E Punto di Bista Biblico

Ken Ta Miguel e Arcangel?

SEGUN Bijbel, tin miyones di angel ta biba den e region spiritual. (Daniel 7:9, 10; Revelacion 5:11) E Scritura, for di cuminsamento te fin, ta referi cientos di biaha na angelnan cu a keda fiel na Dios. Sinembargo, ta dos di e criaturanan spiritual aki so ta ser menciona pa nomber. Uno ta angel Gabriel, kende personalmente a entrega mensahe for di Dios na tres diferente persona durante un periodo di mas o menos 600 aña. (Daniel 9:20-22; Lucas 1:8-19, 26-28) E otro angel menciona pa nomber den Bijbel ta Miguel.

Ta obvio cu Miguel ta un angel prominente. Por ehempel, e buki di Daniel ta conta cu Miguel a bringa pa e pueblo di Yehova contra demoñonan malbado. (Daniel 10:13; 12:1) Den Hudas su carta inspira, Miguel ta confronta Satanas den un disputa tocante e curpa di Moises. (Hudas 9) E buki di Revelacion ta mustra cu Miguel ta bringa contra Satanas y su demoñonan y ta saca nan for di shelo. (Revelacion 12:7-9) Bijbel no ta describi ningun otro angel cu tin un poder y autoridad asina grandi riba Dios su enemigonan. No ta un sorpresa anto cu Bijbel apropiadamente ta referi na Miguel como “e arcangel.” E prefiho “arc” ta nifica “hefe”, of “principal.”

E Controversia Tocante e Identidad di Miguel

Religionnan di Cristiandad, y tambe Hudaismo y Islam, tin ideanan contradictorio riba e tema di angel. Algun splicacion ta vago. Por ehempel, The Anchor Bible Dictionary ta bisa: “Kisas tin un solo angel superior y/of un grupo chikito di arcangel (generalmente cuater of shete).” Segun The Imperial Bible Dictionary, Miguel ta e “nomber di un ser sobrehumano, y relaciona cu ne tawatin en general dos opinion contrario, sea e ta e Señor Hesucristo, e Yiu di Dios, of e ta un di e asina yama shete arcangelnan.”

Segun tradicion Hudiu e shete arcangelnan aki ta Gabriel, Jeremiel, Miguel, Raguel, Rafael, Sariel y Uriel. Di otro banda, Islam ta kere den cuater arcangel, esta, Jibril, Mikal, Izrail y Israfil. Catolicismo tambe ta kere den cuater arcangel: Miguel, Gabriel, Rafael y Uriel. Kico Bijbel ta bisa? Tin varios arcangel?

E Contesta di Bijbel

Fuera di Miguel, Bijbel no ta menciona ningun otro arcangel, ni e Scritura no ta uza e palabra “arcangel” na plural. Bijbel ta describi Miguel como e arcangel, y e uzo di e articulo defini “e” na Hudas 9 ta implica cu ta Miguel so ta carga e titulo ei. Pues ta rasonabel pa conclui cu Yehova Dios a delega na un di su criaturanan celestial, na uno so, pleno autoridad riba tur otro angel.

Apart di e Creador mes, ta un solo persona fiel Bijbel ta menciona cu tin angel bou di su control, y esei ta, Hesucristo. (Mateo 13:41; 16:27; 24:31) Apostel Pablo a haci mencion spesifico di “e Señor Hesus” y “su angelnan poderoso.” (2 Tesalonicencenan 1:7) Y Pedro a describi Hesus resucita bisando: “Kende ta na man drechi di Dios, despues di a subi na shelo, despues cu angelnan y autoridadnan y podernan a wordo someti na dje.”—1 Pedro 3:22.

Aunke no tin ningun declaracion den Bijbel cu categoricamente ta identifica Hesus como Miguel e arcangel, tin un texto biblico cu ta conecta Hesus cu e puesto di arcangel. Den su carta na e Tesalonicencenan, apostel Pablo a profetisa: “Señor mes lo baha for di shelo cu un grito [di duna ordo, NW], cu bos di arcangel y cu trompet di Dios; y e mortonan den Cristo lo lanta prome.” (1 Tesalonicencenan 4:16) E texto aki ta describi cu Hesus a asumi su autoridad como e Rei Mesianico di Dios. Sinembargo, e ta papia cu “bos di arcangel.” Ripara tambe cu e tin poder pa lanta morto.

Tempo Hesus tawata riba tera como hende, el a resucita varios hende. Haciendo esei, el a uza su bos pa duna ordo. Por ehempel, ora el a resucita e yiu homber morto di un biuda di e stad di Nain, e di: “Hoben, mi ta bisa bo: Lanta!” (Lucas 7:14, 15) Despues, djis prome cu el a resucita su amigo Lazaro, Hesus “a yama na bos halto: ‘Lazaro, bin pafo!’” (Juan 11:43) Pero na e ocasionnan aki, Hesus su bos tawata di un hende perfecto.

Despues di su mes resureccion, Hesus a ser lanta na “un puesto superior” den shelo como un criatura spiritual. (Filipencenan 2:9, NW) Ya cu e no ta hende mas, e tin e bos di un arcangel. Pesei ora e trompet di Dios a toca e yamada pa “e mortonan den Cristo” ser lanta pa bai shelo, Hesus a expresa “un grito di duna ordo”, e biaha aki “cu bos di arcangel.” Ta rasonabel pa conclui cu ta un arcangel so lo por duna ordo “cu bos di arcangel.”

Ta berdad cu tin otro criaturanan angelical di rango halto, manera serafin y kerubin. (Genesis 3:24; Isaias 6:2) Sinembargo, e Scritura ta señala Hesucristo resucita como e hefe di tur angel: Miguel e arcangel.