“Mi Comportacion Tabata Teribel”

MI PASADO:

Mi a crece den un bario di hende di poco recurso den un stad portuario cu yama Turku. Un tempo, mi tata tabata campeon di boxeo, y ami cu mi ruman homber mas chikito tambe tabata practica e deporte ey. Na scol, hopi bes nan tabata reta mi pa bringa; mesora mi tabata cla pa dal nan un par di mokete. Como teenager, mi a join un gang notorio, y mi a haya mi den peleanan mas violento ainda. Mi a cuminsa gusta musica di heavy-metal y tabata soña cu e idea di bira un artista di rock.

Mi a cumpra un set di drum, lanta un banda y no a dura mucho cu mi a bira e cantante principal di e banda. Riba stage, mi tabata gusta comporta mi na un manera wild. Nos style agresivo y aspecto salbahe a haci nos banda masha popular. Nos a cuminsa toca pa publico mas grandi, y nos a haci algun grabacion; e ultimo a haya bon acogida. Na final di añanan ’80, nos a bay Merca pa promove nos banda y a duna varios presentacion na New York y Los Angeles. Nos a logra establece contacto cu algun profesional den e mundo di farandula prome cu nos a regresa Finlandia.

Aunke mi tabata sinti mi bon den e banda, mi bida tabata falta sentido. E mundo dificil y competitivo di musica a laga mi keda desilusiona, y mi bida desenfrena tambe tabatin mi frustra. Ademas, mi tabata considera mi mes un mal hende y mi tabatin miedo di bay kima den fierno. Pesey mi a cuminsa busca contesta pa mi preguntanan den tur tipo di buki religioso. Y constantemente mi tabata roga Dios pa yudansa aunke mi tabata pensa cu nunca lo mi por a agrad’e.

BIJBEL A CAMBIA MI BIDA:

Pa mi gana mi pan di cada dia, mi tabata traha na postkantoor. Un dia, mi a haya sa cu un di mi coleganan ta Testigo di Jehova. Mi a hacie masha hopi pregunta, y su contestanan logico basa riba Bijbel a lanta mi curiosidad. Pesey mi a bay di acuerdo pa e duna mi les di Bijbel. Despues cu mi tabatin algun siman ta studia, mi banda a haya un oferta atractivo pa graba un album cu e posibilidad di lansa esaki na Merca. Esaki tabata un oportunidad cu mi no kier a perde pa nada di mundo.

Mi a bisa e Testigo cu tabata duna mi estudio di Bijbel cu mi tabatin masha gana di graba un album mas, anto despues di esey, lo mi a cuminsa tuma principionan biblico na serio. E no a duna su opinion; el a djis bisa mi pa lesa loke Hesus a bisa na Mateo 6:24. E texto ta bisa en parte: “Ningun hende no por ta esclavo di dos doño.” Ora mi a compronde kico e palabranan aki ta nifica, mi a keda asombra. Pero un par di dia despues, tabata e Testigo su beurt pa keda asombra: Mi a bis’e cu mi a sali for di e banda pasobra mi kier a sigui Hesus.

Bijbel tabata manera un spiel cu a saca mi erornan na cla. (Santiago 1:22-25) Mi a realisa cu mi tabata un persona orguyoso, di caracter agresivo y yen di ambicion insaciabel. Mi tabata papia palabra malo y gusta bringa, y mi tabata huma y bebe pisa. Ora mi a realisa cu mi estilo di bida no tabata na harmonia cu e principionan di Bijbel, mi a sinti mi frustra. Pero mi tabata dispuesto pa haci e cambionan necesario.—Efesionan 4:22-24.

Specialmente na cuminsamento, mi consenshi tabata remorde mi pa tur e cosnan robes cu mi a yega di haci. Pero e Testigo cu tabata studia Bijbel cu mi a yuda mi masha bon mes. El a mustra mi loke Bijbel ta bisa na Isaias 1:18: “Maske boso picanan ta manera escarlata, nan lo bira blanco manera sneeuw.” E texto aki y otro textonan di Bijbel a convence mi cu nos Tata celestial ta misericordioso y cu e kier cura herida di esnan cu ta arepenti di nan erornan.

Segun cu mi tabata siña conoce Jehova y haya amor p’e, mi deseo pa dedica mi bida na dje tabata bira mas fuerte. (Salmo 40:8) Mi a batisa na 1992 na un congreso internacional cu Testigonan di Jehova a tene na St. Petersburg, Rusia.

E BENEFICIONAN:

Mi a haya hopi bon amigo den e pueblo di Jehova. De bes en cuando, nos sa bin hunto pa toca musica decente y disfruta di e don aki di Dios. (Santiago 1:17) Mi kerida esposa Kristina ta un bendicion special pa mi. Cu ne mi por a comparti mi felicidad y tambe retonan di bida, y hasta mi sintimentonan di mas profundo.

Si mi no a bira Testigo di Jehova, kisas lo mi no tabata na bida awe. Den pasado mi tabata pasa di un problema pa otro y di un crisis pa otro. Awor, mi bida tin berdadero proposito y mi ta sinti cu awor tur cos ta na nan luga.