Siña Hende Scucha Dios
1. Cua ta e dos foyetonan cu nos a haya na e Congreso di Districto “Laga e Reino di Dios Bin!”, y dicon nan ta asina practico?
1 Na e Congreso di Districto “Laga e Reino di Dios Bin!”, nos a haya dos foyeto nobo: Scucha Dios y Biba pa Semper y su version simplifica, Scucha Dios. Debi cu nan no tin hopi informacion, nan ta facil pa traduci. De echo, ora e foyeto Scucha Dios y Biba pa Semper a sali na Ingles, ya a duna aprobacion pa traducie na 431 idioma.
2. Ken lo beneficia di e foyetonan aki?
2 Ken lo beneficia mas di e foyetonan aki? Tuma nota di algun situacion cu sa presenta rond mundo:
• Un publicador ta ripara den su combersacion cu un doño di cas, sea durante e prome bishita of un rebishita, cu e persona ta analfabeto of no por lesa bon.
• Un publicador ta predica den un teritorio caminda e hendenan ta papia un idioma den cua nos no a traduci ningun of masha poco literatura. Of kisas mayoria di e hendenan no por lesa e idioma cu nan ta papia.
• Un publicador ta uza idioma di seña pa predica na hende sordo den su teritorio.
• Un mayor kier siña su yiu cu no sa lesa ainda e berdad.
3. Cua ta algun rasgo di e foyeto Scucha Dios?
3 Rasgonan di e Foyetonan: E foyeto Scucha Dios no tin hopi cos skirbi. Por lo general, na pia di cada pagina bo ta haya un frase simpel y un texto di Bijbel cu ta resalta e puntonan principal. Imagina cu un hende ta ofrece bo un foyeto den un idioma cu bo no por lesa; kisas hasta e letternan ta desconoci pa bo. Abo lo ta interesa den un foyeto asina, hasta si e tin plachi bunita? Probablemente cu no. Asina tambe, hende cu no por lesa no ta interesa den publicacion cu tin hopi cos skirbi. Pesey, loke mas ta resalta den e foyeto Scucha Dios ta su plachinan debidamente prepara. Riba cada pagina tin flecha cu ta guia bo di un plachi pa otro.
4. Menciona algun rasgo di e foyeto Scucha Dios y Biba pa Semper.
4 Scucha Dios y Biba pa Semper tin e mesun plachinan cu Scucha Dios. A prepar’e pa studia cu hende cu no por lesa bon of cu awor a cuminsa siña lesa. Si nos ta conduci un estudio den Scucha Dios, nos por uza e foyeto Scucha Dios y Biba pa Semper como guia. Cada les ta consisti di dos pagina. Te ariba na comienso di cada les tin un pregunta cu ta haya contesta riba e paginanan ey. E plachinan tin splicacion y textonan di Bijbel. Te abou riba mayoria di e paginanan tin un cuadro cu algun punto y texto di Bijbel adicional cu nos por trata cu e studiante, di acuerdo cu su habilidad.
5. Ki ora y con nos por ofrece e foyetonan aki?
5 Con Nos Por Uza Nan: Den sirbishi di cas pa cas nos por ofrece cualkier un di e foyetonan aki si nos ta sinti cu esey ta practico, hasta ora nan no ta e oferta di luna. (Wak e cuadro “Con Nos Por Ofrece Nan.”) Ora nos rebishita un persona, nos por djis bis’e cu nos tin algo p’e y dun’e e foyeto.
6. Con nos por uza e foyetonan aki pa conduci un estudio di Bijbel?
6 Como cu e foyeto Scucha Dios no tin pregunta imprimi, e estudio lo no bay den forma di pregunta y contesta manera ta e caso cu e buki Bijbel Ta Siña. Hende di tur cultura ta gusta tende historia. Pesey, uza e plachinan pa conta e studiante e historianan inspira cu tin den Bijbel. Splik’e loke cada plachi ta bisa. Hacie cu entusiasmo y anim’e pa e duna su opinion. Lesa e textonan di Bijbel cu tin na pia di pagina y rasona cu ne riba nan. Hacie pregunta p’e participa y pa haci sigur cu el a compronde. Si e persona ta uza e foyeto Scucha Dios y Biba pa Semper, lesa hunto cu ne e informacion y texto di Bijbel corespondiente segun cu boso ta trata cada plachi.
7. Con nos por yuda nos studiante di Bijbel progresa?
7 Yuda e Studiante Progresa: Nos ta spera cu e estudio lo duna e persona gana di siña lesa pa asina e mes siña conoce Jehova. (Mat. 5:3; Juan 17:3) Pesey, si e estudio ta for di Scucha Dios, cu tempo kisas nos por yuda e persona siña lesa y cuminsa uza e foyeto Scucha Dios y Biba pa Semper. Un cos si, ora un studiante caba di studia un foyeto, ainda e no ta cla pa boutismo. Pa e boutisa, e tin cu studia e buki Bijbel Ta Siña of un otro publicacion p’e haya un comprondemento mas amplio di Bijbel.
8. Pakico nos ta gradicido pa e foyetonan nobo aki?
8 Hende cu kier biba pa semper mester scucha e Soberano di universo. (Isa. 55:3) Y Jehova su boluntad ta pa “tur sorto di hende”, incluso esnan cu no por lesa, siña scuch’e. (1 Tim. 2:3, 4) Nos ta gradicido pa e hermentnan nobo aki cu nos por uza pa siña hende scucha Dios!
[Cuadro na pagina 3]
Con Nos Por Ofrece Nan
Mustra e doño di cas pagina 2 y 3, anto puntr’e: “Lo bo kier biba den un mundo asin’aki? [Permiti e persona contesta.] Bijbel [of, e buki santo aki] ta priminti cu pronto Dios lo haci tera un luga bunita y pacifico, caminda lo no tin pobreza ni maleza. Mira kico nos tin cu haci pa biba eyden. [Lesa Isaias 55:3, cu ta cita parti ariba na pagina 3.] E texto ta bisa nos pa ‘bin cerca’ Dios y ‘scuch’e.’ Pero con nos por scucha Dios?” Bay na pagina 4 y 5 y trata e contesta cu ne. Si e persona no tin tempo, lag’e cu e foyeto y traha un afspraak pa bolbe y trata e contesta.