2. Acaso Ta Nos Falta Cu Nos Ta Sufri?

Dicon Ta Importante pa Haya e Contesta?

Si ta nos falta cu nos ta sufri, e ora ey kisas nos lo por haci algo pa reduci nos sufrimento.

Algo pa Pensa Riba

Acaso hende ta culpabel pa cos malo cu ta pasa? Pensa un rato riba e siguiente ehempelnan.

Abuso.

E Organisacion Mundial di Salud (OMS) ta calcula cu 1 di cada 4 adulto a sufri di abuso fisico cierto momento durante nan niñez y cu 1 di cada 3 hende muher a bira victima di abuso fisico of sexual (of di tur dos) na dado momento den nan bida.
Morto.

Segun World Health Statistics 2018, cu OMS a publica, “ta ser calcula cu tabatin 477.000 asesinato rond mundo na 2016.” Y e mesun aña ey, nan ta pensa cu 180.000 hende a ser mata den gueranan y otro conflictonan.
Problema cu Salud.

Den un articulo di e revista National Geographic, e escritora Fran Smith a bisa: “Mas cu mil miyon hende ta huma. Y tabaco ta contribui na e cinco causanan principal di morto: problema cu curason, stroke, infeccion respiratorio, enfermedad obstructivo cronico di pulmon y cancer di pulmon.”
Desigualdad Social.

Psicologo Jay Watts a bisa: “Pobreza, desigualdad social, racismo, discriminacion di hende muher, hende cu ta haya nan obliga di bay biba un otro caminda y un cultura competitivo ta cosnan cu por aumenta e chens cu hende ta haya problema mental.”

PA HAYA SA MAS

Bay na jw.org y wak e video Dikon Dios A Krea Tera?

Loke Bijbel Ta Bisa

E homber cu nos a describi anteriormente ta drumi riba un cama den hospital. Su esposa ta bira su cara ora e dokter ta duna su esposo mal noticia tocante su salud.

Hende mes ta causa mayoria di sufrimento na mundo.

Den hopi caso, gobiernonan corupto a causa sufrimento cu ta haci bida di e hendenan cu nan mester proteha dificil.

“Hende a eherce autoridad riba un otro hende pa su daño.”—ECLESIASTES 8:9.

Hende por reduci nan sufrimento.

Consehonan di Bijbel por mehora nos salud y yuda nos pa nos por bay bon cu otro hende.

“Un curason trankil ta bida pa e curpa, ma envidia ta putrimento di weso.”—PROVERBIONAN 14:30.

“Kita tur tipo di amargura malicioso, rabia, furia, gritamento y papiamento di cos ofensivo for di boso, y tambe tur loke ta perhudicial.”—EFESIONAN 4:31.