Keda Vigila Mescos cu Hesus

“Keda vigila y haci oracion.”​—MAT. 26:41.

1, 2. (a) Ki preguntanan por surgi encuanto Hesus su ehempel como un persona cu a keda vigila? (b) Hende imperfecto por imita e ehempel perfecto di Hesus? Ilustra.

‘HENDE por keda vigila mescos cu Hesus?’ Abo a yega di haci bo mes e pregunta ey? Casi sigur bo ta pensa cu esey ta imposibel pasobra Hesus tabata un homber perfecto. Ademas, tabatin ocasion cu Hesus por a mira adelanta kico lo a sosode miles di aña den futuro. Siendo cu esey tabata e caso, lo bo por puntra: ‘Hesus tabatin motibo pa keda vigila?’ (Mat. 24:37-39; Heb. 4:15) Ora nos haya contesta pa e preguntanan ey, nos por compronde dicon ta importante y urgente pa nos keda vigila awe. Pues, laga nos ban trata nan.

² Un hende imperfecto por imita un ehempel perfecto? Si, mescos cu un studiante por siña for di e ehempel di un bon maestro. Imagina bo e siguiente situacion: Un homber ta siña tira flecha pa prome biaha. Como cu despues di su prome les, e no ta logra tira su flechanan di tal manera cu nan ta alcansa e blanco, e ta sigui tuma les y ta sigui purba. Pa e por mehora, e ta wak bon con su instructor, un experto den tiramento di flecha, ta tira su flechanan. E ta wak con e instructor ta para, con e ta pone su mannan y con e ta uza su dedenan riba e liña di e boog. Tiki tiki e studiante dicidido aki ta compronde cuanto tension e tin cu pone riba e liña. E ta siña tambe cu e tin cu tene cuenta cu biento y ta sigui haci esfuerso. Segun cu e ta imita su instructor, e ta logra tira su flechanan mas y mas cerca di e blanco. Di mes manera, nos tin cu sigui haci esfuerso pa mehora nos cualidadnan cristian. Con? Nos mester sigui e instruccionnan di Hesus y imita su ehempel perfecto.

3. (a) Con Hesus a indica cu e mester a keda vigila? (b) Kico nos lo trata den e articulo aki?

³ Awor, Hesus realmente tabatin motibo pa keda vigila? Si. Pensa riba e ultimo anochi cu e tabata riba tera. El a urgi su fiel apostelnan: “Keda lanta hunto cu mi.” Despues el a bisa nan: “Keda vigila y haci oracion continuamente pa boso no cay den tentacion.” (Mat. 26:38, 41) Hesus semper a keda vigila. Pero durante e oranan dificil ey, e kier a keda aun mas alerta y mas tanto posibel den contacto cu su Tata selestial. Y e tabata sa cu su discipelnan tambe mester a keda alerta mescos cu ne​—no e ora ey so, sino den futuro tambe. Pesey, laga nos ban wak awor dicon Hesus kier pa nos tambe keda vigila. Despues di esey, nos lo analisa tres manera cu nos por keda vigila den nos bida diario mescos cu Hesus.

DICON HESUS KIER PA NOS KEDA VIGILA?

4. Dicon nos tin cu keda vigila?

⁴ Cu poco palabra, Hesus kier pa nos keda vigila pasobra aunke nos sa hopi cos encuanto futuro, nos no sa tur cos. Awor kico di Hesus? Ora e tabata riba tera, e tabata sa tur cos encuanto futuro? No, humildemente el a reconoce: “Pa loke ta e dia y ora ey, ningun hende no sa, ni e angelnan di cielo ni e Yiu, sino e Tata so.” (Mat. 24:36) Pues, e tempo ey, Hesus, “e Yiu”, no tabata sa precies ki dia e fin di e mundo malbado aki lo bini. Kico di nos awe? Nos tampoco no sa precies ta ki dia Jehova lo manda su Yiu pa caba cu e mundo malbado aki. Si nos tabata sa, nos lo no tin nodo di keda vigila, no ta berdad? Pero manera Hesus a bisa, e fin lo bini diripiente. Pues, nos tin cu keda vigila.​—Lesa Mateo 24:43.

5, 6. (a) Con loke nos sa tocante futuro y Dios su proposito ta yuda nos keda vigila? (b) Dicon loke nos sa tocante Satanas mester haci nos mas determina pa keda vigila?

⁵ Di otro banda, Hesus tabata sa cosnan maraviyoso encuanto futuro cu mayoria di hende rond di dje no tabata sa. Kico di nos? Aunke nos no sa mes hopi cu Hesus, for di loke el a siña hende, nos a haya sa hopi tocante e Reino di Dios y loke esaki lo logra den futuro. Ora nos wak rond di nos, sea na scol, na trabou of den e teritorio caminda nos ta predica, kico nos ta ripara? Wel, cu mayoria di hende no sa e berdadnan maraviyoso aki. Anto esey ta un otro motibo pa keda vigila. Mescos cu Hesus, semper nos mester ta alerta pa probecha di tur oportunidad cu presenta pa comparti loke nos sa tocante e Reino di Dios. Nos no kier perde niun di e oportunidadnan valioso ey, pasobra bida di hende ta den wega!​—1 Tim. 4:16.

⁶ Hesus tabata sa tambe cu Satanas tabata dicidido pa lag’e cay den tentacion, pa persiguie y pon’e kibra su integridad. Esey ta un otro motibo pakico Hesus a keda vigila. E enemigo cruel ey semper a keda alerta y tabata busca “un otro momento oportuno” pa pone Hesus na prueba. (Luc. 4:13) Hesus semper a keda vigila pasobra e tabata kier ta prepara pa cualkier prueba, sea ta tentacion, oposicion of persecucion. Nos ta den e mesun situacion. Nos sa cu ainda Satanas ta ‘manera un leon cu ta brul, buscando ken e por habraca.’ Ta pesey, e Palabra di Dios ta conseha tur cristian: “Mantene boso sano huicio y sea alerta.” (1 Ped. 5:8) Pero con nos por haci esey?

ORACION TA YUDA NOS KEDA ALERTA

7, 8. Ki conseho Hesus a duna encuanto oracion, y ki ehempel e mes a pone?

⁷ Segun Bijbel, pa nos keda alerta, of vigila, y asina proteha nos relacion cu Jehova, oracion ta masha importante. (Col. 4:2; 1 Ped. 4:7) Poco despues cu Hesus a pidi su discipelnan pa keda lanta hunto cu ne, el a bisa nan: “Keda vigila y haci oracion continuamente pa boso no cay den tentacion.” (Mat. 26:41) E conseho ey a conta solamente pa Hesus y su discipelnan, kendenan tabata pasando den momentonan dificil? No, e ta un conseho cu nos tambe mester sigui tur dia.

⁸ Anto Hesus mes a mustra con importante oracion ta. Podise bo ta corda cu el a yega di pasa henter un anochi haciendo oracion na su Tata. Laga nos purba visualisa e escena. (Lesa Lucas 6:12 y 13.) Ta lente y probablemente Hesus ta cerca di Capernaum, e stad di piscado, na Galilea. Ora ta cuminsa bira nochi, Hesus ta subi un di e seronan for di cua e tin un bista riba Lama di Galilea. Segun cu ta bira mas y mas scur, probablemente e ta mira algun luz di lampi di zeta ta briya na Capernaum y den e pueblonan den bisindario. Pero unabes cu Hesus cuminsa haci oracion na Jehova, e no ta laga nada distra’ele. Ora ta bay. E no ta ripara mes cu e luznan ta paga un tras di otro, cu luna ta sali ni e no ta tende e zonido di e bestianan cu ta move den bisindario. Probablemente e ta haciendo oracion encuanto un decision importante cu e tin cu tuma; e tin cu scoge 12 apostel. Siguramente Hesus lo a desahoga su mes cerca su Tata y a cont’e tur loke e tabata pensa y tur loke tabata preocup’e tocante cada discipel y a pidie guia y sabiduria.

9. Kico nos por siña for di e echo cu Hesus a haci oracion henter anochi?

⁹ Kico nos por siña for di e ehempel di Hesus? Cu nos oracionnan mester dura oranan largo? No, pasobra relaciona cu su discipelnan, e mes a admiti bondadosamente: “Ta claro cu e spirito tin e boluntad, ma e carni ta debil.” (Mat. 26:41) No obstante, nos por imita Hesus. Con? Un manera ta di consulta cu nos Tata selestial prome cu nos tuma cualkier decision cu por tin efecto riba nos, nos famia y nos rumannan den fe. Ademas, nos por haci oracion pa nos rumannan den congregacion. Corda tambe cu nos oracionnan mester ta di curason y no un ripiticion di cierto expresionnan fiho. Ripara tambe cu Hesus a tuma tempo pa papia den priva cu su Tata. Den e mundo ocupa y ansha cu nos ta biba awe ta masha facil pa lubida di haci e cosnan di mas importante. Pa nos keda alerta, nos tin cu tuma suficiente tempo pa haci oracion di curason y den priva. (Mat. 6:6, 7) Y esey lo yuda nos hala mas cerca Jehova, y nos lo haci tur loke ta necesario pa fortifica nos relacion cu ne y evita tur loke por daña e relacion ey.​—Sal. 25:14.

KEDA ALERTA DEN E TRABOU DI PREDICA

10. Ki ehempel ta mustra cu Hesus a keda alerta y a probecha di tur oportunidad pa duna testimonio?

¹⁰ Hesus a keda alerta segun cu e tabata haci e trabou cu Jehova a dun’e. Tin cierto trabounan cu ta permiti hende pensa riba otro cos segun cu nan ta traha sin cu esaki tin consecuencia serio. Sinembargo, hopi trabou ta exigi pleno atencion y pa e trahado ta alerta. Y e trabou di predica sigur ta un di nan. Hesus semper tabata alerta den su sirbishi na Dios y tabata busca oportunidad pa comparti e bon noticia. Por ehempel, na un ocasion ora e y su discipelnan a yega e stad Sicar despues cu nan a cana henter mainta, su discipelnan a bay cumpra cuminda. Hesus si a keda atras na e pos di e stad pa sosega. Ma el a keda alerta y a mira un oportunidad pa duna testimonio. Dado momento un muher Samaritano a bin saca awa na e pos. Awor, Hesus por a dicidi di drumi un rato of bini cu excuus pa evita un combersacion. Ma e no a haci esey; mas bien, el a cuminsa combersa cu e señora y a dun’e un bon testimonio cu despues tabatin efecto riba bida di hopi hende den e stad ey. (Juan 4:4-26, 39-42) Nos por haci mas esfuerso pa imita Hesus? Nos por ta mas alerta y probecha di tur oportunidad pa comparti e bon noticia cu hende cu nos ta topa tur dia?

11, 12. (a) Kico Hesus a bisa e hendenan cu kier a kita su atencion for di su trabou? (b) Con Hesus a demostra cu e tabata un persona balansa?

¹¹ Na algun ocasion tabatin hende, cu bon intencion, cu a purba di kita Hesus su atencion for di su trabou. Na Capernaum, por ehempel, e hendenan a keda asina conmovi pa Hesus su milagernan cu nan tabata kier a ten’e cerca nan. Y esey ta comprendibel. Sinembargo, Hesus tabatin e asignacion pa predica na tur “e carnenan perdi di e cas di Israel” y no den un stad so. (Mat. 15:24) Pesey el a bisa e hendenan ey: “Mi tin cu declara e bon noticia di e Reino di Dios na e otro stadnan tambe, pasobra ta pa esaki Dios a manda mi.” (Luc. 4:40-44) Ta bisto anto cu e cos di mas importante den bida di Hesus tabata e trabou di predica y di siña hende. Y e no a laga nada strob’e di cumpli cu esey.

¹² Pero el a enfoca asina tanto riba su trabou cu el a bira un fanatico of un persona cu a priva su mes di tur placer? Of e tabata asina ocupa den su sirbishi cu e no tabata consciente di e otro necesidadnan di hende? No, el a pone un ehempel perfecto como un persona balansa. El a disfruta di bida y a pasa momentonan placentero hunto cu su amigonan. Ademas, e tabatin aprecio pa hende; el a mustra interes den nan necesidad- y problemanan y a mustra cariño na mucha.​—Lesa Marco 10:13-16.

13. Con nos por keda vigila y balansa den nos trabou di predica mescos cu Hesus?

¹³ Con nos por haci esfuerso pa ta balansa mescos cu Hesus segun cu nos ta keda vigila? Nos no ta laga e mundo aki kita nos atencion for di nos trabou. Asta amigo y famia cu bon intencion kisas ta urgi nos pa baha man den sirbishi of pa hiba un bida cu segun nan ta normal. Pero si nos ta imita Hesus, nos ta considera nos sirbishi mes importante cu cuminda. (Juan 4:34) Dicon? Pasobra nos trabou ta fortifica nos relacion cu Jehova y ta duna nos goso. No obstante, nunca nos kier ta personanan desbalansa cu ta husto den nan mes bista of cu ta priva nan mes di tur placer. Mescos cu Hesus, nos kier ta feliz y balansa, sirbiendo “e Dios feliz.”​—1 Tim. 1:11.

KEDA VIGILA DURANTE PRUEBA

14. Ki tendencia nos tin cu resisti ora nos ta confronta prueba, y dicon?

¹⁴ Manera nos a mira caba, ora Hesus tabata bou di prueba severo, el a urgi su discipelnan pa keda vigila. (Lesa Marco 14:37.) Ora nos haya nos den situacion dificil, ta masha importante pa nos imita Hesus su ehempel. Pero ora hende ta bou di prueba, hopi di nan ta lubida un berdad masha importante; e ta asina importante cu e buki di Proverbionan ta mencion’e dos bes: “Tin un caminda cu ta parce bon den bista di hende, ma su fin ta e caminda di morto.” (Pro. 14:12; 16:25) Pues, si nos depende riba nos mes pensamentonan, specialmente ora nos ta confronta problema serio, tin hopi chens cu nos ta pone nos mes y esnan cu nos ta stima den peliger.

15. Ki tentacion un cabes di famia cu ta lucha pa percura pa su famia por hay’e cu ne?

¹⁵ Un cabes di famia, por ehempel, por tin dificultad pa percura materialmente pa “e hendenan di su cas.” (1 Tim. 5:8) Lo e por haya gana di acepta un trabou aunke esaki lo por strob’e di asisti regularmente na su reunionnan cristian, dirigi su adoracion como famia of participa den sirbishi. Si e ta depende unicamente riba su pensamentonan, esey por parce un decision hustifica, asta corecto. Sinembargo, un decision asina por pon’e daña su relacion cu Jehova y asta bandona e congregacion cristian. Pues ta mucho mas mihor pa sigui e conseho di Proverbionan 3:5 y 6. Eynan Salomon a bisa: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.”

16. (a) Riba ken su sabiduria Hesus a depende, y kico esaki ta siña nos? (b) Con hopi cabes di famia ta imita Hesus su ehempel durante tempo dificil?

¹⁶ Ora Hesus tabata bou di prueba, conscientemente e no a depende riba su mes comprondemento. Djis pensa riba esey! E homber di mas sabi cu a yega di biba riba tera a scoge pa no depende riba su mes sabiduria. Por ehempel, ora Satanas a purba hinca Hesus den tentacion, bes tras bes el a contest’e cu e frase aki: “Ta para skirbi.” (Mat. 4:4, 7, 10) El a depende riba e sabiduria di su Tata pa resisti tentacion y asina a mustra humildad, un cualidad cu Satanas no tin y cu e ta desprecia. Kico di nos? Nos ta haci mescos cu Hesus? Un cabes di famia cu ta keda vigila mescos cu Hesus semper ta sigui e guia di e Palabra di Dios, specialmente den tempo dificil. Y esey ta loke miles di cabes di famia ta haci rond mundo. Consistentemente nan ta pone e Reino di Dios y adoracion berdadero na prome luga den nan bida, asta prome cu cos material. Di e manera ey, nan ta duna nan famia lo mihor. Y Jehova, na su turno, ta bendiciona e esfuerso cu nan ta haci pa percura pa nan necesidadnan material, manera su Palabra ta priminti.​—Mat. 6:33.

17. Kico ta motiva bo pa keda vigila mescos cu Hesus?

¹⁷ No tin duda, Hesus a pone e mihor ehempel pa nos; si nos kier keda vigila, nos tin cu imit’e. Su ehempel ta practico, bon pa nos y por asta salba bida. No lubida cu Satanas su deseo di mas grandi ta pa bo pega soño y bira debil den sentido spiritual, y asina perde bo celo pa adora Jehova y kibra bo integridad. (1 Tes. 5:6) No dun’e chens di cumpli cu su deseo! Keda vigila mescos cu Hesus​—tuma tempo pa haci oracion, sea alerta den sirbishi y depende riba e sabiduria di Dios ora di trata cu prueba. Asina, lo bo ta feliz y lo bo disfruta di un bida cu proposito y cu ta duna satisfaccion asta den e ultimo dianan di e mundo aki cu ta cerca di yega na su fin. Ademas, si bo keda vigila, ora Hesus bini pa trece fin na e mundo aki, lo e haya bo alerta y activo, haciendo e boluntad di su Tata. Y Jehova lo ta contento pa recompensa bo pasobra bo a keda fiel y leal na dje.​—Rev. 16:15.

[Plachi na pagina 16]

Hesus a duna e muher na e pos testimonio. Ki oportunidad abo ta probecha di dje pa predica tur dia?

[Plachi na pagina 17]

Si bo ta percura pa bo famia den sentido spiritual, bo ta demostra cu bo ta alerta