Observando Mundo

Auto Cu Ta Core Riba Desperdicio

Un doño di cunucu na Finlandia awor tin un auto cu ta core riba e gas produci pa desperdicio cu ta den estado di descomposicion. E revista Finlandes Suomen luonto ta informa cu “e auto ta core riba biogas, un combustibel den forma di gas cu ta ser procesa den un planta di biogas cu ta keda riba e tereno di e doño di e auto.” Biogas ta e combustibel di mas limpi cu tin awe, y ya cu por proces’e durante reciclahe di desperdicio e no ta haci daño na medioambiente. De echo, un di e derivadonan di e produccion di biogas ta un fertilisante importante pa agricultura. Autonan cu ya caba ta diseña pa core riba gas natural, mas o menos dos miyon mundialmente, por core riba biogas tambe. Na Suecia hopi bus ta core riba biogas, y ya caba algun pomp di gasolin ta bende biogas, ademas di otro combustibelnan. E articulo ta menciona un ultimo bentaha: “Biogas ta hopi mas barata cu gasolin of diesel.”

Bebemento di Mas Tin Su Consecuencianan

“Na Gran Bretania bebemento di mas serca hende mohe y hobennan a causa un aumento drastico den mortonan relaciona cu alcohol”, e corant di Londen The Independent ta informa. “Durante un periodo di 20 aña, mortonan debi na bebemento di mas a aumenta y bira dobel, y mayoria bes ta trata di casonan di malesa cronico di higra y cirosis.” Compara cu antes e victimanan ta resulta di ta hende mas jong. E raport ta bisa: “Dies aña pasa e edad mas halto di mortonan relaciona cu bebemento di mas tawata setenta y algo, tanto pa hende homber como pa hende mohe. E ultimo cifranan di 1998-2000 ta indica cu e edad mas halto awor a baha te na cincuenta y pico.” Pero no ta malesa so bebemento di mas ta causa. Na Francia, e corant Le Monde ta informa: “Aparentemente alcohol ta directamente responsabel pa entre 10 cu 20 porshento di accidente na trabou.” Ademas, na Francia tur aña 2.700 hende ta ser mata y 24.000 ta keda herida den accidente di auto pa motibo di exceso di alcohol, y alcohol ta envolvi den mas o menos 30 porshento di actonan di violencia. Tambe bebemento di mas ta causa un perdida financiero enorme. Le Monde ta comenta cu na Francia, nan ta calcula cu na 1996 e perdida financiero debi na demasiado consumo di alcohol ta alrededor di 17,6 mil miyon euro (34,6 mil miyon florin).

Stress y Malesa

Basa riba un estudio Hulandes cu a envolve mas cu 8.000 empleado, e Organisacion Hulandes pa Investigacion Cientifico a informa lo siguiente: “Stress na trabou y cansancio ta pone cu hende tin mas chens di haya infeccionnan pisa manera ferkout, grip y inflamacion na stoma of tripa. . . . E estudio ta revela cu serca trahadonan cu trabou exigente tin 20 porshento mas tanto caso di ferkout na comparacion cu trahadonan cu trabou menos exigente.” Otro factornan cu ta pone hende core mas riesgo di haya infeccion ta entre otro trabounan di anochi y insiguridad pa motibo di reorganisacion di compania. Tambe e raport ta bisa: “Trahadonan cu ta traha warda tin mas chens di haya infeccion cu empleadonan cu ta traha den dia.”

Muchanan y Cantamento

Dr. Michael Fuchs, specialista di horea, nanishi y garganta na e Universidad di Leipzig, a skirbi lo siguiente tocante cantamento den e revista Aleman di salu Gesundheit: “E ta un medio importante pa expresa emocionnan cu ta stimula e desaroyo di e personalidad di mucha.” Sinembargo, Fuchs ta lamenta cu “e variacion den tono di stem di mucha claramente a mengua durante e ultimo 20 añanan. Tambe e zonido di nan stem a cambia.” Fuchs ta indica cu posiblemente tin dos motibo. Di prome: “Awendia muchanan ta canta menos na cas. Si antes famianan tawatin custumber di canta y toca hunto den nan tempo liber, awor nan ta sinta hunto dilanti television, y ta disfruta di musica den un manera pasivo so.” Di dos, si e muchanan canta mes, nan tin tendencia di imita e stemnan heers di cantantenan di rock y pop. Fuchs a skirbi: “Muchanan ta exigi demasiado di nan organonan di stem ora nan ta purba imita e artistanan ei.” Esei ta pone nan musculonan di strot y nek bira tenso. Ademas e extra tension por pone nan haya pipita chikito riba nan stemband, anto di e manera ei e calidad di nan stem ta baha.