Loke “Amor pa Dios Ta Nifica”

1, 2. Kico ta motiva bo pa stima Jehova Dios?

BO STIMA Dios? Si bo a dedica bo mes caba na dje, lo bo contesta: “Claro cu si!” Stima Jehova Dios ta e cos di mas natural pa nos haci, ya cu nos amor p’e ta debi na e amor cu e tin pa nos. Bijbel ta expres’e asin’aki: “Pa loke ta nos, nos ta stima, pasobra Dios a stima nos prome.”—1 Juan 4:19.

² Jehova a tuma e iniciativa pa expresa su amor pa nos: El a duna nos un bunita hogar terenal. E ta percura pa nos necesidadnan material. (Mateo 5:43-48) Es mas, e ta percura pa nos necesidadnan spiritual. El a duna nos su Palabra, Bijbel. Ademas, e ta invita nos pa resa na dje, cu e garantia cu lo e tende nos y duna nos su spirito santo pa yuda nos. (Salmo 65:2; Lucas 11:13) Mas cu tur cos, el a manda su Yiu mas stima como nos Rescatador pa libra nos for di pica y morto. Esta un gran amor Jehova a demostra na nos!—Juan 3:16; Romanonan 5:8.

3. (a) Kico nos mester haci pa keda den e amor di Dios? (b) Ki pregunta importante nos tin cu analisa, y unda nos ta haya e contesta?

³ Jehova kier pa nos beneficia di su amor pa semper. Sinembargo, ta depende di nos si nos realmente lo beneficia of no. E Palabra di Dios ta urgi nos: “Keda den e amor di Dios . . . cu bida eterno na bista.” (Judas 20, 21) Esaki ta rekeri accion di nos parti. Nos tin cu reacciona riba su amor cu obranan specifico. Pues, un pregunta importante pa nos pensa ariba ta: ‘Con mi por demostra mi amor pa Dios?’ Nos ta haya e contesta den e palabranan inspira di apostel Juan: “Amor pa Dios ta nifica cu nos ta cumpli cu su mandamentonan; sinembargo, su mandamentonan no ta pisa.” (1 Juan 5:3) Pues, ta bon pa nos analisa cuidadosamente kico e palabranan aki ta nifica, pasobra nos kier demostra nos Dios cuanto nos stim’e.

LOKE “AMOR PA DIOS TA NIFICA”

4, 5. Describi con amor pa Jehova a cuminsa crece den bo curason.

⁴ “Amor pa Dios.” Kico apostel Juan tabatin na mente ora el a skirbi e palabranan ey? El a referi na e sintimentonan profundo cu cada un di nos tin pa Dios. Abo ta corda ora cu amor pa Jehova a cuminsa crece den bo curason?

⁵ Pensa un rato riba e tempo ey. Segun cu bo a siña e berdad tocante Jehova y su proposito, bo fe a cuminsa crece. Bo a bin compronde cu bo a nace pecador, y cu ta pesey bo no tabatin un relacion cu Dios. Pero asina mes, Jehova a habri caminda pa bo haya bida eterno y alcansa e perfeccion cu Adam a perde. El a haci esey pa medio di Cristo. (Mateo 20:28; Romanonan 5:12, 18) Bo a bin realisa cu ta un gran sacrificio Jehova a haci ora el a manda su Yiu mas stima pa muri pa bo. E gran amor ey cu Dios a demostra a conmove bo curason asina tanto cu bo a cuminsa sinti un amor p’e.—1 Juan 4:9, 10.

6. Con nos ta demostra berdadero amor, y kico amor pa Dios a motiva bo pa haci?

⁶ Sinembargo, e sintimento ey tabata apenas e cuminsamento di berdadero amor pa Jehova. Amor no ta djis un sintimento; tampoco e no ta palabra so. Berdadero amor pa Dios ta encera mas cu djis bisa: “Mi stima Jehova.” Mescos cu fe, berdadero amor ta ser demostra pa medio di obra. (Santiago 2:26) Ora nos ta stima un persona, nos ta demostra esey haciendo cosnan cu ta agrada e persona cu nos ta stima. Pues, ora amor pa Jehova a haya raiz den bo curason, bo a sinti bo motiva pa biba na un manera cu ta agrada bo Tata celestial. Bo ta un Testigo di Jehova batisa? Wel, ta bo cariño profundo y devocion pa Dios a motiva bo pa tuma e decision di mas importante den bo bida: Bo a dedica bo mes na Jehova pa haci su boluntad, y bo a simbolisa bo dedicacion pa medio di bautismo. (Romanonan 14:7, 8) Pa cumpli cu e promesa solem aki, nos tin cu haci loke apostel Juan a sigui bisa.

“NOS TA CUMPLI CU SU MANDAMENTONAN”

7. (a) Menciona algun mandamento specifico di Dios. (b) Con bo por demostra cu bo ta cumpli cu e mandamentonan aki?

⁷ Juan a splica cu amor pa Dios ta nifica cu “nos ta cumpli cu su mandamentonan.” Cua ta e mandamentonan di Dios? Den Bijbel, Jehova a duna nos varios mandamento specifico. Por ehempel, e ta prohibi buracheria, fornicacion, idolatria, hortamento y gañamento. (1 Corintionan 5:11; 6:18; 10:14; Efesionan 4:28; Colosensenan 3:9) ‘Cumpli cu e mandamentonan di Dios’ ta encera biba na harmonia cu e normanan moral cu Bijbel ta splica claramente.

8, 9. Con nos por sa kico ta agrada Jehova hasta den situacionnan den cua no tin un ley biblico specifico? Duna un ehempel.

⁸ Kico nos tin cu haci pa nos agrada Jehova? Wel, nos tin cu haci mas cu djis obedece su leynan; nos mester siña conoce Jehova su manera di pensa. Jehova no a pone ley cu ta dirigi delaster un stap cu nos ta dal. Lo tin biaha cu Bijbel no ta bisa nada directamente tocante un asunto. Den casonan asina, con nos por sa si Jehova lo keda contento cu loke nos tin pensa di haci? Wel, Bijbel ta siña nos bon cla con Jehova ta pensa. Anto segun cu nos ta studia Bijbel, nos lo haya sa kico Jehova ta gusta y kico e ta odia. (Salmo 97:10; Proverbionan 6:16-19) Asina nos ta siña distingui actitud y accion cu ta agrad’e. Mas nos siña tocante e personalidad y manera di actua di Jehova, mas su manera di pensa lo por guia nos ora di tuma decision y influencia loke nos ta haci. Pues, hasta den situacionnan den cua no tin un ley di Bijbel specifico, nos por saca afo “kico ta e boluntad di Jehova.”—Efesionan 5:17.

⁹ Por ehempel, den Bijbel no tin un mandamento specifico cu ta taha nos di wak pelicula of programa di television violento of inmoral. Acaso nos tin mester di un ley specifico cu ta prohibi nos di wak e cosnan ey? Nos sa caba kico ta Jehova su punto di bista tocante e cosnan ey. Su Palabra ta bisa nos bon cla: “Esun cu ta gusta violencia [Jehova] su alma ta odia.” (Salmo 11:5) Bijbel ta bisa tambe: “Dios lo husga esnan cu ta comete fornicacion y adulterio.” (Hebreonan 13:4) Ora nos reflexiona riba e palabranan inspira ey, nos ta compronde bon cla kico ta e boluntad di Jehova. Pesey nos ta dicidi pa no entretene nos mes cu programanan hopi grafico cu ta presenta e sorto di practicanan ey cu nos Dios ta odia. Nos sa cu Jehova ta keda contento ora nos ta evita e sushedad moral cu e mundo aki kier laga nos kere ta diberticion inofensivo.a

10, 11. Dicon nos ta scoge pa obedece Jehova, y cu ki actitud nos ta obedec’e?

¹⁰ Cua ta e motibo principal cu nos ta cumpli cu e mandamentonan di Dios? Pakico nos kier biba tur dia manera Dios kier? Nos no ta biba asina djis pa scapa castigo of pa evita e consecuencianan cu esnan cu ta ignora e boluntad di Dios ta experencia. (Galationan 6:7) Mas bien, nos ta considera nos obediencia na Jehova como un bon oportunidad pa demostra cu nos ta stim’e. Mescos cu un mucha ta ansioso pa haya e aprobacion di su tata, asina nos ta desea di haya e aprobacion di Jehova. (Salmo 5:12) E ta nos Tata, y nos stim’e. No tin nada cu ta duna nos mayor goso y satisfaccion cu sa cu e manera cu nos ta biba tin e aprobacion di Jehova.—Proverbionan 12:2.

¹¹ Pues, nos no ta obedece Dios di mala gana, ni na un manera selectivo ni cu condicion.b Nos no ta obedec’e solamente ora ta cumbini nos of ora ta facil pa obedece. Al contrario, nos ta “obediente di curason.” (Romanonan 6:17) Nos ta bisa mescos cu e escritor di salmo: “Lo mi tin delicia den bo mandamentonan cu mi ta stima.” (Salmo 119:47) Si, ta un placer pa obedece Jehova. Nos ta reconoce cu e merece—y de echo ta rekeri—pa nos obedec’e sin ningun condicion. (Deuteronomio 12:32) Patriarca Noe a obedece Dios fielmente pa hopi decada y asina a demostra cuanto e ta stim’e. Nos kier pa Jehova bisa di nos loke su Palabra ta bisa di Noe. Bijbel ta bisa: “Asina Noe a haci; conforme tur loke Dios a orden’e, el a haci.”—Genesis 6:22.

12. Ki ora nos obediencia ta haci Jehova su curason contento?

¹² Con Jehova ta sintie ora e mira nos obedec’e di buena gana? Su Palabra ta bisa cu nos ta ‘haci su curason contento.’ (Proverbionan 27:11) Pero, di berdad nos obediencia por alegra e curason di e Señor Soberano di universo? Claro cu si! Laga nos wak dicon. Jehova a crea nos cu boluntad liber. Esey ta nifica cu nos tin e libertad di scoge; nos por scoge pa obedece Dios, of nos por scoge pa desobedec’e. (Deuteronomio 30:15, 16, 19, 20) Cada bes cu nos scoge boluntariamente pa obedece ­Jehova pasobra nos ta stim’e di henter nos curason, nos ta duna nos Tata celestial gran goso y satisfaccion. (Proverbionan 11:20) Alabes nos ta scogiendo e mihor manera di biba.

“SU MANDAMENTONAN NO TA PISA”

13, 14. Dicon nos por bisa cu Dios “su mandamentonan no ta pisa”, y con nos por ilustra esey?

¹³ Apostel Juan ta agrega algun palabra trankilisante tocante e rekisitonan di Jehova: “Su mandamentonan no ta pisa.”c Un otro traduccion di Bijbel ta bisa na 1 Juan 5:3: “Su mandamentunan no ta un peso pa nos.” (Beibel na papiamentu koriente) E rekisitonan di Jehova no ta irasonabel ni opresivo. A pesar cu hende ta imperfecto, no ta imposibel pa nan obedece su leynan.

¹⁴ Nos lo por ilustra esey asin’aki. Un bon amigo ta pidi bo yud’e muda pa un otro cas. E tin hopi caha pa bay cu ne. Algun di nan, un hende so por carga, pero tin otro cu ta pisa y mester di dos hende pa hisa nan. Bo amigo ta scoge e cahanan cu e kier pa bo yud’e cu ne. Lo e pidi bo hisa e cahanan cu e sa ta ­mucho pisa pa bo? No. Lo e no kier pa bo nek bo lomba ora bo purba carga nan bo so. Asina tambe, nos Dios amoroso y bondadoso no ta pidi nos cumpli cu mandamentonan cu ta mucho dificil pa nos. (Deuteronomio 30:11-14) Nunca lo e no pidi nos carga un peso asina pisa. Jehova ta compronde nos limitacionnan, pasobra “e sa di kico nos ta traha; e ta corda cu ta stof nos ta.”—Salmo 103:14.

15. Dicon nos por ta sigur cu e mandamentonan di Jehova ta pa nos mes bon?

¹⁵ Jehova su mandamentonan definitivamente no ta pisa; al contrario, nan ta pa nos mes bon. (Isaias 48:17) Pesey Moises por a bisa Israel di antiguedad: “SEÑOR a ordena nos pa cumpli cu tur e statutonan aki, pa semper teme SEÑOR nos Dios pa nos mes bon, y pa nos sobrevivi, manera ta awe.” (Deuteronomio 6:24) Nos tambe por ta sigur cu e echo cu Jehova a duna nos su leynan ta pasobra e tin nos bienestar na pecho, si, nos bienestar eterno. En realidad, esey no por ta otro; Jehova ta un Dios di sabiduria infinito. (Romanonan 11:33) Pues, e sa kico ta mihor pa nos. Ademas, Jehova mes ta amor. (1 Juan 4:8) Amor, e parti esencial di Dios, ta motiv’e den tur loke e ta haci y bisa. Amor ta e base di tur mandamento cu e ta duna su sirbidornan.

16. Con bin nos por sigui obedece Dios a pesar di e influencia di e mundo degrada aki y di nos carni imperfecto?

¹⁶ Esaki no kiermen cu ta facil pa obedece Dios. Nos tin cu lucha contra e influencianan di e mundo degrada aki cu “ta den poder di e Malbado.” (1 Juan 5:19) Tambe nos tin cu lucha contra nos carni imperfecto cu ta inclina pa bay contra e leynan di Dios. (Romanonan 7:21-25) Pero nos amor pa Dios por triunfa den e lucha aki. Jehova ta bendiciona hende cu kier obedec’e pasobra nan stim’e. E ta duna su spirito santo “na esnan cu ta obedec’e.” (Echonan 5:32) E spirito ey ta produci bon fruta den nos, esta, cualidadnan excelente cu por yuda nos sigui obedece Dios.—Galationan 5:22, 23.

17, 18. (a) Kico nos lo analisa den e buki aki, y kico nos tin cu corda segun cu nos ta haci esaki? (b) Kico nos lo considera den e siguiente capitulo?

¹⁷ Den e buki aki nos lo bay analisa Jehova su principionand y normanan moral y tambe hopi otro indicacion di kico ta su boluntad. Segun cu nos ta haci esey, nos tin cu corda algun punto importante. Di prome, Jehova no ta obliga nos obedece su ley- y principionan; e kier pa nos obedec’e di curason. Di dos, e manera cu Jehova kier pa nos biba ta trece hopi beneficio awor y lo hiba na bida eterno den futuro. Por ultimo, no lubida cu si nos obedece Jehova di curason, esey ta un oportunidad magnifico pa demostr’e cuanto nos ta stim’e.

¹⁸ Pa yuda nos distingui bon for di malo, Jehova, como muestra di su amor, a duna nos un regalo: nos consenshi. Pero pa nos consenshi por ta un guia confiabel, nos tin cu educ’e. Nos lo bay considera con ta haci esaki den e siguiente capitulo.