Hesus Ta Bolbe na Shelo

DIANAN a pasa y Hesus a aparece na su discipelnan hopi biaha. Un biaha rond di 500 discipel a mir’e. Ora el a aparece na nan, bo sa tocante kico Hesus a papia cu nan? Di e reino di Dios. Jehova a manda Hesus na mundo pa e siña hende tocante e Reino. Y el a sigui haci esei asta despues cu Dios a lant’e for di morto.

Bo ta corda kico e reino di Dios ta? Si, e Reino ta un berdadero gobierno di Dios den shelo, y Dios a scohe Hesus pa ser rei. Manera nos a siña, Hesus a mustra caba cu e lo ta un rei maraviyoso, dor cu el a duna cuminda na hende cu tabatin hamber, a cura hende enfermo y asta a lanta hende morto na bida!

P’esei, ora Hesus ta reina como rei den shelo pa mil aña, con Tera lo ta? Si, henter mundo lo bira un paradijs bunita. Lo no tin guera mas, ni crimen, ni malesa y ni sikiera morto. Nos sa cu esei ta cierto pasobra Dios a traha Tera pa e ta un paradijs pa hende gosa di dje. P’esei mes el a traha e hofi di Eden na principio. Y Hesus lo percura pa e boluntad di Dios ser cumpli finalmente.

Tempo a yega pa Hesus bolbe na shelo. Hesus a aparece na su discipelnan pa 40 dia. P’esei nan a keda sigur cu Hesus ta bibo atrobe. Pero prome cu el a bai laga su discipelnan, el a bisa nan: ‘Keda na Jerusalem te ora boso ricibi spirito santo.’ Spirito santo ta e forsa activo di Dios, e ta manera biento cu ta supla. E spirito ei lo yuda Hesus su siguidonan haci Dios su boluntad. Finalmente Hesus a bisa nan: ‘Boso mester predica tocante mi te na e parti mas leu di Tera.’

Despues cu Hesus a bisa esei, un cos asombroso a sosode. El a cuminsa subi na shelo, manera bo ta mira ei. Anto un nubia a tap’e y e discipelnan no a mira Hesus mas. Hesus a bai shelo y for di ayariba el a cuminsa goberna riba su siguidonan na Tera.