Hobennan Sa Puntra . . .

Con Mi Por Controla Mi Emocionnan?

“Mi ta rabia pisa cu mi mayornan y ta bisa cosnan cu mi no kiermen. Caba mi ta keda leu for di nan te ora cu mi calma.”—Kate, 13 aña.

“Loke mas mi tin cu lucha cu ne ta insiguridad. Tin bes mi ta sinti cu mi ta muriendo di paden.” —Ivan, 19 aña.

E MOCION tin hopi poder. Nan ta influencia bo manera di pensa y actua. Nan por motiva bo pa bon of pa malo. De bes en cuando por parce cu asta nan ta domina bo pensamentonan. Jacob di 20 aña a bisa: “Casi nunca mi no ta sinti mi satisfecho cu mi mes. Hopi bes mi no ta logra cumpli cu mi propio expectativanan. Tin bes mi ta gewoon yora, of mi ta rabia asina tanto cu mi ta bah’e riba hende rond di mi. Ta masha dificil pa mi controla loke mi ta sinti.”

Sinembargo, siña controla nos emocionnan ta parti di e proceso pa bira un persona adulto madura y responsabel. Awendia tin algun experto ta pensa cu e habilidad di por controla bo emocionnan y di trata cu otro hende ta hopi mas balioso cu inteligencia. Sea cual sea e caso, Bijbel ta mustra cu ta masha importante pa un persona controla su sintimentonan. Por ehempel, Proverbionan 25:28 ta bisa: “Si bo no por controla bo rabia, bo ta mes indefenso cu un stad sin muraya, vulnerable pa atake.” (Today’s English Version) Dicon ta asina dificil pa un persona controla su sintimentonan?

Un Reto pa Hobennan

Hende di tur edad y background tin un lucha pa controla nan emocionnan. Sinembargo, e lucha aki por ta hopi mas dificil durante e periodo cu bo ta pasa di adolecencia pa bira adulto. Segun e buki Changing Bodies, Changing Lives (Curpa Ta Desaroya, Bida Ta Cambia) di Ruth Bell: “Mayoria teenager ta sinti un mescla confuso di emocionnan loco, bunita y spantoso. Hopi hende tin varios sintimento distinto na e mesun momento tocante e mesun cosnan. . . . Dado momento bo ta sinti bo un cierto manera, y un minuut despues bo ta ripara cu bo ta sinti net lo contrario.”

Como hoben, bo falta experencia tambe. (Proverbionan 1:4, BPK) Pues ora bo haya bo cu situacionnan nobo y dificil pa prome bes ta normal cu bo ta sinti bo un tiki insigur y kisas sin sa kico pa haci. Ta bon cu Yehova si ta compronde bo sintimentonan hopi bon. E conoce asta bo “pensamentonan” inkietante. (Salmo 139:23) Den su Palabra el a describi algun principio cu por yuda bo.

Un Manera Importante pa Controla Emocion

Un manera importante pa controla bo emocionnan ta di siña controla bo pensamentonan. Pensamentonan negativo por caba cu e energia cu bo tin mester pa tuma accion. (Proverbionan 24:10) Pero con bo por siña pensa na un manera positivo pa asina esaki yuda bo controla bo emocionnan?

Un manera ta pa nenga di keda pensa riba cosnan negativo cu ta laga bo sinti bo deprimi of insigur. Door di sigui e conseho di Bijbel pa consentra riba cosnan cu ta serio of “honorabel” y “husto”, bo por remplasa pensamentonan negativo cu esnan positivo. (Filipensenan 4:8) Podise no ta facil pa haci esaki, pero cu esfuerso bo por logra.

Tuma por ehempel un mucha mohe cu yama Jasmine. “Mi ta haya mi cu asina tanto cos cu mi no sa kico pa haci”, el a lamenta un biaha. “Trabou nobo, responsabilidadnan nobo. Mi emocionnan ta agota. Casi mi no ta haya un chens pa hala rosea.” No ta nada straño cu un hoben ta sintie asina de bes en cuando, y esaki por pon’e sintie insigur di su mes. Bijbel ta conta nos di un yoncuman cu yama Timoteo. E tawatin excelente cualidadnan pa cumpli cu e responsabilidadnan cu nan a dun’e. Pero toch ta parce cu e tawata lucha cu e sintimento cu e no ta suficiente capasita.—1 Timoteo 4:11-16; 2 Timoteo 1:6, 7.

Por ta masha bon cu bo ta sinti bo insigur ora bo haya bo confronta cu un tarea nobo of uno cu bo no ta familiarisa cu ne. Podise bo ta pensa den bo mes: ‘Nunca lo mi por haci e cos aki.’ Pero bo por controla e sintimentonan di insiguridad ei door di nenga di keda pensa riba cosnan negativo. Consentra riba con pa siña haci e tarea na un manera competente. Haci pregunta y sigui instruccion cu bo haya.—Proverbionan 1:5, 7.

Mas capas bo bira pa cumpli cu bo tarea, menos insigur lo bo sinti bo. No medita riba bo debilidadnan y asina permiti nan paralisa bo y stroba bo di traha duro pa mehora. Un biaha ora e hendenan a critica apostel Pablo, el a contesta: “Aunke mi no ta elocuente den palabra, den conocemento si mi ta.” (2 Corintionan 10:10; 11:6) Di mes manera, abo tambe por edifica bo confiansa door di reconoce bo puntonan fuerte y acudi na Dios pa bo haya yudansa pa trata cu bo debilidadnan. Dios realmente por yuda bo, mescos cu el a haci cu hende den pasado.—Exodo 4:10.

Un otro cos cu por yuda bo controla bo emocionnan ta di pone metanan modesto y realistico, anto acepta bo limitacionnan. Evita tambe di compara bo mes inhustamente cu otro hende. Na Galationan 6:4, Bijbel ta duna un bon conseho ora e ta bisa: “Laga cada un samina su mes obra, y e ora ei e lo tin motibo pa gaba solamente encuanto su mes, y no encuanto un otro.”

Con pa No Rabia Lihe

Un otro reto ta con pa controla rabiamento. Mescos cu den caso di Kate cu nos a menciona na principio, rabiamento ta impulsa hopi hoben pa bisa y haci cosnan ofensivo of destructivo.

Ta berdad cu ta normal pa hende rabia de bes en cuando. Pero corda riba Cain, e prome asesino. Ora el a “rabia masha pisa”, Dios a spiert’e cu e clase di rabia ei lo por a pon’e comete pica serio. El a bisa Cain: “Abo mester domina [pica].” (Genesis 4:5-7) Cain no a haci caso di e conseho dibino aki. Pero cu e yudansa di Dios abo si por controla bo rabia y evita di peca!

Atrobe e punto ta: controla bo pensamentonan. Na Proverbionan 19:11, Bijbel ta bisa: “Prudencia [of, “perspicasia”, NW] di un hende ta haci cu e no ta rabia lihe, y pa laga un ofensa pasa ta su gloria.” Si un persona ofende bo, purba compronde dicon el a comporta su mes asina. Ta pa malo el a purba hurt bo? Ta posibel cu el a actua sin pensa of debi na ignorancia? Door di tolera fayo di otro hende bo ta refleha e misericordia di Dios, y esaki por yuda bo domina bo sintimentonan di rabia.

Pero kico si bo tin bon motibo pa ta rabia? E Scritura ta bisa: “Rabia, ma no haci pica.” (Efesionan 4:26) Si ta necesario, papia e asunto cu e persona. (Mateo 5:23, 24) Of podise e miho cos pa haci ta di simplemente lubida e asunto, no keda rabia y sigui padilanti cu bo mente na pas.

Un punto interesante ta cu bo amigonan por tin un influencia riba e manera cu bo ta trata cu rabia. Pesei e mandamento di Bijbel ta: “No sera amistad cu hende cu ta gusta rabia, y no anda cu hende di mal genio, pa bo no siña su camindanan, y pone un trampa pa bo alma.”—Proverbionan 22:24, 25.

Ora e hendenan rond di bo ta haci esfuerso pa controla nan rabia esaki por yuda abo tambe cultiva dominio propio. Den e congregacionnan cristian di Testigonan di Yehova tin hopi hende maduro asina, anto hopi di nan ta mas grandi cu bo y cu mas experencia cu bo. Siña conoce algun di nan. Observa con nan ta trata cu problema. Podise nan por duna bo “conseho sabi” tambe ora bo haya bo cu problema. (Proverbionan 24:6) Jacob, cita anteriormente, a conta: “Un amigo maduro cu por recorda mi di e Palabra di Dios ta bal masha hopi mes. Ora mi corda cu Yehova ta stima mi apesar di mi insiguridadnan, mi por controla mi emocionnan y keda calmo.”

Otro Pasonan Practico

Un buki popular di ehercicio ta bisa: “Masha hopi estudio a proba cu e manera cu bo ta move bo curpa ta influencia bo beis mediante procesonan kimico den bo curpa. Bo nivel di hormona y oxigeno ta cambia dependiendo di e movecionnan cu bo ta haci.” No tin duda, ehercicio fisico ta beneficioso. Bijbel ta bisa nos: “Ehercicio fisico tin cierto balor.” (1 Timoteo 4:8, Today’s English Version) Pakico bo no ta establece un rutina balansa pa bo haci ehercicio regularmente? E por tin un bon efecto riba e manera cu bo ta sinti. Un dieta saludabel tambe por trece beneficio.

Considera tambe bo escohencia di musica y entretenimento. Un estudio cu nan a publica den The Harvard Mental Health Letter a bisa: “Wakmento di violencia . . . tin e tendencia di lanta rabia y sintimentonan agresivo. . . . Hende cu a wak pelicula violento tawatin pensamentonan mas agresivo y nan presion di sanger a subi.” Pesei, tuma decisionnan sabi ora bo ta scohe kico bo ta bai scucha y wak.—Salmo 1:1-3; 1 Corintionan 15:33.

Na final di cuenta, e miho manera pa bo siña controla bo emocionnan ta door di cultiva un relacion intimo cu bo Creador. E ta invita nos cada un pa papia cu ne den oracion, pa desahoga nos sintimento- y emocionnan serca dje. Apostel Pablo a duna e animacion aki: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente.” Si, bo por desaroya e fortalesa interno pa enfrenta cualkier situacion den bida. Apostel Pablo a agrega: “Tur cos mi por [door di “Esun cu”, NW] ta duna mi fortalesa.”—Filipensenan 4:6, 7, 13.

E hobensita Malika a bisa: “Mi a siña resa, resa y sigui resa. E echo cu mi sa cu Yehova ta interesa den mi ta yuda mi sinti mi trankil y cu mi tin mas control di mi emocionnan.” Cu e yudansa di Dios, abo tambe por siña controla bo emocionnan.

[Comentario na pagina 19]

Un manera importante pa controla bo emocionnan ta di siña controla bo pensamentonan

[Plachi na pagina 20]

Asociacion cu hende mas grandi cu bo por siña bo con pa trata cu bo sintimentonan