PREGUNTA CU BIJBEL TA CONTESTA
E angelnan por yuda nos?
Mescos cu nan a yuda Daniel, un fiel sirbidor di Dios, den pasado, awe tambe e angelnan ta yuda hende haya e bon noticia
Hopi prome cu Jehova Dios a crea hende el a crea miyones di angel. (Job 38:4, 7) E angelnan aki ta criaturanan celestial poderoso cu ta sirbi Dios. Tin biaha Dios ta manda nan pa guia y proteha su sirbidornan riba Tera. (Salmo 91:10, 11) Awe, e angelnan ta yuda hende haya e bon noticia cu e siguidornan di Hesus ta predica.—Lesa Revelacion 14:6, 7.
Ta bon pa nos haci oracion na e angelnan pa pidi nan yuda nos? No. Oracion ta un acto di adoracion cu Dios so merece. (Revelacion 19:10) Ya cu e angelnan ta sirbidornan di Dios, nan ta sigui solamente su instruccionnan y no e peticionnan di hende. Pesey, semper nos mester haci oracion unicamente na Dios mediante Hesus.—Lesa Salmo 103:20, 21; Mateo 26:53.
Ta existi angel malbado?
Mescos cu hende, Dios a crea e angelnan cu boluntad liber y nan por scoge pa haci bon of malo. Lamentablemente, hopi angel a rebela contra Dios. (2 Pedro 2:4) E prome tabata Satanas. Tambe tabatin otro angel cu a join e den su rebelion. Despues, Dios a saca Satanas y su demoñonan for di cielo y a tira nan riba Tera.—Lesa Revelacion 12:7-9.
E aumento drastico di maldad y violencia desde 1914 ta mustra cu pronto Dios lo caba cu Satanas y su demoñonan. Despues Dios lo comberti e Tera aki den un paradijs.—Lesa Revelacion 12:12; 21:3, 4.