Dios Ta Stima Hende Limpi

1-3. (a) Dicon un mama ta percura pa su yiu ta limpi y presentabel? (b) Dicon Jehova kier pa su sirbidornan ta limpi, y kico ta motiva nos pa keda limpi?

UN MAMA ta preparando su yiu pa sali. E ta haci sigur cu e yiu a baña y cu su pañanan ta limpi y presentabel. E sa cu higiena ta masha importante pa salud di su yiu. Ademas, e sa cu e apariencia di su yiu ta determina kico hende lo pensa di nan como mayor.

² Jehova, nos Tata celestial, kier pa su sirbidornan ta limpi. Su Palabra ta bisa: “Na e hende puro [of limpi] bo ta mustra bo mes puro [of limpi].”a (Salmo 18:26) Dicon Jehova ta insisti riba esaki? Di prome, pasobra e ta stima nos y e sa cu limpieza ta bon pa nos mes. Di dos, pasobra e impresion cu nos como su Testigonan ta duna otro hende ta determina si hende lo pensa bon di dje. Si, nos apariencia limpi y nos bon conducta lo trece gloria, no reproche, pa Jehova y su nomber santo.​—Ezekiel 36:22; 1 Pedro 2:12.

³ Kico ta motiva nos pa keda limpi? Pa cuminsa, nos sa cu Dios ta stima hende limpi. Ademas, nos ta stim’e y pesey nos kier honr’e cu e manera cu nos ta biba. Tambe nos kier keda den su amor. Pues, laga nos analisa algun aspecto di limpieza of pureza: dicon e ta necesario, kico e ta encera y con nos por keda limpi. Esaki por yuda nos mira den ki areanan kisas nos tin cu mehora.

DICON NOS MESTER KEDA LIMPI?

4, 5. (a) Kico ta e motibo principal cu nos mester keda limpi? (b) Con creacion ta demostra cu limpieza ta importante pa Jehova?

⁴ E motibo principal cu nos mester keda limpi ta pasobra nos ta adora un Dios cu ta puro, limpi y santo den tur sentido. (Levitico 11:​44, 45) Jehova ta siña nos pa medio di su ehempel. Pesey, su Palabra ta anima nos pa “imita Dios.”​—Efesionan 5:1.

⁵ Jehova su pureza, mescos cu hopi di su cualidadnan y su manera di actua, ta bisto den creacion. (Romanonan 1:20) Por ehempel, el a traha planeta Tera como hende su hogar y a diseña medionan pa tene e cas ey limpi. El a establece cierto ciclo ecologico cu ta purifica nos aire y nos awa. Ademas, el a crea cierto microbio cu ta fungi manera un departamento di limpieza; nan ta transforma desperdicio den substancia inofensivo. Nan ta haci nan trabou asina eficaz cu cientificonan ta uza algun di e microbionan hambra ey pa limpia derame di petroleo y otro polucion causa pa golosidad y egoismo humano. Pues, ta bisto cu pa Jehova, Esun cu “a traha tera”, limpieza ta sumamente importante. ( Jeremias 10:12) Asina mester ta pa nos tambe.

6, 7. Con e Ley di Moises a mustra bon cla cu tur sirbidor di Jehova mester keda limpi?

⁶ Un otro motibo pakico nos mester keda limpi ta pasobra Jehova, nos Señor Soberano, ta exigi limpieza di su sirbidornan. Bou di e Ley cu Jehova a duna Israel, limpieza y adoracion tabata inseparabel. E Ley a bisa specificamente cu riba Dia di Expiacion e sumo sacerdote mester a baña, no un, sino dos biaha! (Levitico 16:​4, 23, 24) Sacerdotenan mester a laba nan man cu pia prome cu nan ofrece sacrificio na Jehova. (Exodo 30:​17-21; 2 Cronicanan 4:6) E Ley a menciona tambe rond di 70 situacion cu a haci un ­Israelita fisicamente impuro of impuro pa ceremonia religioso. Un Israelita den tal condicion no tabatin mag di participa den ningun aspecto di adoracion; si el a hacie toch, den algun caso e por a haya castigo di morto. (Levitico 15:31) Ademas, e Ley a establece un procedura di purificacion cu a inclui cu e persona mester a baña su curpa y laba su paña. Ken cu a nenga di haci esey mester a “wordo corta kita for di meymey di e asamblea.”​—Numbernan 19:​17-20.

⁷ Aunke nos no ta bou di e Ley di Moises, e ta duna nos un idea di kico Dios ta pensa di cierto asunto. Ta bisto cu e Ley a enfatisa cu limpieza tabata un condicion indispensabel pa hende cu ta adora Dios. Jehova no a cambia. (Malakias 3:6) Nos adoracion ta aceptabel p’e solamente si e ta “limpi y sin mancha.” (Santiago 1:27) Pues, ta bon pa nos analisa kico precies esaki ta encera.

KICO KEDA LIMPI DEN BISTA DI DIOS TA ENCERA?

8. Ki tipo di pureza Jehova ta spera di nos?

⁸ Den Bijbel, limpieza no ta limita na cosnan fisico. Mas bien, Bijbel ta indica cu pa nos ta limpi den bista di Dios, nos mester ta puro den tur aspecto di nos bida. Jehova ta spera pa nos demostra cuater tipo di pureza: spiritual (of, den adoracion), moral, mental y fisico. Laga nos wak kico cada un ta encera.

9, 10. Kico adoracion limpi ta encera, y kico cristian berdadero ta evita?

⁹ Adoracion limpi. Esaki ta nifica cu nos no ta mescla religion berdadero cu religion falso. Ora e Israelitanan a sali for di Babilonia pa regresa Jerusalem, nan tabatin cu obedece e siguiente mandato di Dios: “Bay for di eynan, no mishi cu nada impuro; . . . purifica boso mes.” (Isaias 52:11) E Israelitanan a bay bek principalmente pa restaura e adoracion di Jehova. Pues, e adoracion ey mester tabata limpi, sin nada cu a deshonra Dios, manera e siñansa-, practica- y custumbernan di religion babilonico.

¹⁰ Awe, nos como cristian berdadero mester tene cuidou pa nos no contamina nos mes cu adoracion falso. (1 Corintionan 10:21) E influencia di religion falso a plama asina tanto cu nos tin cu paga bon tino pa e no afecta nos. Den hopi pais, varios tradicion, rito y actividad di tur dia ta conecta cu doctrina pagano, por ehempel, tin e creencia cu nos alma ta keda na bida despues cu nos muri. (Eclesiastes 9:​5, 6, 10) Sinembargo, cristiannan berdadero no kier participa den ningun custumber liga cu creencia religioso falso.b Pesey, nos lo no laga hende presiona nos pa bay contra e normanan di Bijbel pa adoracion limpi.​—Echonan 5:29.

11. Kico pureza moral ta encera, y dicon ta masha importante pa nos keda limpi den e aspecto aki?

¹¹ Pureza moral. Pa nos keda limpi den sentido moral, nos mester evita, entre otro, tur tipo di inmoralidad sexual. (Efesionan 5:5) Esaki ta masha importante. Manera nos lo mira den e siguiente capitulo di e buki aki, nos mester “huy di fornicacion” pa nos por keda den e amor di Dios. Hende cu ta comete fornicacion y no ta arepenti “lo no ricibi e Reino di Dios.” (1 Corintionan 6:​9, 10, 18) Den bista di Dios, hende asina ta “impuro y repugnante.” Si nan no purifica nan mes den sentido moral, “nan pago lo ta . . . e di dos morto.”​—Revelacion 21:8.

12, 13. Ki efecto loke un hende ta pensa tin riba loke e ta haci, y con nos por keda mentalmente limpi?

¹² Pureza mental. Loke un hende ta pensa ta pon’e actua. Si nos permiti mal pensamento cria raiz den nos mente y curason, tardi of trempan nos lo comete un acto impuro. (Mateo 5:28; 15:​18-20) Pero si nos yena nos mente cu pensamento limpi y positivo, esey lo motiva nos pa keda comporta nos mes na un manera puro. ( Filipensenan 4:8) Con nos por keda mentalmente limpi? Pa cuminsa, nos tin cu rechasa tur forma di diberticion cu por susha nos mente.c Ademas, nos por yena nos mente cu pensamento limpi si nos ta studia e Palabra di Dios tur dia.​—Salmo 19:​8, 9.

¹³ Pues, pa nos keda den e amor di Dios, ta masha importante pa nos mantene pureza spiritual, moral y mental. Otro capitulonan di e buki aki lo analisa e tres tiponan di pureza aki mas a fondo. Pero, laga nos ban analisa awor e di cuater tipo: pureza fisico.

CON NOS POR KEDA FISICAMENTE PURO?

14. Dicon pureza fisico no ta djis un asunto personal?

¹⁴ Ta masha importante pa nos tene nos curpa y e ambiente rond di nos limpi. Pero tin hende ta pensa cu esey ta un asunto personal y cu ningun hende no tin derecho di mete den esey. Pero un sirbidor di Jehova no mag di pensa asina nunca. Manera nos a menciona caba, ­pureza ­fisico ta importante pa Jehova, no solamente pasobra esey ta bon pa nos mes, sino tambe pasobra nos limpieza ta ­determina kico hende ta pensa di dje. Corda riba e ilustracion di e mucha den e prome paragraf. Si tur ora bay bo ta mira e ­mucha ey tur sushi of con cu ta bisti, lo bo no cuminsa puntra bo mes ta ki sorto di hende su mayornan ta? Asina tambe, nos lo no kier pa nada di nos apariencia of di nos manera di biba trece reproche riba nos Tata celestial of duna un mal impresion di e mensahe cu nos ta predica. E Palabra di Dios ta anima nos pa nos tin e mesun actitud cu Pablo. El a skirbi: “Nos no kier haci nada cu ta duna otro hende motibo pa trompica, pa hende no critica nos sirbishi; ma den tur sentido nos ta recomenda nos mes como sirbidor di Dios.” (2 Corintionan 6:​3, 4) Pues, con nos por keda puro of limpi den sentido fisico?

15, 16. Kico ta algun bon custumber di higiena, y den ki condicion nos pañanan mester ta?

¹⁵ Nos higiena personal y apariencia. Aunke cultura y condicion di bida di cada pais ta diferente, nos tur, por lo general, tin suficiente awa y habon pa baña regularmente y pa percura pa nos y nos yiunan ta limpi. Un bon custumber di higiena ta pa laba man cu awa cu habon, sea prome cu come of atende cu cuminda, of despues di bay w.c. of despues di limpia curpa di un baby of cambia su bruki. Labamento di man cu awa cu habon por preveni maleza y hasta salba bida. E por stroba virus y bacteria di plama, y asina ta preveni cu hende ta haya maleza cu ta causa diarea. Den paisnan caminda casnan no tin beerput ni sistema di riolering, kisas nos por dera nos sushi, manera nan tabata haci den Israel di antiguedad.​—Deuteronomio 23:​12, 13.

¹⁶ Tambe nos tin cu laba nos pañanan cu regularidad pa nan ta limpi y presentabel. Pa un cristian, e cos mas importante no ta cu nan paña mester ta caro of di ultimo moda, sino limpi, nechi y modesto. (1 Timoteo 2:​9, 10) Na unda cu nos ta, nos kier pa nos apariencia “dorna e siñansa di nos Salbador, Dios.”​—Tito 2:10.

17. Dicon nos cas y nos pertenencianan mester ta limpi y presentabel?

¹⁷ Nos cas y pertenencianan. Podise nos cas no ta grandi ni luhoso, pero e mester ta mas limpi y presentabel posibel si. Mescos mester ta e caso cu nos auto, vooral si nos ta uz’e pa bay reunion y sirbishi di veld. Nos mester haci nos best pa e ta limpi, paden y pafo. No lubida cu ora nos cas y nos pertenencianan ta limpi, esey riba su mes caba ta duna un bon testimonio. Al fin y al cabo, nos ta siña hende cu Jehova ta un Dios limpi, cu pronto lo e “caba cu esnan cu ta caba cu e tera” y cu su Reino lo transforma e tera den un paradijs. (Revelacion 11:18; Lucas 23:43) Pues, nos lo kier pa hende mira na nos cas y nos pertenencianan cu for di awor nos ta desaroyando bon custumber di limpieza cu lo pas den e mundo nobo binidero.

18. Con nos por mustra respet pa nos Salon di Reino?

¹⁸ Nos luga di adoracion. Nos amor pa Jehova ta motiva nos pa mustra respet pa nos Salon di Reino, e luga central pa adora e Dios berdadero den nos area. Ora hende nobo bishita nos salon, nos kier pa nan haya un bon impresion di nos luga di reuni. Pues, pa e salon por keda den bon estado ta necesario pa nos tin un programa di limpieza y di mantencion regular. Nos ta mustra respet pa nos Salon di Reino ora nos ta haci loke nos por pa manten’e. Ta un privilegio cu nos por ofrece nos tempo pa yuda limpia, “restaura y drecha” nos luga di adoracion. (2 Cronicanan 34:10) E mesun principionan ta conta ora nos ta reuni na un Salon di Asamblea of cualkier otro luga caminda nos ta tene asamblea of congreso.

EVITA TUR COS CU POR HACI NOS IMPURO

19. Pa mantene pureza fisico, kico mas nos tin cu evita, y con Bijbel ta yuda nos den esaki?

¹⁹ Kico mas pureza fisico ta encera? Nos tin cu evita tur loke ta contamina nos curpa, manera humamento, bebemento di mas y uzo no medico di substancianan cu ta causa adiccion of cu ta cambia bo estado di animo of bo capacidad di pensa. Bijbel no ta menciona specificamente tur bicio y practica impuro y repugnante cu ta comun den e mundo awe, pero e ta contene si algun principio cu por yuda nos compronde kico Jehova ta pensa di e cosnan ey. Unabes nos sa kico ta Jehova su punto di bista, nos amor p’e ta motiva nos pa sigui e caminda cu tin su aprobacion. Laga nos considera cinco principio biblico.

20, 21. Jehova kier pa nos ta liber di ki tipo di practica, y ki bon motibo nos tin pa haci esey?

²⁰ “Como cu nos tin e promesanan aki, rumannan stima, laga nos limpia nos mes di tur impureza di carni y di spirito y, den temor di Dios, perfecciona nos santidad mas ainda.” (2 Corintionan 7:1) Jehova kier pa nos ta liber di practicanan cu ta contamina nos “carni” (es decir, nos curpa) y cu tin un mal influencia riba nos “spirito” (es decir, nos actitud of manera di pensa). Pesey nos tin cu evita tur loke ta causa adiccion y cu ta perhudica nos salud mental y fisico.

²¹ Bijbel ta duna nos un bon motibo pa “limpia nos mes di tur impureza.” Tuma nota cu 2 Corintionan 7:1 ta cuminsa cu e palabranan: “Como cu nos tin e promesanan aki.” Cua promesanan? Manera e versiculonan mas prome ta bisa, Jehova a priminti: “Lo mi ricibi boso. Y lo mi ta un tata pa boso.” (2 Corintionan 6:​17, 18) Figura bo! Jehova ta priminti cu e lo cuida bo y stima bo manera un tata ta stima su yiunan. Pero Jehova lo cumpli cu e promesanan aki bou di un condicion: Bo mester evita “tur impureza di carni y di spirito.” Pues, lo ta masha bobo di nos parti si nos mester laga cualkier bicio cu ta repugnante den bista di Jehova stroba nos di por tin un relacion asina precioso y intimo cu ne!

22-25. Menciona algun principio biblico cu por yuda nos evita bicio- y practicanan impuro.

²² “Stima Jehova bo Dios cu henter bo curason, cu henter bo alma y cu henter bo mente.” (Mateo 22:37) Hesus a splica cu e mandamento aki ta esun di mas grandi. (Mateo 22:38) Jehova merece pa nos stim’e cu henter nos curason, alma y mente. Pero pa nos por haci esey, nos tin cu evita practicanan cu por haci nos bida mas cortico of cu por afecta e capacidad di pensa cu Dios a duna nos.

²³ “[Jehova] ta duna tur hende bida, rosea y tur cos.” (Echonan 17:​24, 25) Como cu bida ta un regalo di nos Dios stima, nos ta trata bida cu masha respet. Pues, nos ta evita tur practica cu ta perhudica nos salud, ya cu nos sa cu e cosnan ey ta indica un gran falta di respet pa e regalo di bida.​—Salmo 36:9.

²⁴ “Stima bo prohimo mescos cu bo mes.” (Mateo 22:39) Hopi biaha, e persona cu tin un bicio of cu ta sigui un practica impuro no ta perhudica su mes so, sino tambe hende rond di dje. Por ehempel, huma di sigaria ta afecta tur hende cu ta rond di e humado. Un persona cu ta perhudica e hendenan rond di dje ta kibra e ley di Dios cu ta manda nos stima nos prohimo, y alabes e ta demostra cu en realidad e no ta stima Dios.​—1 Juan 4:​20, 21.

²⁵ “Sigui recorda e rumannan pa nan ta sumiso, obediente na gobierno y autoridad.” (Tito 3:1) Den hopi pais, uzo y posesion di droga ta ilegal. Pues, como cristian berdadero, nos ta percura pa nos no tin droga den nos poder ni uza droga.​—Romanonan 13:1

26. (a) Kico nos tin cu haci pa nos keda den e amor di Dios? (b) Dicon no tin nada mas mihor cu hiba un bida limpi den bista di Dios?

²⁶ Pa keda den e amor di Dios, nos mester ta limpi, no den un of dos aspecto so, sino den tur aspecto di nos bida. No ta facil pa stop cu un bicio of practica impuro y keda leu for di dje, pero e ta posibel si.d De echo, no tin nada mas mihor cu hiba un bida limpi, ya cu Jehova semper ta siña nos pa nos mes bon. (Isaias 48:17) Es mas, si nos hiba un bida limpi, nos por tin e satisfaccion di sa cu nos manera di biba ta duna un bon testimonio di e Dios cu nos ta stima, y asina nos ta keda den su amor.