No Laga Aparencia Gañá Bo

NOS tabata kedando den un amigu su cas acohedor den mondi, i tabata drumi den e piso abou den su apartamento trahá parcialmente bou di tera. Pues, di paden e bentananan tabata na haltura di wowo pa nos, pero di pafó nan tabata na haltura di suela. E promé mainta, rond di seis’or, un zonido di un batimentu dobel cu a parce di bin for di diferente parti dje apartamento a lantá mi for di soño. Intrigá, mi a lanta i a sali bai pa cushina pa wak si e frishider of e verwarming tabata haciendo e boroto. Ningun di dos. Mi a haña esei straño, i di ripiente mi a tende cu e zonido tabata bin for dje sala. Mi a cana drenta ketu-ketu, i pa mi sorpresa, mi a mira un para corá briyante pafó, un cardinal, atacando e glasnan di bentana! E tabata bula anshá di bentana pa bentana rond dje cas—e kamber, e baño, e sala di television—unda cu tabatin un bentana na haltura di suela. Mi a haña esei curioso.

Segun cu mi a bai ketu-ketu mas cerca dje bentana, mi a haña un clave p’e misterio—un cardinal hembra pafó, djis algun centimeter leu, contentu di dje ta pik simia. Pero pakico e machu tabata atacando e bentananan? Aparentemente, el a sigui kere, ekibocadamente, cu su mes refleho den e bentana tabata un cardinal rival i tabata purbando di spant’é! El a laga aparencia gañ’é.

Mas despues mi a confirmá cu esaki tabata e motibu pa e conducta straño dje para. Den su buki The Cardinal, June Osborne ta bisa cu e cardinal machu “ta haci loke ta necesario pa haci sigur cu su tereno ta liber di tur otro machu intruso dje especie. . . . No solamente [e] ta core cu e intrusonan aki, ta conocí cu e ta . . . dal contra su mes refleho den tapa di wiel, spiel di auto of venster i schuifdeur di glas.” Despues e ta agregá un comentario cu cua nos por a bai di acuerdo: “Esaki por perturbá bastante e bida pacífico di un doño di cas.” Nos a ripará esei, tur mainta trempan.

Kico por haci pa stop e comportacion compulsivo aki dje machu? Autora Osborne ta sugerí: “Tin biaha ta bira necesario pa cubri superficienan briyante pa restorá pas i trankilidad . . . , pa no bisa mes di yuda e para p’e no haci daño na su mes den e atakenan casi suicida aki.”—Contribuí.