Un Gobierno Cu Ta Sostene Dios Su Norma- y Balornan

IMAGINA un mundo cu un solo gobierno pa hende di tur rasa y idioma. Imagina un gobierno conoci pa e echo cu e ta proteha e norma- y balornan di mas eleva y cu a elimina guera, odio, crimen, pobresa, polucion, malesa y asta morto!

‘Fantastico, pero imposibel’, ta bo reaccion kisas. No, e no ta imposibel. De echo, e ta bini sigur. Hesucristo a priminti un gobierno asina. El a siña su siguidonan pidi p’e den oracion: “Pues, haci oracion anto asin’aki: ‘Nos Tata cu ta den shelo, bo nomber sea santifica. Cu bo reino bin. Cu bo boluntad sosode na tera mescos cu den shelo.’”—Mateo 6:9, 10.

Kisas bo tambe sa e palabranan di e oracion ei pasobra miyones di hende rond mundo conoc’e of a tende di dje. Pero bo a yega di analisa kico e palabranan ei en realidad ta encera? Tuma nota cu e Reino ta liga cu e echo cu Dios su boluntad ta sosode na tera. Kico e Reino di Dios ta anto? Y kico ta Dios su boluntad pa nos tera?

Loke e Reino di Dios Ta

Un di e definicionnan di un reino ta un gobierno encabesa pa un rei. E Reino di Dios ta e medio cu Yehova Dios ta uza pa eherce su autoridad supremo den universo. E ta un reinado encabesa pa su Yiu, Hesucristo. Pa loke ta Dios su boluntad pa e tera, e ta ser expresa na un manera cla y simpel na Salmo 37:10 y 11: “Aki poco tempo e malbado lo no t’ei mas; maske cuanto bo busca su luga, e lo no t’ei. Ma e humildenan lo hereda e tera, y lo deleita nan mes den pas abundante.”

Pesei, no desespera pa motibo di e decadencia den norma y balor di e mundo aki, ma cobra animo. Bijbel ta priminti cu pronto e condicionnan di mundo y su norma- y balornan lo pasa den un cambio drastico. E promesa cu e Reino di Dios denter di poco lo reina riba tera pa pone na vigor e norma- y balornan di Dios, ta un garantia cu ta duna nos speransa.

Nos por aumenta nos sentido di siguridad door di siña confia den Dios su promesanan di Reino. Pensa riba e normanan conecta cu e gobernacion di e Reino ei: “Bin, mira e obranan di SEÑOR, kende a haci desolacionnan riba tera. E ta haci gueranan stop te na e fin di tera.” (Salmo 46:8, 9) Ki un maraviyoso promesa di pas y siguridad!

Den un profecia relaciona cu e Rei di e Reino di Dios, Hesucristo, Salmo 72:12-14 ta bisa: “E lo libra esun den necesidad ora cu e sclama pa yudansa, esun aflihi tambe y esun cu no tin ningun hende pa yud’e. E lo tin compasion di e pober y di esun den necesidad, y e lo salba bida di esnan den necesidad. E lo rescata nan bida for di opresion y violencia; y nan sanger lo ta precioso den su bista.”

Norma- y Balornan Biblico

Considera algun di e norma- y balornan cu Bijbel ta promove: “Felis ta esnan cu ta conciente di nan necesidad spiritual.” (Mateo 5:3, NW) Un otro: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.”—Proverbionan 3:5, 6.

Tambe Bijbel ta indica cu nos tur tin cu rindi cuenta pa e normanan cu nos ta scohe pa sigui den bida. Wak Eclesiastes 11:9: “Regociha, hoben, durante di bo hubentud, y laga bo curason tin placer durante di e dianan di bo adolecencia. Y sigui e camindanan di bo curason y e deseonan di bo wowo. Ma sabi si cu Dios lo husga bo pa tur e cosnan aki.” Proverbionan 2:21 y 22 ta declara bon cla cu nos tin cu duna cuenta di nos accionnan: “E rectonan lo biba den e tera, y e perfectonan lo keda den dje; ma e malbadonan lo wordo corta kita for di tera, y e traidonan lo wordo ranca for di dje cu raiz cu tur.”

Siendo cu nos tin e speransa alentador aki cu lo bin un gobierno husto, ta masha probechoso pa nos desaroya un amistad intimo cu Dios! Asociacion cu otro hende cu tambe ta desea di ta ciudadano di e Reino di Dios lo yuda nos biba di tal manera cu nos por experencia e gobernacion di su Reino glorioso y e efectonan di e norma- y balornan maraviyoso cu e Reino ei lo promove.

[Plachi na pagina 10]

E humildenan lo “hereda e tera” y “deleita nan mes den pas abundante.”—SALMO 37:11.