Matematica Ta Util pa Tur Hende

MATEMATICA no ta pa cientifico so. E ta pa nos tur. Ora bo ta haci compras, decora bo cas of scucha noticia diario di weer, bo ta uza of beneficia di principionan matematico.

Pero pa hopi hende, matematica (of, wiskunde) ta laf, y segun nan e no tin nada di aber cu nan bida di tur dia. Bo tambe ta pensa asina? Laga nos wak con util, facil pa compronde y fasinante matematica por ta.

Ora Bo Ta Haci Compras

Imagina bo cu bo ta haciendo compras y bo a topa un tremendo baratiyo. Un articulo cu su prijs original tawata 35 florin, tin awor 25 porshento di descuento. Esei ta parce un ganga. Pero kico e prijs nobo ta? Aritmetica (rekenen) ta yuda bo calcula esei.a

Prome, bo ta kita e descuento for di 100 porshento, y bo ta yega na 75 porshento (100 porshento – 25 porshento = 75 porshento). Caba bo ta multiplica e prijs original cu e resultado, den e caso aki 75 porshento (0,75). E prijs nobo lo ta 26,25 (35 × 0,75 = 26,25). Awor cu bo sa e prijs di baratiyo, bo por dicidi si di berdad e ta un ganga.

Con lo bo a calcul’e si bo no tin un calculator hunto cu bo? Podise bo por cont’e for di cabes. Por ehempel, laga nos bisa cu un articulo cu originalmente tawata costa 45 florin tin un descuento di 15 porshento. At’aki un tip pa calcula porsentahe for di cabes. Uza 10 porshento como base. Pa calcula 10 porshento di un cifra, bo ta dividie door di 10. Esei ta basta facil pa haci for di cabes. Anto, como cu bo sa cu 15 ta 10 plus 5 y cu 5 ta precis mita di 10, bo por calcula masha lihe e prijs di baratiyo di e articulo door di agrega y kita afo. Laga nos purba esei.

Como cu 10 porshento di 45 ta 4,50; 5 porshento di 45 ta mita di e suma ei, esta 2,25; y 15 porshento lo ta e total di e dos cifranan ei, esta 6,75 (4,50 + 2,25 = 6,75). Por ultimo, nos ta kita 6,75 for di 45 pa yega na e prijs di baratiyo cu ta 38,25 (45 – 6,75 = 38,25). By the way, bo por uza e mesun metodo pa calcula OB (omzetbelasting) di un articulo of e cantidad di tips cu bo kier agrega na bo cuenta na un restaurant. Claro cu den e casonan ei, en bes di kita afo, lo bo agrega e resultado na e prijs original.

Pero, tene cuidou pa bo no core saca un conclusion robes tocante e porsentahe di e descuento ora bo ta calcula cos for di cabes. Un bisti of carson cu un descuento di 40 porshento y riba dje un descuento adicional di 40 porshento, en realidad a haya solamente 64 porshento di descuento y no 80 porshento. E di dos descuento ta ser calcula riba e prijs reduci, no di e prijs original. Kisas ainda e ta un ganga, pero ta bon pa bo sa e diferencia.

Sinembargo, tin problemanan di matematica cu aritmetica so no por soluciona. Afortunadamente, tin hopi formula mas di matematica disponibel.

Ora di Decora Cas

Laga nos bisa cu bo kier cambia e material di vloer den bo cas y bo tin un budget limita. Prome cu bo bai cumpra e material, bo ta sinta y calcula kico bo tin mester. E pregunta di mas importante ta: Cuanto material di vloer mi tin cu cumpra? Si bo ta compronde algun cos basico di geometria esei por yuda bo.

Hopi bes nan ta bende material pa vloer a base di e cantidad di meter cuadra cu lo e cubri. Por ehempel, un meter cuadra ta un meter largo y un meter hancho. Prome cu bo por determina cuanto material bo mester, bo tin cu calcula e superficie (oppervlakte) di cada cuarto y di gang di bo cas. Mayoria superficie di cas ta consisti di varios vierkant y rechthoek. Pesei e siguiente formula lo yuda bo calcula esei: s = l × h (superficie ta igual cu largura multiplica cu hanchura). Esaki ta e formula geometrico pa determina e superficie di un rechthoek of un vierkant.

Pa ilustra con ta uza e formula aki, laga nos bisa cu bo ta bai pone un material nobo pa vloer den cada cuarto di cas cu excepcion di cushina y baño. Bo ta midi cada cuarto y ta traha un mapa manera esun cu bo ta mira na pagina 23. E formanan vierkant y rechthoek di e mapa ta mustra e tamaño y luga di cada cuarto. Uzando e formula menciona, wak si bo por calcula cuanto meter cuadra di material lo bo tin mester. Ata un par di sugerencia: Lo bo por calcula e superficie di cada cuarto apart anto caba conta tur e resultadonan hunto. Of bo por spar tempo door di calcula e superficie total di e mapa anto caba desconta e superficie di cushina y baño.b

E palabra “geometria” tambe ta bini di Griego, y ta nifica literalmente “midimento di tera.” E ta encera studiamento di superficie, distancia, volumen y otro caracteristicanan di forma y liña. Tin formulanan util pa tur forma imaginabel di dos of tres dimension. Tur dia, tanto cientificonan como ingenieronan y decoradonan di cas ta uza e formulanan aki pa calcula precis cuanto material nan mester. Pero matematica ta encera hopi mas cu solamente aritmetica y geometria.

Uza Matematica Tur Dia

Otro ramonan di matematica ta entre otro algebra y calculacionnan matematico (differentiaal- en integraalrekening). Atrabes di siglonan matematica a bira un berdadero idioma universal cu tur hende ta comparti, sin importa nan cultura, religion of sexo. Den ciencia, industria, negoshi y bida diario, por uza matematica pa resolve algun di e preguntanan di mas confuso cu tin. Sea cu bo ta purba descubri e misterionan di universo of saca e saldo di bo budget, pa bo tin exito bo mester por compronde e idioma di matematica.

Pesei, maske bo no tawata gusta matematica na scol, dicon bo no ta bolbe consider’e for di un angulo nobo? Mescos cu cualkier idioma, e miho manera pa siña matematica ta door di uz’e. Purba uza un tiki matematica tur dia. Purba soluciona algun puzzel y spel di matematica. Un experencia positivo kisas ta cambia bo opinion di matematica. Siguramente lo e profundisa bo aprecio pa e sabiduria di e Gran Matematico cu originalmente a diseña e conceptonan fasinante aki, esta, nos Creador, Yehova Dios.

[Nota]

[Diagram na pagina 23]

(Pa e teksto den su formato kompleto, wak e publikashon)

⇩ |⇦ 3 m. ⇨|⇦ 3 m. ⇨| |

| | | |

| | | |

| | | |

3 | Cushina | Comedor | Sala |

m. | | | |

| | | |

| | | |

| | | |

⇧⇩ ------------ ------ ------- |

|

1,5 Gang |

m. |

|

⇩⇧ ----------------------- ----- |

| | | |

| | | |

| | | |

3 | | Baño | |

m. | Camber | | |

| | | |

| | | |

| | | |

⇧ |⇦ 4,5 m. ⇦|⇦ 1,5 m. ⇨|⇦ 3 m. ⇦|

[Plachinan na pagina 23]

Matematica por yuda bo haci tareanan di tur dia