For di Nos Lectornan

Uzo di Droga E portada di e edicion di 8 di april 2003, (“Kico Bo Por Haci si Bo Famia Ta Uza Droga?”) a capta mi atencion. Mi ta studiando Bijbel cu un señora cu yama Linda. Dos yiu homber di dje ta adicto na droga. E siguiente mainta mi a studia e revista ei cu ne, paragraf pa paragraf. E articulonan a dun’e hopi animacion y fortalesa. E informacion a yega na ora.

C. M., Merca

Mi ta dirigi un consultorio cu ta yuda famianan trata cu adiccion na droga y alcoholismo. Aunke mi ta catolico, mi ta un lesado ferviente di Spierta! Mi kier gradici boso pa e serie tocante miembro di famia cu ta uzo droga. Mi a les’e cu sumo atencion, ya cu lo e yuda mi den mi trabou cu hobennan.

H. C., Ecuador

Coco Mi a echt gusta e articulo “Un di e Frutanan Mas Util na Mundo”, den e edicion di 8 di april 2003. Ami cu un amiga ta traha habon como hobi. Nos ta uza azeta di coco den nos habon, ya cu e ta bon pa cuero y ta laga e habon scuma hopi. Despues di e articulo aki, mi a haya mas aprecio ainda pa coco.

C. B., Canada

Mi kier expresa mi aprecio pa e articulo “Un di e Frutanan Mas Util na Mundo.” (8 di april 2003) Resientemente mi a bishita Mexico, y personalmente mi por a mira en berdad pa cuanto cos nan ta uza coco! Mi a mira casi tur e uzonan menciona den e articulo. Un manera mas cu mi a mira nan uza palo di coco ta di corta ramanan for di e palo, kita e blachinan y mara 10 pa 15 di e stengelnan seco y flexibel hunto. Esaki ta un bon cos pa mata muskita cu ne!

D. S. Merca

E articulo aki a pone mi corda hopi riba mi wela, con e tawata traha cup di bebe for di casca di coco durante decada di 1930. Hopi di su biciñanan a traha nan casnan uzando e troncon di palo di coco, y nan daknan tawata traha di rama di coco seco. Mi kier gradici boso pa articulonan asina bunita.

M. B., Merca

Libertad di Expresion Mi a caba di lesa e serie tocante “Corte Supremo Mericano y Libertad di Expresion.” (8 di januari 2003) E articulonan a lanta ola di emocion den mi: asombro pa motibo cu debate riba e topico aki ainda ta tumando luga na Merca; admiracion pa e manera habil cu nos rumannan cristian a presenta nos punto di bista; y profundo aprecio pa e echo cu ainda nan por dicta sentencia husto den e mundo inhusto aki. Mi ta sinti hopi goso ora mi ta participa den e predicacion di e bon nobo. E tipo di articulonan ei ta amplia nos horizonte.

O. S., Belarus