Cuminda for di Bo Mes Hofi

DI UN ESCRITOR DI SPIERTA! NA REPUBLICA CENTRO AFRICANO

UN PRECUPACION diario di hende den hopi pais ta con nan lo alimenta nan famia. E prijs halto di berdura hopi bes ta haci esei dificil. No obstante, tin hende cu a haya un solucion relativamente simpel: nan ta planta un parti di nan mes cuminda!

Por ta cu bo mes kier purba planta un hofi chikito. Kisas no tin hopi tereno rond di bo cas, pero podise tin tereno den bicindario cu lo bo por haci areglo pa cultiva. Pensa riba cuanto placa lo bo spar door di produci cuminda sabroso y saludabel! Traha den hofi por ta asta un manera pa bo haya e ehercicio cu bo tin mester. Tambe un hofi por ta un proyecto di famia cu bo yiunan lo keda encanta cu ne. De echo, cultiva un hofi di berdura ta educativo. E ta siña bo cualidadnan manera pasenshi. (Santiago 5:7) Ademas, door di mira con matanan ta crece, por hala bo mas serca di e Creador di tur cos bon.—Salmo 104:14.

Pero no kere cu plantamento di bo mes cuminda lo no exigi esfuerso of cu lo bo haya resultado umbes. Sinembargo, cu determinacion y un poco conocemento, bo por tin exito!

E Exito di un Famia

Tuma por ehempel Timothée cu Lucie, un pareha cristian cu dos yiu, cu ta biba na Bangui, capital di Republica Centro Africano. Nan a descubri cu teniendo nan propio hofi tawata un manera practico y agradabel pa suplementa nan entrada humilde.

Tempo cu Lucie tawatin 13 aña, e tawata cultiva un hofi chikito banda di su cas, trahando den dje despues di scol y den fin di siman. E tawata gusta mira su matanan crece. Pero ta despues di hopi aña, el a bin cai riba e idea pa cuminsa un hofi pa su famia. El a haci areglo pa uza un tereno banda di su cas cu tawata sirbi basicamente como luga di benta sushi. Lucie a mira cu por a uza e tereno pa algo util. En bes di ruina e tereno, e desintegracion di sushi atrabes di añanan a crea un tera cu tawata bon pa planta. Lucie cu Timothée a dicidi di comberti e tereno ei den un hofi productivo.

Con pa Cuminsa

Prome cos, nan tawatin cu haci poco investigacion. Nan a papia cu hende cu tawata sa di cultivacion di berdura, y a scucha bon. Como cu e pida tereno tawatin mester di awa, nan a asta siña con pa coba nan propio pos. Un cos tambe cu a yuda tawata cu nan a lesa buki tocante cultivacion di mata.

Nan a lesa tocante con matanan ta influencia otro, y a siña cu algun mata ta yuda otro bona. Sinembargo, tin mata tambe cu eigenlijk ta stroba e crecemento di otro mata. Tin hende ta bisa cu wortel cu tomati ta e socionan ideal den un hofi. Asina tambe, si bo planta selder banda di bloemkool, ambos ta probecha di otro su compania. Y eneldo (dille) ta “amigo” di ert, concomber, lechuga y siboyo. Sinembargo, lechuga blachi berde y peterseli no ta bai bon cu otro. Siboyo lo perhudica sperzieboon y ert. Ora matanan ta perhudicial pa otro, nan ta bira suak y facilmente ta ser ataca pa pest of insectonan dañino.

Timothée cu Lucie a siña tambe cu no ta sabi pa cultiva un solo mata di cosecha riba un pida tereno. Si insecto of malesa ataca e mata ei, nan lo por perde tur cos. Plantando un variedad bon scohi di mata a yuda nan minimisa e riesgo ei. Mata di specerij y flor ta duna color, bida y beyesa na nan hofi di berdura y nan ta atrae abeha y otro insecto util cu ta yuda e hofi keda sano.

Tambe e pareha aki a descubri maneranan pa evita di uza flit venenoso riba nan cosecha. Nan a siña cu door di djis planta conoflok nan por elimina cierto pest for di nan hofi.a

E hofi a exigi hopi trabou pisa y pasenshi, pero awe Timothée cu Lucie tin un hofi cu ta bona. Nan hofi ta produci col, peterseli, tomati, wortel, concomber y berehein, tin biaha mas di loke e famia por uza!

Cultiva Bo Mes Hofi

Pero no ta na Africa so hende a descubri con practico ta pa nan tin nan mes hofi. Por ehempel, na Alemania tin mas cu un miyon pida hofi chikito di loke nan ta yama na Hulandes volkstuin of gemeentetuin den stad. Tin biaha nan ta yama nan Schrebergaerten (na nomber di e docter Aleman Daniel Schreber), y e hofinan aki ta un tereno grandi cu nan ta parti na pida pida (di entre 200 pa 400 meter cuadra) y huur nan cu hende cu ta biba den stad pa nan uza como hofi. Segun un investigado, e hofinan chikito aki “ta hunga un papel importante den produccion di fruta fresco y berdura.” Tambe e hofinan ta sirbi como un pida “paraiso” pa e hardineronan, un luga pa nan traha y relaha.

Bijbel ta priminti cu pronto henter e tera lo ta un hofi, un berdadero paraiso. (Lucas 23:43) Pero mientrastanto, kisas bo por haya un pida tereno y tin e goso di produci cuminda den bo mes pida hofi.

[Nota]

[Plachi na pagina 24]

Timothée cu Lucie sacando awa pa nan hofi di famia

[Plachi na pagina 24]

Un volkstuin na Munich, Alemania