LES 11
Con Bo Por Saca Maximo Beneficio for di Bo Lesamento di Bijbel?
Bo a yega di haya un proyecto grandi pa haci? Kisas bo a sinti cu e proyecto ta mucho dificil, y bo a pensa dos biaha prome cu bo a cuminsa cu ne. Awor, pa e proyecto ey por parce mas facil, bo a dicidi di hacie tiki tiki. Kisas bo ta haya cu lesamento di Bijbel ta un proyecto grandi. Kisas bo ta puntra bo mes: Unda pa cuminsa? Den e les aki, nos lo trata algun punto cu por yuda bo disfruta di bo lesamento di Bijbel y di bo curso di Bijbel.
1. Dicon nos mester lesa Bijbel tur dia?
Un persona cu ta lesa Bijbel of e Ley di Jehova tur dia lo ta feliz y exitoso. (Lesa Salmo 1:1-3.) Pa bo por cuminsa cu bo lesamento di Bijbel, purba di lesa Bijbel djis pa un par di minuut tur dia. Mas bo lesa Bijbel, mas gana bo ta haya di sigui les’e.
2. Con lesamento di Bijbel por yuda bo?
Pa bo por saca maximo beneficio for di bo lesamento di Bijbel, bo mester stop un rato durante bo lesamento y pensa riba loke bo ta lesando. Pues, nos meta mester ta pa lesa Bijbel y medita riba loke nos ta lesa. (Josue 1:8) Segun cu bo ta lesa, haci bo mes pregunta manera: Kico esaki ta siña mi tocante Jehova Dios? Con mi por uza loke mi a caba di siña den mi bida? Con mi por uza e textonan aki pa yuda otro hende?
3. Na ki momento di dia ta mas facil pa bo lesa Bijbel?
Bo ta sinti cu ta dificil pa bo traha tempo pa lesa Bijbel? No ta abo so ta sinti asina. Bijbel ta anima nos pa uza nos “tempo di e mihor manera.” (Efesionan 5:16) Pa haci esey, scoge un ora specifico pa lesa Bijbel tur dia. Por ehempel, tin hende ta aparta tempo pa lesa Bijbel mainta trempan. Otro hende ta lesa Bijbel merdia, kisas durante nan pauze. Anto tin otro hende ta lesa Bijbel anochi prome cu nan bay drumi. Ki ora lo ta e mihor momento pa abo lesa Bijbel?
KICO MAS NOS POR SIÑA?
Laga nos wak con bo por haci bo lesamento di Bijbel mas interesante. Ademas, wak con bo por prepara e lesnan di bo curso di Bijbel pa asina bo saca maximo beneficio for di nan.
Kisas antes nos no tabata gusta un tipo di cuminda, pero cu tempo nos a cuminsa gust’e. Asina tambe nos por cuminsa gusta lesa Bijbel
4. Siña gusta lesamento di Bijbel
Kisas no ta facil pa bo cuminsa lesa Bijbel. Sinembargo, mescos cu bo por cuminsa gusta un cuminda cu nunca bo a yega di purba prome, asina bo por cuminsa gusta lesa Bijbel of “crea un anhelo [of, haya deseo]” pa les’e. Lesa 1 Pedro 2:2. Despues, analisa e siguiente pregunta:
Si bo lesa Bijbel tur dia, bo ta kere cu lo bo disfruta di dje y haya gana di sigui les’e?
Pasa e VIDEO pa wak con algun hende a cuminsa disfruta di nan lesamento di Bijbel. Despues, analisa e siguiente preguntanan:
Ki obstaculo e hobennan den e video mester a vence?
Kico a yuda nan pa sigui lesa Bijbel tur dia?
Con e hobennan a haci nan lesamento di Bijbel mas interesante?
Idea pa cuminsa lesa Bijbel:
Scoge un traduccion di Bijbel cu ta confiabel y facil pa lesa. Ora di scoge un traduccion di Bijbel, bo por uza Traduccion di Mundo Nobo. Un parti di dje so ta disponibel na Papiamento. Ademas, Traduccion di Mundo Nobo completo ta disponibel na Spaño y na otro idioma.
Bo por cuminsa lesa un parti di Bijbel cu ta parce bo mas interesante. Pa bo haya un idea kico bo por cuminsa lesa, wak e cuadro “Lesa Bijbel Tur Dia.”
Marca loke bo a lesa caba. Uza e schema “Mi Lesamento di Bijbel” den e publicacion aki pa marca loke bo a lesa.
Uza JW Library® app. Bo por uza e app aki pa lesa y scucha Bijbel na varios idioma riba bo telefon of tablet na unda cu bo ta.
Uza e foyeto Guia pa Studia e Palabra di Dios. Den e foyeto aki, bo por haya mapa y tabel cu lo yuda bo haci bo lesamento di Bijbel mas interesante.
5. Prepara pa bo curso di Bijbel
Lesa Salmo 119:34. Despues, analisa e siguiente pregunta:
Dicon ta importante pa bo haci oracion prome cu bo lesa Bijbel of prome cu bo prepara pa bo curso di Bijbel?
Pa saca maximo beneficio for di bo curso di Bijbel, kico bo mester haci prome cu cada les? Ata algun sugerencia pa yuda bo prepara pa e lesnan:
Lesa e prome parti di cada les.
Busca tur texto den Bijbel y lesa nan. Purba di compronde con e textonan ta relaciona cu e informacion.
Marca e palabra- of frasenan principal cu ta contesta cada pregunta. Esey lo yuda bo ora di analisa e lesnan hunto cu e persona cu ta duna bo les.
Bo tabata sa?
A traves di añanan, testigonan di Jehova a uza varios traduccion di Bijbel. Pero nos ta gusta uza Traduccion di Mundo Nobo di e Santo Scritura pasobra e ta un traduccion exacto, facil pa compronde y e tin e nomber di Dios den dje.—Wak e articulo “Testigonan di Jehova Tin Nan Mes Bijbel?” riba jw.org.
LOKE HENDE SA BISA: “Bo mester haci hopi esfuerso pa lesa y studia Bijbel, y ami no tin tempo ni energia pa haci esey.”
Kico abo mes ta pensa?
RESUMEN
Pa bo saca maximo beneficio for di loke Bijbel ta siña, traha tempo pa lesa Bijbel, pidi Jehova yuda bo compronde loke bo ta lesa y prepara e lesnan di bo curso di Bijbel.
Repaso
Kico lo yuda bo saca maximo beneficio for di Bijbel?
Ki ora abo mes por lesa y studia Bijbel?
Dicon ta bon pa bo prepara pa bo curso di Bijbel?
MAS INFORMACION INTERESANTE
Wak algun sugerencia cu por yuda bo saca maximo beneficio for di bo lesamento di Bijbel.
“Con Bo Por Beneficia Mas di Bo Lesamento di Bijbel?” (E Toren di Vigilancia Num. 1 2017)
Wak tres manera cu bo por lesa Bijbel.
“Con Bijbel Por Yuda Mi?—Parti 1: Siña Conoce Bo Bijbel” (articulo riba jw.org)
Wak kico por yuda bo disfruta di bo lesamento di Bijbel.
Wak ki sugerencia algun hende cu tin hopi tempo ta lesa Bijbel ta duna tocante con pa studia Bijbel.