di e pais, di biaha nos a mira algun testigo di Jehova di e pais ey cla para pa duna nos bonbini. E sosten cu nan a duna nos a yuda nos adapta na nos bida nobo como refugiado den e pais ey.”
Gustosamente, nos kier invita bo pa asisti na nos reunionnan. Na nos reunionnan, nos ta siña tocante Bijbel su mensahenan di paz y con pa aplica loke Bijbel ta siña den nos bida. Bishita jw.org pa busca un reunion cu ta keda cerca di bo of pa pidi un curso di Bijbel interactivo gratis. Un testigo di Jehova por yuda bo, uzando e publicacion Bo Por Disfruta di Bida pa Semper!