Grecia Ta Defende Derechonan Religioso

PA PROME BES, aña pasa, e gobierno Griego a duna Testigonan di Yehova permit pa uza un di su facilidadnan deportivo mas balioso, pa tene un congreso grandi. Ta trata aki di e Sala di Deporte Olimpico cu por carga 20.000 persona. E stadion aire acondiciona aki ta parti di e compleho cu lo wordo uza na aña 2004 pa e Weganan Olimpico na Atenas.

Notabel ta cu na aña 1963 y 1988, e Testigonan a haci areglo pa uza facilidadnan deportivo na Atenas pa nan congresonan. Sinembargo, tur dos biaha autoridadnan a cede na e menasanan di e Iglesia Griego Ortodox y a nenga di laga e Testigonan uza nan.

Un Resultado Diferente

Na luna di februari 2001, e Testigonan a pidi permit pa uza e Sala di Deporte Olimpico, un di e poco facilidadnan cu dak y cu ta suficientemente grandi pa acomoda nan tur. Pero nan tawata puntra nan mes si historia lo ripiti su mes. Manera nan a teme, e prome reaccion di autoridadnan tawata negativo.

Apesar di esei, inmediatamente nan a acerca oficialnan di rango halto cu tin reputacion di ta husto y sin prehuicio. Nan lo ta dispuesto pa defende e derechonan constitucional di adoracion y di reuni trankilamente? Nan lo resisti presion religioso? Nan a hacie, y un decision nobo a anula e rechaso anterior. Esaki a habri caminda pa e Testigonan por a programa nan congreso na e Sala di Deporte pa dia 27 te cu 29 di juli 2001.

Na e mesun momento, autoridadnan a duna permit na e Testigonan pa uza un otro facilidad deportivo controla pa gobierno, e Palacio di Deporte na Tesalonica.

Presion Intenso Ta Fracasa

Segun cu e prome dia di congreso na Atenas tawata acercando, preguntanan inkietante a keda: Autoridadnan lo cumpli cu nan promesa, apesar di presion for di clero ortodox? Y e Testigonan lo por reuni sin intervencion di gruponan malbado?

Iglesia Ortodox no a laga su tactica bieu para, esta, di purba uza su influencia pa interumpi e congreso. Canalnan di television a revela cu clero ortodox a exigi pa nan no haci mencion di e congreso. Sinembargo, na final e esfuerso cu e iglesia a haci no a duna resultado.

Ta un ironia cu Iglesia Ortodox a acusa e Testigonan di ta un religion di secrecia, siendo cu ta net e iglesia ei a purba stroba publico di haya sa loke tawata sosodiendo den e Sala di Deporte. Afortunadamente medionan di comunicacion no a laga cleronan presiona nan. Nan a duna un cobertura amplio y honesto di e congreso.

Ademas, miles di delegado a duna informacion na e publico tocante e congreso y a papia cu nan di nan creencianan. Unda cu nan a bira, por a identifica e delegadonan na e badgenan hel cu nan tawatin bisti. Hopi hende cu no ta Testigo di Yehova a ser invita na e congreso y a bini. Como resultado e asistencia na e Sala di Deporte a aumenta te na 15.760. E congresonan na e Palacio di Deporte na Tesalonica durante e ultimo dos simannan di juli tawatin un asistencia total di 13.173 persona.

Observadonan A Keda Impresiona

Ora cu un multitud di 2.604 boluntario—tur Testigonan di Yehova—a invadi e Sala di Deporte, pa limpia, ferf y prepara pa e congreso, e manager di e stadion a bisa: “Nos a bin aki pa mira cu nos mes bista algo cu nunca a yega di sosode den e luga aki.” Un hende a remarca: “Boso mester uza e luga aki tur aña pa dun’e un renobacion completo.”

Andreas Vardakis, director di asuntonan publico di e Sala di Deporte, a keda impresiona. “Boso a haci e luga aki bunita”, el a bisa. “Nos tin personal pa dirigi e luga. Pero, boso participacion tawata un influencia motivador cu a haci e congreso aki un exito.”

Durante e congreso, despues cu e comisario di polis a realisa cu e no tawatin cu manda hende pa controla e multitud di hende pacifico, el a sclama: “Nunca mi a mira hende asina amabel y ordena!”

Un Punto Sobresaliente di e Congreso

Den e discurso final di e congreso, a wordo anuncia cu e Ministerio Griego di Educacion y Religion Nacional a reconoce Testigonan di Yehova como “un religion conoci.” Ademas, e Ministerio a duna reconocemento oficial na e sede nacional di Testigonan di Yehova na Atenas. En parte e documento di gobierno ta bisa:

“Gobierno ta considera [e] Testigonan di Yehova Cristian como un religion conoci . . . cu tur e beneficionan legal cu esei ta trece cu ne. E articulo ya menciona di e Constitucion ta proteha libertad di adoracion, e metodo y forma di expresa adoracion, y libertad di scohe e metodo di administracion y organisacion di cada iglesia of reunion religioso. E proteccion aki claramente ta conta tambe pa e propiedadnan y facilidadnan di Marousi [e oficina di sucursal di Testigonan di Yehova], un luga sagrado y consagra, dedica na e adoracion di Dios. E facilidadnan ei ta wordo yama Betel, es decir: ‘Cas di Dios.’”

Tanto Testigonan di Yehova como otro hende cu ta na fabor di libertad religioso, ta gradicido pa e desaroyo aki. Nan ta resa pidi cu e desaroyo aki lo tin como resultado, cu hende lo por sigui cu nan bida Cristian di un manera “trankil y keto den tur santidad y dignidad.”—1 Timoteo 2:1, 2.

[Plachinan na pagina 28]

Testigonan reuni na e Sala di Deporte Olimpico

[Reconocemento]

Harry Bilios