Kico Hesus A Pensa di Politica?

EESCRITORNAN di Evangelio a describi varios suceso durante e sirbishi di Hesus den cua el a hay’e confronta cu politica. Por ehempel, un poco despues cu el a batisa na edad di 30 aña, Diabel a ofrec’e e puesto di gobernante di mundo. Despues, durante su sirbishi, un multitud kier a hacie rey. Anto mas despues, algun hende a purba di hacie un activista politico. Con Hesus a reacciona? Laga nos analisa e sucesonan aki.

Gobernante di mundo. E Evangelionan ta conta cu Diabel a ofrece Hesus poder pa goberna “tur e reinonan di mundo.” Imagina bo con bon Hesus lo por a yuda humanidad cu ta sufri si e por a eherce e poder ey como gobernante di henter mundo! Pero Hesus a rechasa Satanas su oferta. Un persona cu sinceramente ta pensa cu ta e gobiernonan por yuda humanidad lo no a haci esey. (Mateo 4:8-11) Siendo cu Hesus a demostra cu e tabata masha interesa den humanidad, e mester tabatin un bon motibo pa rechasa e oferta ey.

Rey. Hopi hende den tempo di Hesus tabata desespera pa haya un gobernante cu por a soluciona nan problemanan economico y politico. Nan a keda impresiona cu loke Hesus por a haci, y pesey nan tabata kier pa e drenta den politica. Con el a reacciona? E Evangelio di Juan ta bisa: “Como cu Hesus tabata sa cu nan tabata cerca di bin gar’e pa hacie rey, el a kita for di eynan y bolbe bay su so den sero.” (Juan 6:10-15) Claramente, Hesus no kier a envolve su mes den politica.

Activista politico. Tuma nota di loke a pasa algun dia prome cu nan a mata Hesus. Discipel di e fariseonan (kendenan tabata na fabor di independencia for di e Imperio Romano) hunto cu partidario di Herodes (perteneciendo na un partido politico na fabor di Roma) a bin cerca Hesus. Nan kier a oblig’e duna su opinion tocante politica, y pesey nan a puntr’e si Hudiu mester paga belasting na gobierno di Roma.

E Evangelio di Marco ta bisa nos kico Hesus a contesta nan: “‘Pakico boso ta purba di coy mi den trampa? Mustra mi un denario.’ Nan a trece un p’e. Y el a puntra nan: ‘Ta ken su cara y titulo esaki ta?’ Nan di cu ne: ‘Di Cesar.’ E ora ey Hesus a bisa nan: ‘Duna Cesar loke ta di Cesar, ma Dios loke ta di Dios.’” (Marco 12:13-17) Comentando riba e motibo pakico Hesus a contesta asina, e buki na Ingles Iglesia y Estado​—Historia di Dos Reino a bisa: “El a nenga di hunga e papel di un mesias politico y cuidadosamente a establece e limite entre loke ta pertenece na Cesar y loke ta pertenece na Dios.”

Esaki no kiermen cu Hesus no tabata interesa den problemanan manera pobreza, corupcion y inhusticia. Al contrario, Bijbel ta mustra cu e condicion lamentabel di e hendenan rond di dje a conmov’e profundamente. (Marco 6:33, 34) Pero toch e no a start cu un campaña pa caba cu e inhusticia cu tabata reina den mundo, maske algun hende a purba di envolv’e den cierto asunto politico controversial di e tempo ey.

Pues, manera e ehempelnan aki ta mustra bon cla, Hesus a nenga di mete den asunto politico. Pero kico di cristiannan djawe? Nan mester ta den politica?