“Mi Soño Tabata pa Bira Pastoor”

MI PASADO:

Mi a nace den e stad chikito di Texcoco. Tempo mi tabata mucha, mayoria di e camindanan tabata di tera. Tabata normal pa mira hende di e pueblonan den cercania trece nan buriconan carga cu cos pa bende. Mi a lanta den un famia masha pober, y ami tabata e di shete yiu den nuebe ruman. Mi tata tabata drecha guarache (sandalia) pa cria e famia. Pero tempo mi tabatin shete aña, el a muri. For di e tempo ey padilanti, ta mi mama tabatin cu lucha pa pone pan riba mesa.

Mi welo tabata toca violin y tabata dirigi un orkesta specialisa den muziek clasico religioso. Casi henter mi famia tabata toca un instrumento. Mi mama tabata canta den koor di misa, y mi omo tabata cantante di opera y pianista. Nos tabata catolico devoto, y ami tabata un sirbidor di misa. Mi soño tabata pa bira un misionero. Pero na mesun tempo mi tabata gusta wak pelicula di karate. Mas mi tabata wak nan, mas violento mi tabata bira.

Mi a bay un scol religioso na e stad Puebla cu tabata fungi como un seminario. Mi meta tabata pa bira un pastoor catolico. Pero den mi ultimo aña di estudio, mi a keda desapunta cu Iglesia Catolico. Un soeur jong tabata tira riba mi. Mi a resisti e tentacion, pero el a lanta den mi e deseo di casa. Ademas, mi tabata mira con varios pastoor tabata hiba un bida dobel. Cu tempo, mi a laga mi meta di bira pastoor.

Mi a dicidi di studia muziek na e Conservatorio Nacional di Muziek na Cuidad di Mexico. Ora mi a gradua, mi a casa, y den poco tempo nos a haya cuater yiu. Mi tabata cria mi famia cu cantamento den misa.

For di cuminsamento nos tabatin problema den nos matrimonio. Ami cu mi casa tabata trata otro hopi malo, principalmente pasobra nos tabata jaloers riba otro. Na principio nos tabata papia malo cu otro, pero despues nos a cuminsa maltrata otro. Despues di 13 aña, nos a dicidi di separa for di otro, anto poco despues nos a divorcia.

BIJBEL A CAMBIA MI BIDA:

Mi prome contacto cu Testigonan di Jehova tabata prome cu mi a separa for di mi casa. Dos di nan a bin na nos cas y a ofrece pa papia tocante Bijbel cu mi. Segun mi, mi tabata sa hopi tocante religion, pues mi a acepta pa mi por proba cu nan tabata robes. Mi tabata haci pregunta dificil cu segun mi nan no por a contesta. Pero pa mi sorpresa, semper nan tabata contesta mi a base di Bijbel. Mi a cuminsa mira con tiki mi tabata sa realmente. Sinembargo, mi esposa tabata trata e Testigonan hopi malo, y ami tabata hopi druk. Pesey e bishitanan a caba na nada.

Cinco aña despues, mi a bolbe haya contacto cu Testigonan di Jehova. E tempo ey mi tabata biba cu un señora cu yama Elvira. E si no tabata contra e Testigonan. Pues tabata mas facil pa mi studia Bijbel riba un base regular. Asina mes, a tuma mi hopi aña pa mi libra mi mes di mi pasado.

Mi a realisa cu si mi kier a sirbi Jehova cu henter mi curason, mi tabatin cu haci algun cambio grandi den mi bida. Di prome, mi tabatin cu kita for di mi trabou di canta den misa. Esey a nifica cu lo mi tabatin cu haya un otro manera pa gana mi pan di cada dia. (Revelacion 18:4) Ademas, mi tabatin cu casa cu Elvira pa legalisa mi union cu ne.

Pero un di e cambionan di mas dificil cu mi tabatin cu haci tabata di siña controla mi temperamento violento. Dos versiculo di Bijbel tabata un gran yudansa pa mi: Salmo 11:5, cu ta mustra cu Jehova ta odia violencia, anto 1 Pedro 3:7, cu a siña mi cu si mi kier pa Jehova scucha mi oracionnan, mi mester trata mi casa cu dignidad. Segun cu mi tabata medita riba e versiculonan aki y pidi Jehova su yudansa den oracion, pocopoco pero sigur mi a logra domina mi temperamento.

E BENEFICIONAN:

Awor mi tin un bida di famia feliz. Mi ta haciendo mi esfuersonan pa drecha mi relacion cu mi yiu hombernan di mi prome matrimonio y yuda mi famia actual keda cu un fe firme.

Como mucha, mi soño tabata pa bira pastoor pa yuda hende. Awor mi ta sinti cu mi bida tin un berdadero proposito. Mi ta duna les di muziek pa cria mi famia. Mi ta hopi agradecido cu Jehova tabatin pasenshi cu mi, cu el a duna mi oportunidad di cambia y bira un mihor hende!