E Retonan Cu Mamanan Ta Confronta

“E tareanan conecta cu e hogar ta e tareanan fundamental di humanidad. . . . Si e mama no cumpli cu su deber, lo no tin un siguiente generacion, of lo tin un siguiente generacion cu ta piyo cu si no tawatin ningun.”—Theodore Roosevelt, e di 26 presidente di Merca.

CLARAMENTE, un mama ta esencial pa bida humano, pero su papel ta encera mas cu djis haya yiu. Relaciona cu e papel di mamanan den mayoria parti di e mundo djawe, un escritor a comenta: “E ta e protector principal di cada yiu su salu, educacion, intelecto, personalidad, caracter y stabilidad emocional.”

Un di e tantisimo funcionnan di mama ta su papel como educado di su yiunan. Por lo general un yiu ta siña su prome palabranan y su manera di papia for di su mama. Pesei hopi bes nan ta referi na un persona su prome idioma como su lenga materno. Compara cu e tata, mama normalmente ta esun cu tur dia ta pasa mas tempo cu e muchanan, y pesei kisas ta mama ta esun principal cu ta educa nan y tambe disiplina nan. Pues, e proverbio Mexicano “la educacion se mama” (educacion bo ta haya na pecho) ta duna honor na e papel importante di mamanan.

Nos Creador, Yehova Dios, tambe ta honra mamanan. De echo un di e Dies Mandamentonan, skirbi cu e “dede di Dios” riba tablanan di piedra, ta urgi yiunan: “Honra bo tata y bo mama.” (Exodo 20:12; 31:18; Deuteronomio 9:10) Ademas, un proverbio biblico ta referi na “e siñansa di bo mama.” (Proverbionan 1:8) E importancia di siña yiu durante e prome tres añanan di bida—ora cu mayoria di nan ta principalmente bou di e cuido di nan mama—ta ser reconoci awor tur caminda.

Kico Ta Algun di e Retonan?

Loke ta hacie dificil pa hopi mama siña nan yiunan durante e añanan crucial di nan formacion ta e presion cu nan mester traha pa yuda mantene e famia. Estadisticanan compila door di Nacionnan Uni ta mustra cu den hopi pais desaroya, mas cu mitar di e mamanan cu tin yiu bou di tres aña tin un empleo.

Ademas, hopi mama tin e carga di cria nan yiunan nan so pasobra nan casa a bai busca trabou den un otro stad of pais. Por ehempel, segun informe, den algun region di Armenia casi un tercera parti di e hombernan a muda pa exterior en busca di trabou. Otro mamanan tin cu cria nan yiunan nan so pasobra nan casa a bandona nan of a muri.

Un otro reto pa hopi mama den algun pais ta e echo cu nan no tin formacion escolar. E Departamento di Asuntonan Social y Economico di Nacionnan Uni ta calcula cu dos tercera parti di e 876 miyon analfabetonan cu tin na mundo ta hende mohe. De echo segun UNESCO, na Africa, na e estadonan Arabir y na parti oost y suit di Asia, mas cu 60 porshento di hende mohe ta analfabeto. Ademas tin cantidadnan grandi di hende homber ta pensa cu no ta necesario pa educa hende mohe y cu educacion asta ta haci hende mohe inadecuado pa cumpli cu nan papel di haya yiu.

E revista Outlook ta bisa cu den un districto di e estado di Kerala (na India) caminda mucha mohe normalmente ta bira mama rond di 15 aña, ningun homber no kier casa cu un mucha mohe educa. Den e pais biciña, Pakistan, hende ta duna prioridad na yiu homber. E criansa cu yiu homber ta ricibi ta prepara nan pa haya trabou miho paga pa asina nan por mantene nan mayornan den nan biehes. Di otro banda, segun e buki Women’s Education in Developing Countries (Educacion di Hende Mohe den Paisnan den Desaroyo), “mayornan no ta inverti den educacion di nan yiu mohenan pasobra nan no ta spera cu e yiunan ei lo por contribui financieramente na e famia.”

Tambe mamanan tin e reto di trata cu custumbernan local. Por ehempel, den algun pais nan ta spera di mama cu e ta apoya custumbernan manera bende su yiu mohenan jong den matrimonio y mutilacion genital femenino. Tambe ta tabu pa mama siña yiu homber y disiplina nan. Acaso un mama ta obliga di sigui tal custumber y laga otro hende educa su yiu hombernan?

Den e siguiente articulonan nos lo mira con algun mama ta trata cu e retonan ei cu exito. Tambe nos lo purba haya mas aprecio pa mama y pa nan posicion como mama y obtene un punto di bista balansa di un mama su papel como educado di su yiunan.

[Cuadro/Plachi na pagina 4]

“Pa loke ta trata stimulacion di e inteligencia y curiosidad di un mucha, y tambe desaroyo di su creatividad, e papel di mama ta esencial.”—Cumbre Regional Riba Derechonan di Mucha, na Burkina Faso, 1997.

[Plachinan na pagina 3]

Mamanan tin hopi di aber cu cada yiu su salu, educacion, personalidad y stabilidad emocional