Con Bo Por Sa Ken Bo Mester Obedece

TIN biaha ta dificil pa bo sa ta ken bo mester obedece. Kisas bo mama of bo tata ta bisa bo haci un cos, ma bo maestro di scol of un polis ta bisa bo haci un otro cos. Si un cos asina pasa, cua di nan lo bo obedece?—

Mas dilanti den e buki aki, na Capitulo 7, nos a lesa Efesionan 6:1-3 for di Bijbel. Ei tin skirbi cu yiunan mester tende di nan mama cu nan tata. E texto ta bisa: “Obedece boso mayornan den Señor.” Bo sa kico kiermen “den Señor”?— Mayornan den Señor ta siña nan yiunan obedece e leinan di Dios.

Pero tin hende grandi cu no ta kere den Yehova. Kico bo mester haci anto, si un di nan bisa bo cu no ta nada pa kijk af ora bo tin proefwerk na scol, of coi cos den tienda sin paga? Esei kiermen cu mucha tin mag di kijk af of horta?—

Corda cu un biaha Rei Nabucodonosor a manda tur hende buig pa e imagen di oro cu el a traha. Pero Sadrak, Mesak cu Abed-nego a nenga di buig. Bo sa dicon?— Door cu Bijbel ta bisa cu ta Yehova so hende mester adora.—Exodo 20:3; Mateo 4:10.

Despues cu Hesus a muri, hende a hiba su apostelnan dilanti Sanedrin, e corte religioso mas importante di e Hudiunan. Sumo Sacerdote Caifas a bisa nan: “Nos a taha boso strictamente pa no sigui siña den e nomber [di Hesus], y mira, boso a yena Herusalem cu boso siñansa.” Dicon e apostelnan no a obedece Sanedrin?— Pedro a contesta Caifas na nomber di tur e apostelnan. El a bis’e: “Nos mester obedece Dios mas cu hende.”—Echonan 5:27-29.

E tempo ei, e lidernan religioso di e Hudiunan tawatin hopi poder. Pero ta gobierno Romano tawata manda den nan pais. Esun na cabes di e gobierno ei tawata yama Cesar. E Hudiunan no tawata gusta pa Cesar manda riba nan, pero e gobierno Romano a haci hopi cos bon pa nan pueblo. E gobiernonan cu tin awe tambe ta haci cos bon pa nan ciudadanonan. Bo sa kico asina nan ta haci?—

Gobierno ta traha caminda pa nos core ariba, y nan ta paga polis y bombero pa nan proteha nos. Tin pais caminda cu gobierno ta percura scol pa mucha y docter cu remedi pa hende grandi tambe. E cosnan aki ta costa gobierno placa. Bo sa di unda gobierno ta haya placa?— For di pueblo. E placa cu hende ta paga gobierno yama belasting.

Tempo cu e Gran Maestro tawata biba na tera, hopi Hudiu no kier a paga belasting na e gobierno Romano. Pesei, un dia e sacerdotenan a paga un par di hende pa nan bai haci Hesus un pregunta, pa purba hinc’e den problema. Loke nan a puntr’e ta esaki: ‘Nos tin cu paga Cesar belasting of no?’ Ta pa purba nek Hesus nan a puntr’e e cos ei. Si Hesus a contesta: ‘Si, boso tin cu paga belasting’, hopi Hudiu lo no a keda contento cu loke el a bisa. Pero Hesus no por a bisa: ‘No, boso no tin nodi paga belasting’, pasobra esei no ta berdad.

Kico Hesus a haci anto? Wel, el a bisa: ‘Mustra mi un moneda.’ Ora nan a trece uno p’e, Hesus a puntra nan: ‘Ken su cara y nomber ta riba e moneda?’ E hombernan a bisa: “Di Cesar.” E ora ei Hesus a bisa: “Anto duna Cesar loke ta di Cesar, y Dios loke ta di Dios.”—Lucas 20:19-26.

Wel, ningun hende no por a bisa nada malo di e cos cu el a contesta. Si Cesar ta haci cos pa nos, anto ta claro cu nos por uza e cen cu Cesar a traha, pa pag’e pa loke el a haci pa nos. Asina Hesus a mustra cu ta bon pa paga gobierno belasting pa e cosnan cu nan ta haci pa nos.

Awor, kisas bo ta mucho chikito ainda pa paga belasting. Pero tin un otro cos cu gobierno mester haya for di bo. Bo sa ta kico?— Obediencia na e leinan di gobierno. Bijbel ta bisa: ‘Obedece e autoridadnan cu ta goberna.’ E autoridadnan cu e ta papia di dje ta e hendenan cu ta na poder den gobierno. Kiermen, ta Dios mes ta bisa nos cu nos mester obedece lei di gobierno.—Romanonan 13:1, 2.

Kisas tin un lei cu ta bisa cu bo no mag tira papel ni otro cos riba caya. Bo mester obedece e lei ei?— Si, Dios kier pa bo obedec’e. Bo mester obedece polis tambe?— Ta gobierno ta paga polis pa nan proteha hende. Ora bo obedece nan, ta gobierno bo ta obedece.

Pesei, si bo ta bai crusa caya, anto un polis bisa bo “Warda!”, kico bo mester haci?— Si otro hende core crusa toch, kico abo mester haci?— Bo mester warda, asta si ta abo so ta keda para. Dios ta bisa bo cu bo mester obedece.

Si tin problema den bo bario, polis lo por bisa: “Keda den cas. No bai riba caya.” Pero kisas bo ta tende hende ta grita, anto bo ta haya gana di sa ta kico ta pasa. Bo mester bai wak pafo?— Si bo hacie toch, bo a obedece “e autoridadnan cu ta goberna”?—

Na hopi luga, gobierno ta traha scol y paga maestro di scol tambe. Awel, bo ta kere cu Dios kier pa bo obedece bo maestro?— Pensa un rato. Ta gobierno ta paga bo maestro pa e duna les, mescos cu e ta paga polis pa proteha hende. Pesei, ora bo obedece sea polis of un maestro, ta gobierno bo ta obedece.

Pero kico awor si un maestro bisa bo cu bo mester haci un acto di adoracion na un imagen of un cos asina? Kico bo ta haci e ora ei?— E tres Hebreonan no a buig pa e imagen, ni ora Rei Nabucodonosor a manda nan haci esei. Bo ta corda dicon?— Pasobra nan no kier a desobedece Dios.

Un meneer cu yama Will Durant, cu ta skirbi tocante historia, a skirbi tocante e prome cristiannan, anto el a bisa cu ‘nan lealtad principal no tawata na Cesar.’ Asina mes. Nan tawata mas leal na Yehova cu na cualkier otro cos! Awel, corda cu ta Dios mester ta na prome luga den nos bida.

Nos ta obedece gobierno pasobra Dios kier pa nos obedece nan. Pero si nan bisa nos haci un cos cu Dios a bisa nos no haci, kico nos mester bisa?— Nos mester bisa mescos cu e apostelnan a bisa e sumo sacerdote: “Nos mester obedece Dios mas cu hende.”—Echonan 5:29.