Con Safe Tapijt Ta?

CUANTO tempo bo ta pasa den luganan cera, cu tin tapijt wall-to-wall? Un informe den e revista New Scientist ta indica cu e contesta por ta un asunto di precupacion, specialmente pa mucha.

E revista a comenta: “Den ambientenan cera nos ta ser expone entre 10 pa 50 biaha mas tanto na mayoria elemento venenoso cu ta causa contaminacion cu ora nos ta pafo.” John Roberts, un experto di medio ambiente na Merca, ta bisa cu muestranan di stof di tapijt for di casnan tipico por contene nivelnan alarmante di elemento cu ta causa contaminacion. Esakinan ta entre otro, chumbo, cadmio, mercurio, pesticida y e substancianan cu ta causa cancer polychloorbifenylen (PCB) y polycyclische aromatische koolwaterstoffen (PAH).

Segun informe, e pesticidanan cu ta drenta den cas bou di sapato y na pata di bestia di cas por subi e contenido di pesticida den e stof di tapijt y hacie 400 biaha mas tanto. Expertonan ta bisa cu e elementonan venenoso aki ta keda pa hopi aña. Como cu pesticida y PAH ta substancianan cu ta vapora lihe, nan ta zweef rond y despues ta baha riba tapijt y otro superficie.

Hopi bes mucha chikito ta hunga riba flur y despues ta hinca nan dede den boca. Pesei nan ta mas vulnerable pa elementonan venenoso. Como cu mucha chikito su metabolismo ta traha mas halto cu di hende grandi, aunke nan ta pisa menos, nan ta hala hopi mas aire aden cu hende grandi.

Tin investigado ta puntra nan mes si no ta e aumento di tapijt den luganan cera por ta contribuyendo na e aumento di asma, alergia y cancer cerca mucha. Roberts ta remarca: “Un cas cu flur bashi y djis un par di tapijt chikito akiaya, lo tin mas o menos un decimo parti di e cantidad di stof cu bo ta haya den un cas cu tapijt wall-to-wall.”

Roberts ta sugeri cu pa haci tapijt mas safe, bo mester uza un stofzuiger cu un cabes potente. Anto un biaha pa siman, durante un periodo di varios siman, bo ta pasa 25 biaha riba e tapijt denter di un meter y mei for di e entradanan principal. Tambe 16 biaha caminda hopi pia ta pasa y 8 biaha riba e sobra di area cubri cu tapijt.

Despues cu bo completa e procedura simpel aki, lo bo por mantene e nivel di stof abou si tur siman bo pasa cu stofzuiger riba e tapijt mita di e cantidad di biahanan recomenda ariba. Tambe Roberts ta conseha: “Pone un mat diki pa limpia pia na cada entrada di bo cas y limpia bo pianan dos biaha riba dje prome cu drenta paden.”