“Dr. Livingstone, Mi Ta Supone?”
Di un escritor di Spierta! na Tanzania
“Bou di e palo di mango cu e tempo ei tawata para akinan, Henry M. Stanley a topa David Livingstone, 10 di november 1871.” —Plakkaat na e Monumento Conmemorativo di Livingstone na Ujiji, Lago Tanganyika, Tanzania.
TAWATA mas cu un siglo pasa cu Stanley a expresa e saludo famoso: “Dr. Livingstone, mi ta supone?” Pafo di Tanzania, ta masha tiki hende probablemente lo a compronde e importancia di e encuentro aki.
Pues un bishita na e Museo Conmemorativo di Livingstone na Tanzania lo resulta informativo. Nos guia, Sr. Mbingo, ta duna nos un caluroso bonbini. E ta splica: “Na e sitio caminda nan a lanta e monumento, tawatin un tempo un palo di mango masha grandi, y bou di dje Stanley a topa Livingstone.” Awor tin dos palo enorme di mango einan. Sr. Mbingo a sigui bisa: “Wel, ta asina cu durante e decada di 1920, a bira bisto cu e palo di mango original tawata muriendo. Esfuersonan pa scapa e palo a fracasa. Pesei nan a planta dos palo di mango geenter serca di e monumento.”
Ken Livingstone Tawata?
Segun cu nos a cai sinta den sombra di un di e palonan di mango, Sr. Mbingo ta splica cu David Livingstone a nace na 1813 den un pueblito na Escocia cu yama Blantyre. “Aunke el a lanta den pobresa, el a logra bai scol mientras cu e tawata traha pa mantene su mes y el a haya entrenamento como docter y tambe como misionero.” Nos ta tende cu e Sosiedad Misionero di London a manda Livingstone Africa, caminda el a pasa 30 aña di su bida, y a bira bon conoci como explorado y misionero.
“Dr. Livingstone a bin Africa tres biaha”, nos guia ta conta nos. “El a bin prome biaha na Sur Africa na 1841. Na 1845, Livingstone a casa cu un mucha mohe cu yama Mary Moffat, yiu di un otro misionero, Robert Moffat.” Livingstone tawatin cuater yiu cu Mary. Y maske Mary a compañ’e durante hopi di su biahenan, Livingstone su entusiasmo pa exploracion no a laga mucho tempo pa e dedica na bida familiar. Mary Livingstone a muri di malaria na 1862 mientras cu e tawata compaña su casa durante un di su expedicionnan.
The New Encyclopædia Britannica ta bisa: “Livingstone tawata cla pa avansa cristianismo, comercio y civilisacion—e trinidad cu den su opinion tawata destina pa habri Africa—den direccion nort mas aya di e fronteranan di Sur Africa y te den curason di e continente. Den un declaracion famoso na 1853 el a mustra bon cla kico ta su proposito: ‘Lo mi habri un caminda te den interior, of muri.’” Pues anto, Livingstone su biahenan no tawata puramente evangelico. Fervientemente el a boga pa aboli e traficacion di catibo. Tambe el a bira fasina cu exploracion y a pone como su meta pa descubri e origen di Riu Nilo.
Sinembargo, Livingstone a bin realisa cu e tarea tawata mucho grandi pa e so logr’e. Na 1857, el a bisa un grupo di hoben na e Universidad di Cambridge: “Mi sa cu den un par di aña lo mi muri den e pais ei, cu awor ta habri; no laga nan bolbe ser’e! Mi ta bai Africa bek pa purba habri caminda pa comercio y cristianismo; boso [lo] sigui cu e trabou cu mi a cuminsa? Mi ta lag’e na boso encargo.”
Di tur manera, Livingstone a biaha extensamente door di henter Africa central. Entre otro cosnan, el a descubri e enorme watervalnan di Riu Zambezi, y el a yama nan Victoria Falls, na nomber di Reina Victoria. Despues el a describi e watervalnan como ‘e bista mas maraviyoso cu el a mira na Africa.’
E Buskeda
Nos guia ta splica: “Livingstone su ultimo biahe a cuminsa na 1866. Sinembargo, a surgi problema entre su personal. Algun di su siguidonan a bandon’e y a regresa Zanzibar, caminda nan a plama e rumor cu Livingstone a muri. Pero Livingstone a sigui padilanti. Na Ujiji, na e costa oriental di Lago Tanganyika, el a establece un campamento cu a fungi como base pa su expedicionnan.
Sinembargo na Europa, pa casi tres aña ningun hende no a tende nada di Livingstone. Nan a pensa cu el a muri. Pesei e editor di e corant New York Herald a manda un reportero cu yama Henry Morton Stanley pa haya Livingstone, sea bibo of morto. Naturalmente Livingstone no tawata morto ni perdi. Pero si e tawatin hopi mester di cuminda y otro ekipo y tambe e tawata basta malo. Na november 1871, un di e crianan di Livingstone a core bin na su cas gritando: ‘Mzungu anakuja! Mzungu anakuja!’” Na Suahili esei ta nifica: “Un homber blanco ta biniendo!”
Stanley en realidad a pasa casi ocho luna ta busca Livingstone. Prome el a biaha bai Africa via India, y a yega na e isla di Zanzibar dia 6 di januari 1871. Dia 21 di maart 1871, el a sali for di Bagamoyo, un stad na costa oriental, cu seis ton di cuminda y ekipo y 200 homber den su servicio. E expedicion di 1.500 kilometer atrabes di un area pa cua no tawatin mapa a resulta sumamente peligroso! Awasero pisa a pone e riunan bai over. Stanley cu su hombernan a sufri di malaria, otro malesanan y cansancio. Tur e riunan tawata patapata di crocodil; hororisa Stanley a para mira con un crocodil a lastra un di su ultimo buriconan bai cu ne. Na un otro ocasion, Stanley mes a scapa di baina for di e garanan di un crocodil! Toch Stanley tawata determina pa logra su meta. Loke a anim’e tawata informenan cu tin un homber blanco masha bieu ta biba den e area di Ujiji.
Segun cu Stanley tawata yega serca di Ujiji, el a prepara pa e encuentro. E buki Stanley, skirbi door di Richard Hall, ta bisa: “Stanley tawata flaco flaco y cansa, pero el a sinti cu e por a mustra mas balente cu [otro exploradonan anterior] ora di marcha drenta den e pueblito. Al fin y al cabo, esaki lo tawata un momento historico, y no solamente lo el a crea e momento sino tambe pon’e riba papel. Tur hende den e expedicion a bisti e miho pañanan cu nan a resta. Stanley a pone un banchi nobo rond di su sombre forma di helm, bisti carson blanco y a laga polish su bootsnan bon.”
Stanley ta conta kico a pasa e ora ei: “E expedicion porfin ta para . . . Tin un grupo di e Arabirnan mas respeta; y segun cu mi ta yega mas serca, mi ta mira e cara blanco di un homber bieu meimei di nan. . . . Nos ta hisa nos sombre, y mi ta bisa: ‘Dr. Livingstone, mi ta supone?’ y e ta bisa: ‘Si.’”
Loke A Sigui
Originalmente Stanley tawatin pensa di keda net lo suficiente pa e tene un entrevista y skirbi su relato. Sinembargo, Livingstone cu Stanley a sera un amistad masha lihe cu otro. Nos guia ta conta: “Stanley a keda serca Livingstone pa varios siman, y hunto nan a explora Lago Tanganyika. Stanley a purba combence Livingstone pa e regresa Europa, pero Livingstone tawata dicidido pa keda y haya e origen di Nilo. Pesei dia 14 di maart 1872, Stanley cu Livingstone tawatin un despedida emocional. Stanley a bai bek na costa, caminda el a cumpra cuminda y ekipo y manda nan pa Livingstone. Despues di esei, Stanley a cohe rumbo pa Europa.”
Kico a para di Livingstone? Nos guia ta splica: “Na augustus 1872, Livingstone a reanuda su buskeda di e origen di Riu Nilo. El a bai suit den direccion di Zambia. Sinembargo, cansancio y malesa a caba cu su salu. Dia 1 di mei 1873, nan a hay’e morto. Su crianan . . . a balsama su curpa, y dera su curason y tripanan den suela Africano. Caba nan a carga e restonan mortal di Livingstone un distancia di 2.000 kilometer te na Bagamoyo, caminda e misioneronan a ricibie. Nan a haci areglo pa transport’e via barco pa Zanzibar y djeinan pa Gran Bretania. Su restonan a yega London dia 15 di april 1874, y nan a der’e den Westminster Abbey tres dia despues. A dura casi un aña pa Livingstone su curpa yega su ultimo luga di sosiego.”
Stanley a regresa Africa pa sigui caminda Livingstone a keda cu e exploracion. Stanley a dirigi expedicionnan cu a explora e areanan rond di Lago Victoria y Lago Tanganyika y e trayectoria di e poderoso Riu Congo.
Bo mester sinti admiracion pa e curashi y determinacion di hombernan manera Livingstone y Stanley. Enciclopedia Britannica ta bisa di Livingstone: “Su descubrimentonan—geografico, tecnico, medico y social—ta representa un cantidad complica di conocemento cu te ainda hende ta analisa.” Y maske awe hende ta corda Livingstone y Stanley como explorado y no como predicado y reportero, nan trabou a habri e porta pa conocemento biblico plama einan decadanan despues.
Pues a bira posibel pa misioneronan di Testigonan di Yehova yuda cientos di miles di Africano acepta berdadnan biblico. De echo, na Ujiji, caminda Stanley a topa Livingstone pa prome biaha, e Testigonan su obra di predica berdadnan biblico ta asina bon conoci cu ora residentenan local mira nan na nan porta, no ta nada straño pa nan puntra: “Testigo di Yehova, mi ta supone?”
[Mapa na pagina 25]
(Pa e texto den su formato completo, wak e publicacion)
Lago Victoria
Expedicionnan di Livingstone
Kaapstad
Port Elizabeth
Kuruman
Lago Ngami
Linyanti
Luanda
Victoria Falls
Quelimane
Mozambique
Mikindani
Zanzibar
Chitambo
Lago Tanganyika
Nyangwe
Ujiji, caminda e dos hombernan a topa
Stanley su buskeda di Livingstone na 1871
Zanzibar
Bagamoyo
Ujiji, caminda e dos hombernan a topa
[Reconocemento]
Mapa: Mountain High Maps® Copyright © 1997 Digital Wisdom, Inc.
[Plachi na pagina 24, 25]
David Livingstone
[Reconocemento]
Livingstone: For di e buki Missionary Travels and Researches in South Africa, 1858
[Plachi na pagina 24, 25]
Henry M. Stanley
[Plachi na pagina 25]
Victoria Falls
[Plachi na pagina 26]
Un Testigo di Yehova compartiendo berdad biblico na Ujiji