Un Funcionario Importante di Salubridad Ta Spierta Hende Cu Red Social Por Tin un Mal Influencia Riba Hoben—Kico Bijbel Ta Bisa?

Dia 23 di mei 2023, un funcionario importante di salubridad na Merca a spierta hende cu red social tin un mal influencia riba hopi hoben.

“Ta berdad cu red social por tin beneficio pa algun mucha y teenager, pero tin hopi evidencia tambe cu ta mustra cu red social por tin un mal influencia riba e salud fisico y mental di mucha y teenager.”—Social Media and Youth Mental Health: The U.S. Surgeon General’s Advisory, 2023.

E declaracion publico di e funcionario di salubridad a referi na varios investigacion cu ta mustra dicon e topico aki ta algo cu mester tuma na serio.

Teenager entre 12 pa 15 aña di edad “cu ta pasa mas cu 3 ora pa dia riba red social tin dos biaha mas tanto chens di haya nan cu problema di salud mental, incluso sintoma di depresion y ansiedad.”
Ora teenager di 14 aña di edad “pasa mas tanto tempo riba red social, hopi bes nan no ta drumi bon; nan ta haya nan cu termento (bullying) online; nan tin un punto di bista negativo di nan apariencia; nan ta sinti cu nan no ta bal nada, y nan tin mas sintoma di depresion. Anto ta parce cu esaki ta afecta mucha muher mas tanto cu e ta afecta mucha homber.”

Con mayor por proteha nan yiunan for di e peligernan ey? Bijbel ta duna conseho practico.

Loke abo como mayor por haci

Keda pendiente di bo yiunan. Un mayor mester analisa e riesgonan di uza red social y dicidi si su yiunan por uza red social of no.

Principio di Bijbel: “Siña un mucha cana den e caminda cu e mester cana.”—Proverbionan 22:6.
Pa haya sa mas, lesa e articulo: “Ta Bon Idea pa Mi Yiunan Uza Red Social?”

Si bo dicidi di laga bo yiunan uza red social, sea consciente di e posibel peligernan y sa loke bo yiunan ta haci online. Con bo por haci esey?

Proteha bo yiunan di cos online cu por haci nan daño. Entrena bo yiunan pa reconoce e cosnan online cu por haci nan daño y yud’e evita nan.

Principio di Bijbel: “No menciona fornicacion ni ningun sorto di impureza ni golosidad mes meymey di boso, ... ni comportacion bergonsoso ni papiamento di disparate ni chansanan vulgar.”—Efesionan 5:3, 4.
Pa conseho practico, lesa e articulo: “Siña Bo Yiunan Teenager Tocante e Peligernan di Red Social.”

Pone limite. Por ehempel, pone regla pa asina bo yiunan por sa ki ora nan por subi red social y con largo nan por keda riba dje.

Principio di Bijbel: “Paga bon tino pa e manera cu boso ta cana [ta] ... manera hende sabi, uzando boso tempo di e mihor manera.”—Efesionan 5:15, 16.
Uza e video di pintamento riba borchi Usa Ret Sosial na un Manera Sabí pa yuda bo yiunan compronde dicon mester pone limite na uzo di red social.