Tipnan di un Piloto Experencia pa Ora di Biaha

MI STIMA bulamento cu avion, semper mi a gust’e. Bula cu avion no solamente ta duna bo e libertad di biaha rapidamente di un luga pa otro, sino tambe e ta permiti bo pasa door di nubia riba un dia nubla y subi yega e lus radiante di solo te ayariba. Mi a gusta e sensacion di bula for di mi prome buelo den avion como mucha na aña 1956. Esaki a pone cu mi a sigui un carera como piloto profesional, pero tambe mi a traha un tempo como investigado di accidente di avion.

Con safe bulamento ta? Y ki precaucion bo mester tuma ora bo haya e chens di biaha cu avion?

Precaucionnan pa Haci Bulamento Mas Safe Ainda

Tur aña casi 18.000 avion regularmente ta aterisa y lanta buelo na miles di aeropuerto rond mundo, hibando mas cu 1,6 mil miyon pasahero na nan destinacion. Tur esaki cu masha tiki accidente. De echo, e compania di seguro renombra, Lloyd di Londen, ta calcula cu ta 25 bes mas safe pa biaha cu avion cu pa biaha cu auto. Pues segun estadistica, e parti mas peligroso di bo biahe lo ta ora bo ta den auto ta bai of bini di aeropuerto. Pero toch, bo por tuma un par di precaucion rasonabel ora bo ta bai biaha cu por yuda haci e manera relativamente safe aki di biaha, mas safe ainda.

● Wak bon cua compania bo ta scohe: No ta tur compania di aviacion tin e mesun reputacion di siguridad. Companianan di renombre por lo general ta safe. Nan ta uza avionnan moderno y nan tin bon reputacion debi na nan registro di siguridad y mantencion.

● Wak bon cu ki paña bo ta biaha: Sobrevivientenan di un accidente di avion ta confronta e peliger di candela y huma. Pesei e miho proteccion contra vlam y cayente ta di bisti paña manga largo y un carson pia largo of un saya largo. Paña di tela natural (por ehempel catuna) ta duna bon proteccion, pero material sintetico hopi bes ta dirti of krimp riba bo cuero ora e haya cayente, locual lo por causa kemaduranan mas severo. Paña di cuero tambe por krimp cu cayente y pesei e no ta recomendabel. Tambe bo ta haya miho proteccion si bo tin varios paña bisti riba otro, y paña colo cla ta resisti cayente mas miho cu paña scur. Sapato plaat, preferiblemente cu feter, tin mas chens di keda na bo pia y proteha bo contra corta y kemadura, y meña di lana ta miho cu meña sintetico.

● Scucha e instruccionnan di siguridad: E stewardessnan lo duna bo instruccionnan extenso di siguridad prome cu e avion lanta. Den e caso improbabel di un accidente, lo bo tin cu sali for di e avion uzando loke bo ta corda di e instruccionnan ei cu nan a duna. Pesei scucha e informacion cu sumo atencion. Un encuesta di biaheronan Canades a revela cu ta solamente 29 porshento di pasahero riba un buelo a lesa of wak e carchi di instruccionnan di siguridad. Tuma un poco tempo pa studia e instruccionnan, specialmente esnan cu ta mustra con pa habri e porta- y bentananan di salida, ya cu podise bo ta e prome cu ta yega na nan. Pensa riba con lo bo haya e salida si ta scur of si huma ta stroba bo di mira. Un tecnica simpel ta di conta cuanto rei di stul tin entre caminda bo ta sinta y e salidanan. Anto asina, asta si ta scur, lo bo por haya y habri e salida di emergencia.

● Limita bo ekipahe di man: “Un peliger cu cada bes ta presenta [pa pasaheronan] ta articulonan cu ta cai durante buelonan normal for di e compartimento riba nan cabes cu sea no tawata bon sera of cu e pasaheronan a habri durante buelo, causando lesionnan serio na cabes y asta morto”, segun e revista Flight International. Pues anto no lubida, ekipahe di man mucho pisa por ta un peliger pa siguridad. Pesei, den un situacion di emergencia, laga TUR bo ekipahe atras. Busca manera di scapa bo bida! Lo bo por haya otro ekipahe despues pa remplasa loke bo perde.

Den Caso di un Emergencia

E evacuacion di mas peligroso ta ora tin candela, huma y gas. Un raport di un accidente a declara: “Ora e avion a aterisa, [debi na huma] tawata casi imposibel pa mira kico tawatin den e cabina na mas cu un pia for di suela. E sobrevivientenan a declara cu apenas nan tawatin e forsa y capasidad mental pa yega na e salidanan.” Pa nan a scapa, nan mester a sali lihe for di e avion.

E tripulacion ta entrena pa yuda evacua e avion lihe y safe. Pesei, sigui nan instruccionnan mesora. Sinembargo, cos no ta bai semper segun plan. Problema cu e sistema di zonido, miembronan di tripulacion herida, confusion y e efecto di bochincha, cayente y huma por desbarata e miho esfuersonan di e tripulacion. Kisas e aerolinea cu bo ta bulando cu ne no ta papia bo idioma nativo, y esaki tambe por stroba bon comunicacion entre abo y e tripulacion.

Analisisnan di accidente ta mustra cu bo propio determinacion pa sobrevivi ta un factor clave pa bo por keda na bida durante un emergencia. Bo mester tin un plan di accion bon cla na mente y bo mester ta dispuesto pa tuma responsabilidad pa bo propio sobrevivencia. Bo plan mester inclui esnan cu ta biahando hunto cu bo—specialmente mucha of hende di edad—y tambe e pasonan cu bo kier tuma pa keda hunto pa yuda otro durante evacuacion. E revista Flying Safety ta recomenda: “Si bo tin cu evacua ora tin huma, laga [bo hendenan] tene na otro. Of laga nan tene na bo faha, locual por ta manera un cabuya salbabida.” Bisa bo compañero of compañeronan di biahe kico ta bo plan di accion den caso di un emergencia.

Tur forma di biaha ta carga cierto riesgo, pero avionnan moderno di pasahero ta yuda nos evita hopi peliger y ta permiti nos yega na nos destinacion bon sosega y cla pa traha of recrea. Prepara bo mes pero no ansha. Relaha y disfruta di bo buelo, ami semper ta haci esei.—Contribui.

[Plachi na pagina 31]

Entrenando pa un evacuacion di emergencia

[Plachi na pagina 31]

Scucha e instruccionnan di siguridad