CON NOS POR YUDA VENCE ODIO?

3 | Saca Odio For Di Bo Mente

Loke Bijbel Ta Bisa:

“Transforma boso mes door di renoba boso mente, pa boso por comproba pa boso mes kico ta e boluntad di Dios, cu ta bon, agradabel y perfecto.”—ROMANONAN 12:2.

Kico Esey Ta Nifica?

Nos manera di pensa ta importante pa Jehova. (Jeremias 17:10) No ta suficiente pa djis evita di bisa of haci algo pa motibo di odio. Odio ta cuminsa den nos mente y curason. Pesey, nos mester stop di pensa riba cualkier cos cu por lanta sintimento di odio. Esey ta e unico manera cu nos por “transforma” nos mes y vence odio.

Loke Bo Por Haci:

Analisa honestamente con bo ta pensa y sinti tocante otro hende, specialmente hende cu ta di un otro nacionalidad. Puntra bo mes: ‘Kico mi ta pensa di nan? Mi punto di bista ta basa riba loke ami mes sa di nan? Of e ta basa riba loke otro hende ta pensa di nan?’ Evita red social, pelicula of entretenimento cu ta promove odio of violencia.

E palabra di Dios ta yuda nos vence odio cu ta hancra den nos mente y curason

No ta semper facil pa evalua nos mes pensamento- y sintimentonan honestamente. Pero e palabra di Dios por yuda nos “saca pensamento y intencion di curason na cla.” (Hebreonan 4:12) Pues, sigui analisa loke Bijbel ta siña. Compara loke Bijbel ta bisa cu loke abo ta pensa, y purba di trece bo pensamentonan na harmonia cu loke Bijbel ta bisa. E palabra di Dios por yuda nos vence odio cu ta “fuertemente hancra” den nos mente y curason.—2 Corintionan 10:4, 5.

Experencia—STEPHEN

A Cambia Su Manera di Pensa

Pa motibo di odio, Stephen y miembronan di su famia a ser trata malo na man di hende color cla. Pesey, un grupo politico cu tabata masha conoci pa nan forma agresivo di defende derechonan civil tabatin un influencia grandi riba dje. Cu tempo Stephen tambe a cuminsa comete crimen motiva pa odio. El a bisa: ‘Ami cu mi amigonan tabata bay wak pelicula tocante e esclavonan Africano cu tabata sufri na Merca. E inhusticianan ey cu nos tabata mira a pone nos rabia asina tanto cu nos tabata ataca e hobennan color cla cu tabata den e sala di cine. Despues, nos tabata bay den e barionan di hende color cla pa busca mas hende pa bati.’

Stephen su punto di bista a cambia completamente ora el a cuminsa studia Bijbel cu testigonan di Jehova. El a bisa: “Como cu mi a lanta den un ambiente caminda tabatin asina hopi prehuicio racial, mi a keda asombra di loke mi a mira entre e Testigonan. Por ehempel, ora cu un Testigo color cla mester a bay biaha, el a laga su yiunan cerca un famia color scur. Tambe tabatin un hoben color scur cu tabatin mester di un luga di biba y un famia color cla a tum’e den nan cas.” Stephen tabata convenci cu e testigonan di Jehova ta stima otro di berdad, y esey ta loke Hesus a bisa cu lo identifica su sirbidornan.—Juan 13:35.

Kico a yuda Stephen pa stop di ta violento y di odia otro hende? E texto na Romanonan 12:2 a yud’e. El a bisa: “Mi estudio di Bijbel a pone mi realisa cu mi mester a cambia mi manera di pensa pa asina mi por a stop di actua na un manera violento y acepta tambe cu esaki ta e mihor manera di biba.” Awor Stephen tin mas cu 40 aña ta disfruta di un bida sin sintimento di odio.