E Punto di Bista Biblico

Kico Kiermen Ser e Cabes di Cas?

SEGUN Bijbel, “e homber ta e cabes di e mohe.” (1 Corintionan 11:3; Efesionan 5:23) Pero hopi hende cu ta bisa cu nan tin respet pa Bijbel, ta haya cu e principio aki di hefatura, esta, cu e homber ta cabes, no solamente ta ouderwets sino tambe peligroso. Un pareha a comenta: “E doctrina cu hende mohe mester ‘somete nan mes cordialmente’ [na nan esposo], por hiba na abuso fisico y tambe emocional si aplic’e na un manera extremo.” Lamentablemente, maluzo di e principio di hefatura ta tuma luga tur caminda. Segun un escritor: “Den hopi pais hende ta considera batimento di mohe como comportacion aceptabel; un derecho masculino cu ta ser elogia den cancion, den dicho y den ceremonianan di casamento.”

Tin hende ta bisa cu ta e principio biblico di hefatura ta responsabel pa e trato of comportacion cruel y violento aki. Pero Bijbel su siñansa di hefatura ta degrada hende mohe y curasha violencia domestico? Kico realmente kiermen ser e cabes di cas?a

Hefatura No Ta Dictadura

E principio biblico di hefatura ta un areglo amoroso y di ningun manera ta igual cu dictadura. Al contrario, ta falta di respet pa autoridad estableci door di Dios a resulta den homber su dominacion hopi bes violento di hende mohe. (Genesis 3:16) For di despues cu hende a wordo saca for di hofi di Eden, homber cu frecuencia a abusa di nan poder y cruelmente a probecha di otro hende, incluso di hende mohe y mucha.

Sinembargo, esei no tawata nunca parti di Dios su proposito. Yehova ta odia hende cu ta abusa di nan autoridad. El a condena e hombernan Israelita cu ‘a trata nan esposanan cu traicion.’ (Malakias 2:13-16) Ademas, Dios ta bisa cu “esun cu ta gusta violencia Su alma ta odia.” (Salmo 11:5) Pues, homber cu ta bati mohe y otro abusadonan di ningun manera por uza Bijbel pa hustifica nan actonan violento.

Cua Ta e Manera Corecto pa Eherce Hefatura?

E principio di hefatura ta un areglo basico cu Dios ta uza pa mantene orden den universo. Tur persona—cu excepcion di Dios—tin cu rindi cuenta na un otro persona. Homber ta someti na Cristo, yiu ta someti na nan mayornan, y tur cristian ta someti na gobierno. Asta Hesus ta someti na Dios.—Romanonan 13:1; 1 Corintionan 11:3; 15:28; Efesionan 6:1.

Pa por tin un sosiedad ordena y stabil ta necesario pa hende somete nan mes na liderato. Di igual manera, sumision na un cabes di cas ta masha importante pa crea un famia solido, felis y trankil. E echo aki no ta cambia, ni maske no tin un esposo of tata den e famia. Den famianan asina, e mama ta bira e cabes di cas. Ora cu un famia no tin ni mama ni tata, e yiu mayo of un otro pariente kisas ta tuma e papel di cabes di cas. Den tur caso, miembronan di famia ta beneficia ora nan ta demostra e debido respet na esun autorisa pa hiba delantera.

Pues anto, e factor importante no ta pa rechasa e principio di hefatura, sino mas bien, pa siña eherce y compronde hefatura corectamente. Apostel Pablo a conseha esposonan cristian pa nan ta cabes di nan famia “mescos cu Cristo tambe ta cabes di e iglesia.” (Efesionan 5:21-23) Asina Pablo a indica cu e manera cu Cristo a trata cu e congregacion ta e norma perfecto pa hefatura. Ki ehempel Cristo a pone?

Aunke Hesus, como Mesias y futuro Rei, tawatin autoridad di Dios y tawata hopi mas inteligente y experencia den bida cu su disipelnan, toch e tawata amoroso, tierno y compasivo. Nunca e no tawata bruto, inflexibel of demasiado exigente. E no a eherce su autoridad na un manera dominante ni corda tur hende constantemente cu ta e tawata e Yiu di Dios. Hesus tawata humilde di curason. Como resultado, ‘su yugo tawata suave y su carga tawata lihe.’ (Mateo 11:28-30) Pesei, Hesus tawata amigabel, facil pa papia cu ne y habri pa rasona. De echo, Pablo a bisa cu Hesus a stima e congregacion asina tanto cu el “a entrega su mes p’e.”—Efesionan 5:25.

Con un Persona Por Imita Hesus Su Hefatura?

Con cabesnan di famia por imita e cualidadnan di Cristo? Un cabes responsabel ta mustra interes den e bienestar fisico y spiritual di su famia. E ta traha duro pa dedica e debido tempo y atencion na nan necesidadnan individual y di henter e famia. E interesnan di su casa y yiunan ta bini prome cu su propio interes.b (1 Corintionan 10:24; Filipensenan 2:4) Door di aplica principio- y siñansanan biblico den su bida diario, e esposo ta gana e respet y sosten di su casa y yiunan. Bou di e esposo su hefatura amoroso, nan esfuersonan uni pa confronta cualkier problema lo por tin exito. Door di eherce su hefatura den un manera biblico, e esposo ta crea un famia felis, uno cu ta funciona pa e gloria y alabansa di Dios.

Un cabes di cas sabi ta humilde tambe. Ora ta necesario, e ta pidi despensa libremente, maske kisas ta dificil pa e admiti cu e tawata robes. Bijbel ta bisa cu tin victoria “den un multitud di conseheronan.” (Proverbionan 24:6) Si, humildad lo motiva un cabes di cas tambe pa scucha y busca di buena gana e opinion di su casa y yiunan ora cu ta apropiado. Door di imita Hesus, un cabes cristian lo haci sigur cu su hefatura no solamente ta trece felicidad y siguridad pa su famia, sino tambe ta honra y glorifica e Originador di famia, Yehova Dios.—Efesionan 3:14, 15.

[Nota]

[Plachi na pagina 26]

Un esposo rasonabel ta tene cuenta cu opinion di su casa y yiunan