Kico e Reino di Dios Ta? Con Nos Por Mustra Cu Nos Kier pa e Bin

BO CONOCE e oracion cu Hesus a siña su siguidonan?— Si bo no conoc’e, nos por les’e hunto den Bijbel na Mateo 6:9-13. Hopi hende ta yam’e e Oracion di Nos Tata, y un di e cosnan cu e ta bisa ta: “Cu bo reino bini.” Bo sa kico e reino di Dios ta?—

Wel, un rei ta e hende cu ta manda den un pais. Anto su gobierno yama un reino. Tin pais caminda e hende cu ta manda den gobierno yama president. Con Bijbel ta yama Esun cu ta manda den e gobierno di Dios?— E ta yam’e e Rei. Ta pesei e gobierno di Dios yama e Reino.

Bo sa ta ken Yehova Dios a scohe pa bira Rei di Su gobierno?— Su Yiu Hesucristo. Dicon Hesus ta miho cu cualkier otro gobernante cu hende por scohe?— Pasobra Hesus ta stima su Tata Yehova masha hopi. Pesei, tur ora e ta haci cos bon so.

Hopi aña prome cu Hesus a nace na Betlehem, Bijbel a papia di su nacemento y a bisa cu e lo bira e Rei cu Dios a scohe. Laga nos lesa tocante esaki na Isaias 9:6 y 7. E ta bisa: “Un yiu a nace pa nos, un yiu homber ta duna na nos, y e gobernacion lo ta riba su scouder. Su nomber lo ta . . . Prins di Pas. Lo no tin fin na e aumento di su gobernacion y di pas.”—Letter schuin ta di nos.

Bo sa dicon Bijbel ta yama e Gobernante di e Reino di Dios un “Prins”?— Wel, e prins aki ta yiu di un rei. Y Hesus ta yiu di Yehova e Gran Rei. Pero Yehova a haci Hesus bira Rei di Su gobierno tambe. E gobierno ei ta bai goberna mundo pa mil aña largo. (Revelacion 20:6) Despues cu Hesus a batisa, el “a cuminsa predica y bisa: ‘Repenti, pasobra e reino di shelo ta serca.’”—Mateo 4:17.

Dicon bo ta kere cu Hesus a bisa cu e Reino ta serca?— Door cu e Rei cu tawata bai reina den shelo tawata ei mes meimei di nan! Ta pesei Hesus a bisa nan: “E reino di Dios ta meimei di boso.” (Lucas 17:21) Lo bo no tin gana pa e Rei cu Yehova a scohe ta asina serca di bo cu bo por asta mishi cu ne?—

Awor, bisa mi: Ki trabou importante Hesus a bin haci na tera?— Hesus a contesta e pregunta aki door di bisa: “Mi mester predica e reino di Dios na e otro stadnan tambe, pasobra ta pa e proposito aki mi a wordo manda.” (Lucas 4:43) Hesus tawata sa cu e so no por a predica na tur hende. Awel, kico bo ta kere cu el a haci?—

Hesus a busca mas hende, anto el a siña nan con pa haci e trabou di predica. E prome hendenan cu el a siña tawata e 12 hombernan cu el a scohe pa bira su apostelnan. (Mateo 10:5, 7) Pero ta su apostelnan so Hesus a siña pa haci e trabou ei? No, Bijbel ta bisa cu Hesus a siña hopi otro hende mas pa nan bai predica. Un dia el a manda 70 otro disipel pa bai predica dos dos na camindanan cu e lo bai predica despues. Ta kico nan a bai siña e hendenan?— Hesus di: “Bisa nan: ‘E reino di Dios a yega serca boso.’” (Lucas 10:9) Asina e hendenan a haya sa tocante e gobierno di Dios.

Hopi tempo pasa na Israel, ora un hende caba di bira rei e tawata drenta stad riba un yiu di burico pa hende mir’e. Anto ora Hesus a bishita Herusalem e ultimo biaha, e tambe a haci mescos. Bo a compronde dicon? Door cu Hesus mester bira Gobernante di e Reino di Dios. Ma e pueblo tawata kier pa e bira nan Rei?—

Wel, segun cu e tawata pasa riba e yiu di burico meimei di e multitud, mayoria hende a cuminsa pone nan mantelnan abou na suela riba e caminda pa e pasa riba nan. Otro hende a corta rama di palma anto pone nan abou riba e caminda. E cosnan ei cu nan a haci a mustra cu nan tawata kier pa Hesus bira nan Rei. Nan tawata grita: “Bendiciona ta e Rei cu ta bini den e nomber di Señor!” Pero no ta tur hende a keda contento. Tawatin lider religioso cu a asta bisa Hesus: ‘Bisa bo disipelnan keda keto.’—Lucas 19:28-40.

Cinco dia despues nan a aresta Hesus anto hib’e den un palacio pa nan trec’e dilanti e gobernado Poncio Pilato. Hesus su enemigonan a bisa cu Hesus a pretende di ta rei, y cu e ta contra e gobierno Romano. Pesei Pilato a wak kico Hesus tin di bisa tocante e asuntonan ei. Hesus a splic’e cu e no ta purba kita puesto di rei for di ningun hende. El a bisa Pilato: “Mi reino no ta di e mundo aki.”—Huan 18:36.

E ora ei Pilato a sali pafo anto bisa e pueblo cu e ta haya cu Hesus no a haci nada malo. Pero awor e pueblo no tawata kier mas pa Hesus bira nan Rei. Nan no tawata kier pa Pilato lag’e liber. (Huan 18:37-40) Pilato a bolbe papia cu Hesus, y ora el a caba e tawatin sigur cu Hesus no a haci nada malo. Pesei, Pilato a hiba Hesus pafo delaster biaha, anto el a bisa nan: “Ata boso rei!” Pero e pueblo a grita: ‘Bai cu ne! Bai cu ne! Clab’e na staca!’

Pilato a puntra nan: ‘Boso rei mi mester claba na staca?’ E sacerdotenan principal a contest’e: “Nos no tin otro rei, sino solamente Cesar.” Imagina bo! E sacerdotenan malbado ei a logra pone e pueblo bira contra Hesus!—Huan 19:1-16.

Awendia, cos no ta mucho diferente cu den e tempo ei. Mayoria hende no kier di berdad pa Hesus bira nan Rei. Kisas nan ta bisa cu nan ta kere den Dios, pero nan no kier pa ni Dios ni Cristo bisa nan kico pa haci. Nan kier tin nan mes gobiernonan aki na tera.

Kico di nos awor? Ora nos haya sa tocante e Reino di Dios y di tur e cosnan grandi y bunita cu e ta bai haci, kico esei ta pone nos sinti pa Dios?— Nos ta stima Dios, toch?— Awel, con nos por mustra Dios cu nos ta stim’e y cu nos kier pa su Reino goberna nos?—

Nos por mustra Dios cu nos ta stim’e, door di sigui ehempel di Hesus. Anto ta kico Hesus a haci pa mustra cu e ta stima Yehova?— El a bisa esaki: “Semper mi ta haci e cosnan cu ta agrad’e.” (Huan 8:29) Si, Hesus a bin na tera ‘pa haci e boluntad di Dios’ y “pa cumpli cu su trabou.” (Hebreonan 10:7; Huan 4:34) Ban wak kico Hesus a haci prome cu el a cuminsa su trabou di predica.

Hesus a bai serca Huan Bautista na Riu Yordan. Despues cu nan a cana drenta awa, Huan a baha Hesus full bou di awa, anto caba bin ariba bek cu ne. Bo sa dicon Huan a batisa Hesus?—

Ta Hesus mes a pidi Huan pa batis’e. Pero con nos por sa cu Dios tawata kier pa Hesus batisa?— Nos sa cu ta asina pasobra ora Hesus a bin ariba bek for di awa el a tende e stem di Dios for di shelo bisa: “Abo ta mi yiu stima, den bo mi tin goso.” Dios a asta pone su spirito santo baha den forma di un paloma riba Hesus. Kiermen, Hesus a batisa pa e mustra cu e tawata kier sirbi Yehova henter su bida, si, pa semper.—Marco 1:9-11.

Abo tin cu crece ainda. Pero kico bo ta bai haci ora bo bira mas grandi?— Bo ta bai batisa mescos cu Hesus?— Ta importante pa bo imit’e, pasobra Bijbel ta bisa cu el a laga ‘un ehempel pa bo, pa bo sigui den su pasonan.’ (1 Pedro 2:21) Dia bo batisa, lo bo mustra cu di berdad bo kier pa e Reino di Dios goberna riba bo. Pero batisa so no ta tur cos.

Nos tin cu obedece tur cos cu Hesus a siña nos. Hesus a bisa cu nos no mester “ta di mundo.” Si nos cuminsa haci cos di mundo, nos por bisa cu nos ta obedece Hesus? Hesus cu su apostelnan a keda leu for di e tipo di cosnan ei. (Huan 17:14) Pero kico si nan tawata haci?— Nan tawata papia cu hende tocante e Reino di Dios. Esei tawata e trabou importante den nan bida. Nos tambe por haci e trabou ei?— Si, anto si di berdad nos kier pa e Reino di Dios bin, manera nos ta bisa ora nos ta resa, anto nos lo haci e trabou ei tambe.