Guia Confiabel pa Futuro

E ECHO cu numerologia y otro formanan di wak destino no ta confiabel ta nifica cu nos no tin un manera pa haya sa tocante nos futuro? Claro cu no!

Number no por bisa humanidad kico tin den futuro. Pero “e Dios bibo”, kende ta declara “e fin for di principio”, si a hacie. El a haci esaki den su Palabra skirbi, Bijbel. (1 Timoteo 4:10; Isaias 46:10) Ademas, ta e palabra di e Dios bibo “ta capas pa husga e pensamentonan y intencionnan di curason”, no e palabra di expertonan di numerologia. Pues ta E por yuda bo comprende kico ta motiva bo y kico lo duna bo berdadero exito.—Hebreonan 4:12.

Nos Creador, e Autor di Bijbel, ta e unico cu por pronostica futuro cu exactitud. Pasobra E ta Dios Todopoderoso, y semper su palabra tawata confiabel. Yehova Dios a bisa: “Di berdad Mi a papia; di berdad lo Mi cumpli cu ne.” (Isaias 46:11) Despues cu Hosue a hiba e Israelitanan den e Tera Priminti, e por a bisa cu confiansa: “Ni un di e bon promesanan cu SEÑOR a haci na e cas di Israel no a faya; tur a keda cumpli.”—Hosue 21:45; 23:14.

Bijbel ta contene hopi profecia cu ainda tin cu cumpli. Entre nan tin esnan cu ta profetisa di un tempo ora cu Dios lo limpia tur maldad for di riba tera y hacie un paradijs. (Salmo 37:10, 11; Proverbionan 2:21, 22) E futuro ei ta atrae bo? Bo ta kere cu nos Creador tin e sabiduria y e poder pa drecha asuntonan riba e planeta aki? Si ta asina, lo ta bon pa bo considera kico Bijbel ta bisa tocante e futuro di e tera.a

Pesei, uza bo tempo bon awor. No purba wak bo destino den number, mas bien, haci esfuerso pa gana un conocemento exacto di Bijbel y di su profecianan. Testigonan di Yehova ta cla pa yuda bo gana mas conocemento tocante e futuro cu tin revela den e Palabra di Dios, Bijbel.

[Nota]