LES 56
Keda Uni cu Otro den Congregacion
Ora nos ta hunto cu nos rumannan, nos ta sinti mescos cu Rey David, kende a bisa: “Esta bon, esta dushi ta ora ruman ta biba hunto den union!” (Salmo 133:1) E union cu nos tin no ta bin di su mes. Cada un di nos mester haci nos parti pa yuda e congregacion keda uni.
1. Kico ta algo remarcabel cu e pueblo di Dios tin?
Si bo bishita un congregacion na un otro pais, kisas lo bo no compronde e idioma pero lo bo sinti bo na cas entre bo rumannan. Con bin? Pasobra tur caminda nos ta studia Bijbel uzando e mesun publicacionnan. Anto nos ta haci esfuerso pa mustra amor na otro. Sin importa unda nos ta biba, nos tur ta adora Jehova den union.—Sofonias 3:9, nota.
2. Kico bo por haci pa contribui na e union den congregacion?
Nos mester “stima otro intensamente di curason.” (1 Pedro 1:22) Con bo por sigui e conseho aki? No enfoca riba e imperfeccionnan di bo rumannan. Mas bien, wak nan bon cualidadnan. Ademas, no pasa tempo solamente cu e rumannan cu tin e mesun interesnan cu bo. Purba di conoce e rumannan cu ta diferente for di bo tambe. Nos mester haci esfuerso tambe pa kita tur prehuicio, esta, cualkier opinion negativo sin base cu nos por tin di otro hende.—Lesa 1 Pedro 2:17.a
3. Kico bo mester haci ora bo tin un desacuerdo cu un ruman?
Ta berdad cu nos ta uni; pero debi cu nos ta imperfecto, tin biaha nos por desapunta otro of hasta pone otro sinti malo. Pesey, e Palabra di Dios ta bisa nos: “Sigui ... pordona otro.” Anto e ta sigui bisa: “Mescos cu Jehova a pordona boso libremente, boso tambe mester haci mescos.” (Lesa Colosensenan 3:13.) Aunke nos ta haci Jehova tristo hopi biaha, toch e ta pordona nos. Pesey, e kier pa nos tambe pordona nos rumannan. Si bo ripara cu bo a haci of papia algo cu a pone un persona sintie malo, tuma iniciativa pa drecha asunto.—Lesa Mateo 5:23, 24.b
KICO MAS NOS POR SIÑA?
Wak kico bo por haci pa mantene paz y union den congregacion.
Kico abo lo haci pa cera paz cu un ruman?
4. Vence prehuicio
Nos kier mustra amor na tur nos rumannan. Pero kisas nos ta haya dificil pa acepta un ruman cu ta parce diferente for di nos. Kico por yuda nos den un caso asina? Lesa Echonan 10:34, 35. Despues, analisa e siguiente preguntanan:
Jehova ta acepta tur sorto di persona cu kier ta su Testigo. Con bo por imita Jehova den e manera cu bo ta mira hende cu ta diferente for di bo?
Ki tipo di prehuicio cu ta comun caminda bo ta biba bo mester evita?
Lesa 2 Corintionan 6:11-13. Despues, analisa e siguiente pregunta:
Con bo por haya mas y mas amor pa tur bo rumannan?
5. Sea cla pa pordona y haci paz
Jehova ta cla pa pordona nos aunke e mes nunca tin mester pa nos pordon’e. Lesa Salmo 86:5. Despues, analisa e siguiente preguntanan:
Kico e texto aki ta siña bo tocante e manera cu Jehova ta pordona?
Bo ta agradecido pa e echo cu Jehova ta pordona nos? Dicon?
Den ki situacion por ta dificil pa nos keda na paz cu nos rumannan?
Con nos por imita Jehova y asina keda uni cu nos rumannan? Lesa Proverbionan 19:11. Despues, analisa e siguiente pregunta:
Ora un hende irita bo of ofende bo, kico bo por haci pa mehora e situacion?
Tin biaha, ta nos ta ofende otro hende. Kico nos tin cu haci ora esey pasa? Pasa e VIDEO. Despues, analisa e siguiente pregunta:
Kico a yuda e ruman muher den e video haci paz cu su ruman?
6. Enfoca riba e bon cualidadnan di bo rumannan
Ora nos siña conoce nos rumannan mihor, nos lo haya sa nan puntonan fuerte y nan puntonan menos fuerte. Kico lo yuda nos enfoca riba nan puntonan fuerte? Pasa e VIDEO. Despues, analisa e siguiente pregunta:
Kico por yuda bo mira e bon cualidadnan di bo rumannan?
Jehova ta enfoca riba nos bon cualidadnan. Lesa 2 Cronicanan 16:9a. Despues, analisa e siguiente pregunta:
Ora bo corda cu Jehova ta enfoca riba bo bon cualidadnan, con esey ta pone bo sinti?
Hasta un diamanta bunita tin defecto; pero toch e ta keda algo valioso. Di mes manera, aunke tur nos rumannan ta imperfecto, nan ta precioso pa Jehova
LOKE HENDE SA BISA: “Mi por pordona si, pero mi no por lubida.”
Dicon nos mester pordona otro di curason?
RESUMEN
Ora bo ta pordona y mustra amor na tur bo rumannan, bo por yuda mantene union den congregacion.
Repaso
Kico bo mester haci pa vence prehuicio?
Kico bo mester haci si bo tin un desacuerdo cu un ruman den congregacion?
Bo kier imita e manera cu Jehova ta pordona otro hende? Dicon?
MAS INFORMACION INTERESANTE
Den un ilustracion, Hesus a mustra cu nos no mester husga otro hende. Wak con e ilustracion ey por yuda nos.
Nos mester pidi despensa si nos ta sinti cu nos no a haci nada malo?
“Pidi Despensa—E Clave pa Haci Paz” (E Toren di Vigilancia di 1 di november 2002)
Wak con algun hende a siña trata otro hende sin prehuicio.
Wak con bo por resolve desacuerdo cu bo tin cu otro hende prome cu esey afecta paz di e congregacion.
“Resolve Desacuerdo cu Amor” (E Toren di Vigilansia di mei 2016)