Dicon Ta Dificil pa Haci Bon

KEN a keda contento ora Saulo a haci malo?— Satanas e Diabel. Pero no ta e so. E lidernan religioso di e Hudiunan tambe a keda contento. Anto ora Saulo a bira disipel di e Gran Maestro y hende a cuminsa yam’e Pablo, e lidernan religioso ei a haya rabia riba dje. Bo a mira dicon ta dificil pa disipel di Hesus haci bon?—

Un biaha, e sumo sacerdote cu yama Ananias a manda hende dal Pablo den su cara. Ananias a asta purba pa nan sera Pablo den prizon. Pablo a pasa den hopi cos despues cu el a bira disipel di Hesus. Por ehempel, mal hende a yega di bati Pablo y purba dal e mata cu baranc’i piedra.—Echonan 23:1, 2; 2 Corintionan 11:24, 25.

Hopi hende lo purba pone nos haci cos cu Dios no ta gusta. Pesei, puntra bo mes esaki: Cuanto mi ta stima loke ta bon? Mi ta stima loke ta bon asina tanto cu lo mi sigui haci bon asta ora esei ta pone hende haya rabia riba mi? Bo mester tin curashi pa bo haci asina, no?—

Kisas bo ta puntra bo mes: ‘Dicon hende mester haya rabia riba nos pasobra nos ta haci bon? No ta contento nan mester ta?’ Lo bo pensa asina. Y ta berdad si cu hopi bes ora Hesus a haci cos bon, hende tawata keda contento cu ne. Un dia Hesus tawata den un stad, anto tur hende di e stad a bin hunto na porta di e cas caminda e tawata keda. Nan a bin pasobra Hesus tawata curando hende malo.—Marco 1:33.

Pero no ta tur ora hende a gusta e cosnan cu Hesus a siña. Maske tur loke el a siña ta bon, toch algun hende a haya hopi rabia riba dje pasobra el a papia e berdad. Ta esei a pasa un dia na Nazaret, e stad caminda Hesus a crece. El a drenta sinagoga, e luga caminda Hudiu ta bin hunto pa adora Dios.

Ei Hesus a duna un discurso masha bunita for di e Scritura. Na cuminsamento e hendenan a gusta. Nan a keda boca habri di e bunita palabranan cu tawata sali for di su boca. Casi nan no por a kere cu ta e mucha homber cu a crece den nan mes stad tawata papia.

Pero e ora ei Hesus a bisa un otro cos. El a conta nan di un par di biaha cu Dios a haci cos special pa hende cu no tawata Hudiu. Ora Hesus a bisa e cos ei, e hendenan den sinagoga a rabia. Bo sa dicon?— Door cu nan tawata kere cu ta pa nan so Dios ta haci cos special. Nan a kere cu nan ta miho cu otro hende. Pesei, e cos cu Hesus a bisa a pone nan haya rabia riba dje. Anto bo sa kico nan a purba haci cu ne?—

Bijbel ta bisa: ‘Nan a coi Hesus tene, anto sac’e pura for di e stad. Nan a bai cu ne na rand di un sero, y nan kier a tir’e for di baranca pa mat’e! Pero Hesus a scapa for di nan.’—Lucas 4:16-30.

Si ta cu bo e cos ei a pasa, abo lo a bai bek serca e hendenan ei pa papia cu nan di Dios?— Lo bo mester tin curashi, no?— Wel, rond di un aña despues, Hesus a bai Nazaret bek toch. Bijbel ta bisa: “El a cuminsa siña nan den nan sinagoga.” Miedo di hende cu no ta stima Dios no a pone Hesus stop di papia e berdad.—Mateo 13:54.

Un otro dia, riba un sabat, Hesus tawata na un sinagoga caminda tawatin un homber cu un man seco, esta, un man mancaron. Hesus tawatin poder di Dios pa cura e homber. Pero un par di hende cu tawata einan a purba hinca Hesus den problema. Kico e Gran Maestro a haci?— Prome el a puntra: ‘Si un di boso carnenan cai den un pos riba sabat, boso ta sac’e?’

Si, nan tawata yuda carne asta riba sabat, e dia cu nan mester a sosega. Pesei Hesus a bisa nan: ‘Yuda un hende riba sabat ta asta mas miho, pasobra un hende bal mas cu un carne!’ Pesei, tur hende por a mira cu Hesus mester a yuda e homber door di cur’e!

Hesus a manda e homber rek su man, y mesora e man a cura. Esta contento e homber a keda! Pero, kico a para di e otro hombernan? Nan tambe a keda contento?— No. Nan a haya asta mas rabia riba Hesus. Nan a sali for di e sinagoga y cuminsa traha plan pa mat’e!—Mateo 12:9-14.

Awendia tambe ta asina. Ni maske kico nos haci, nunca nos no por tene tur hende contento. Pesei nos tin cu dicidi ta ken nos kier haci contento. Si ta Yehova Dios y su Yiu Hesucristo nos kier pa keda contento cu nos, anto semper nos mester haci loke nan ta siña nos. Pero si nos haci Yehova y Hesus contento, ken ta haya rabia riba nos? Ken ta bai purba stroba nos di haci bon?—

Si, Satanas e Diabel. Pero ken mas lo purba stroba nos?— Hende cu Diabel a gaña pa nan kere cos robes. Hesus a bisa e lidernan religioso di su tempo: “Boso ta di boso tata e Diabel, y boso kier haci e deseonan di boso tata.”—Huan 8:44.

Tin hopi hende cu Diabel ta gusta. Hesus ta yama nan “mundo.” Ta kico Hesus tawata kiermen cu “mundo”?— Wel, laga nos wak Huan capitulo 15, versiculo 19 pa nos compronde. Ei nos por lesa cu Hesus a bisa: “Si boso tawata di mundo, mundo lo a stima loke ta di dje; ma pasobra boso no ta di mundo, ma ami a scohe boso for di den mundo, pesei mundo ta odia boso.”

Kiermen, e mundo cu ta odia e disipelnan di Hesus ta tur e hendenan cu no ta su siguidonan. Ma dicon mundo ta odia e disipelnan di Hesus?— Pensa un rato. Ta ken ta manda riba mundo?— Bijbel ta bisa: “Henter mundo ta bou di control di e malbado.” E malbado ei ta Satanas e Diabel.—1 Huan 5:19.

Bo a mira awor dicon ta asina dificil pa haci bon?— Ta Satanas cu su mundo ta hacie dificil. Pero tin un cos mas. Bo ta corda ta kico e ta?— Na Capitulo 23 di e buki aki nos a siña cu nos tur a nace cu pica. Bo no ta kere cu lo ta dushi dia cu ni pica, ni Diabel ni su mundo no ta existi mas?—

Bijbel ta priminti cu “e mundo ta pasa bai.” Esei kiermen cu tur hende cu no ta siguido di e Gran Maestro lo no existi mas. Dios no ta bai laga nan biba pa semper. Bo sa ken si ta bai biba pa semper?— Bijbel ta sigui bisa: “Esun cu haci e boluntad di Dios ta permanece pa semper.” (1 Huan 2:17) Si, ta solamente hende cu ta haci bon, hende cu ta haci “e boluntad di Dios”, lo biba pa semper den e mundo nobo di Dios. Pesei, maske ta dificil, toch nos kier haci bon, no ta berdad?—