For di Nos Lectornan

Hobennan Sa Puntra Danki pa e articulo “Hobennan Sa Puntra . . . Dicon Mi Mayor No Stima Mi?” (8 di october 2002) Mi tin 16 aña, y mi no a mira mi tata biologico for di tempo cu mi tawatin 4 aña. E articulo aki a expresa precis con mi ta sinti. Tambe ta berdad loke el a bisa cu no tin casi nada otro cu ta causa un herida emocional mas profundo cu rechaso di un mayor. Danki pa e alimento spiritual aki na ora.

J. J., Merca

Mi mayornan a dicidi di diborcia despues di tin 13 aña separa. Mi no por a compronde dicon esei a pone mi sufri tanto asina, ya cu mi a kere cu mi a supera e trauma ei hopi tempo pasa. Awor cu mi ta compronde pakico mi ta asina tristo mi por ta mas spesifico ora di haci oracion y tira asta e carga aki riba Yehova.

M. D., Italia

Mi tata a bandona mi famia tempo cu mi tawatin seis aña. Djei padilanti e tawatin masha tiki contacto cu mi. Pa hopi aña mi a lucha cu sintimento di culpa. Esei a pone cu nunca mi no tawata bon den comunica mi sintimentonan na otro hende. E experencianan den boso articulo a conmove mi y a yuda mi mira cu no ta mi so ta den e situacion aki. Por fabor no balota e beneficionan cu nos como lector ta saca di e articulonan aki ni con gradicido nos ta pa nan!

A. H., Inglatera

Mi tin 16 aña, y mi tata a caba di diborcia mi mama. Ami, mi ruman homber mas chikito y mi ruman mohe mas grandi a keda hopi kibra. E articulo aki tawata berdaderamente increibel. Manera mi a cuminsa les’e, m’a cuminsa yora. El a describi tur loke mi tawata sinti di paden. E palabranan tawata asina tierno y amoroso. Mas mi a lesa, mas el a conmove mi. Hopi biaha mi a yega di puntra mi mes si realmente mi tawata digno di e amor di mi tata. Ta pesei mi a haya asina hopi consuelo for di e articulo aki. E miho sintimento cu mi por tin ta di sa cu asta si mi tata humano no stima mi, Yehova si semper lo stima mi. Mi no tin cu precupa cu Yehova diripiente lo cambia di idea y bira lomba pa mi.

A. M., Merca

Nos famia a lanta cu un tata alcoholico, y mi mama a sufri hopi. Nos como mucha no a haya masha atencion. Mi tawata sinti cu mi no bal nada y asta a pensa cu ta miho mi muri. Mi a pidi yudansa den mi oracionnan. Ora e articulo aki a sali, mi a keda hopi gradecido. Un pensamento cu a consola mi ta cu asta hende den e situacion aki por scohe un resultado felis y exitoso door di aplica principionan biblico. Mi a realisa cu mi tambe por ta felis!

A. I., Hapon

Oracion Un danki di curason pa e articulo “E Punto di Bista Biblico: Oracionnan Cu Dios Ta Scucha.” (8 di september 2002) E dia cu mi a les’e, mi tawata den un estado hopi deprimi. E palabranan di Isaias 41:10 realmente a fortalece mi. Mi ta masha contento cu Yehova ta fortalece no mi so sino tambe otro hende, y cu e ta scucha tur nos oracionnan y asta nos pensamentonan! Mi tin 20 aña ta biba den un famia dividi pa motibo di religion. Esei no ta facil pasobra riba dje mi tin mas cu 30 aña ta sufri di un malesa cronico. Masha danki mes pa e revistanan maraviyoso aki cu semper ta duna mi e forsa pa sigui padilanti.

D. G., Alemania