Scucha y Siña
1. Dicon nos tin cu haci extra esfuerso pa por scucha y siña na un congreso di districto?
1 Pronto e congresonan di districto di 2013 lo cuminsa. Nos rumannan a haci hopi esfuerso pa prepara un programa cu ta trata e necesidadnan actual di hende rond mundo. Bo a traha bo plannan caba pa asisti na tur e tres dianan di congreso? Na congresonan grandi por tin hopi distraccion, y e sesionnan ta mas largo cu nos reunionnan di congregacion. Pesey nos mester haci extra esfuerso pa concentra y presta bon atencion na e programa. Ademas, e echo cu kisas nos tin cu core distancianan largo y otro factornan tambe por laga nos keda un poco cansa. Kico por yuda nos keda alerta pa asina nos por scucha y siña?—Deu. 31:12.
2. Kico nos por haci pa prepara nos curason pa e congreso?
2 Prome Cu e Congreso: Riba nos website oficial, www.jw.org, bo por haya e programa di congreso cu ta contene tema di cada discurso hunto cu un of dos texto clave. Si nos tin acceso na Internet, nos por wak e puntonan aki di antemano pa asina nos por prepara nos curason pa e instruccionnan cu nos lo haya. (Esd. 7:10, NW) Dicon no analisa e programa di congreso durante boso anochi di Adoracion Como Famia pa crea expectativa pa e binidero congreso?
3. Kico nos por haci pa nos scucha cu atencion?
3 Durante e Programa: Si bo tin cu bay baño, haci esaki prome cu e sesion cuminsa. Paga bo telefon celular pa evita cu un yamada of mensahe por drenta y distrai bo, y pa bo no cay den tentacion di manda mensahe durante e programa. Si bo telefon tin cu keda cendi, program’e di tal manera cu e no ta kita atencion di esnan presente si acaso un yamada drenta. Si bo tin un “tablet”, uz’e na un manera cu no ta distrae otro hende. Evita di come of bebe durante e programa. (Ecl. 3:1) Keda cu bo bista riba e orador, y ora e lesa un texto, sigui e lesamento den bo Bijbel. Haci anotacion cortico.
4. Con mayornan por yuda nan yiunan scucha y siña?
4 Nos kier pa nos yiunan tambe scucha y siña na e congreso. Proverbionan 29:15 ta bisa: “Un yiu laga pa su cuenta ta pone su mama na berguensa.” Pesey, ta bon pa henter e famia sinta hunto pa asina e mayornan por haci sigur cu e yiunan ta presta atencion na e programa en bes di papia, manda mensahe of cana rond. Hasta si e yiunan ta mucho chikito pa compronde tur loke ta ser presenta, nos por siña nan pa keda lanta y sinta keto.
5. Dicon ta bon pa nos repasa e programa y con nos por haci esaki?
5 Cada Dia Despues di e Programa: No keda lanta te laat. Drumi trempan pa bo sosega bon. Ora bo repasa loke bo a scucha, bo tin mas chens di keda cord’e. Pesey, lo ta bon pa como famia boso tuma un par di minuut tur anochi pa papia tocante e programa. Si bo ta bay un restaurant cu algun ruman, bo por bay cu bo anotacionnan anto trece un of dos punto dilanti cu bo a gusta. Despues di e congreso, aparta algun minuut durante boso anochi di Adoracion Como Famia pa analisa con e famia por aplica e informacion. Tambe bo por aparta algun minuut tur siman pa analisa un porcion di e publicacionnan nobo.
6. Dicon no ta suficiente pa djis asisti na e congreso?
6 Nos no por bisa cu nos a beneficia di un bankete si nos no a come y digeri e cuminda. Esey ta e caso tambe cu e bankete spiritual cu nos lo haya na e congreso di districto. Nos por beneficia di dje si nos t’ey na tur e sesionnan, ta scucha atentamente y ta aplica loke nos siña.