“En Busca dje Artista Mayor”

Esei tabata título cu e ¡Despertad! di 8 di november, 1995, a carga. E tópico a lanta un reaccion positivo cerca lectornan na tur parti di mundu.

Amang a skirbi for di Douala, Camerun: “Mi a keda masha encantá cu e artículonan, pasobra mi ta stima arte, specialmente pinturanan bunita. Awor mi ta comprendé cu tin un Artista mas grandi cu Van Gogh, Rembrandt, Da Vinci i otronan—ningun otro cu Jehova Dios mes.”

For dje isla di St. Barths, na Antianan Frances, Frederick a bisa: “Mi a les’é cuater biaha, i cada biaha mi a yena cu gratitud pa e cosnan bunita cu nos Creador a duna nos.”

Assunta a skirbi for di Italia: “El a lanta den mi e deseo pa pinta. El a profundisá mi entusiasmo pa e mundu nobo di Dios.” I Irena, for dje República Checo, a bisa: “Ora nos bishitá museonan, nos tin cu paga pa mira e obranan di arte, miéntras cu e Creador di tur beyesa natural ta ofrecé nos esei grátis, tur dia.” Aline a skirbi for di Brazil: “Aunke frecuentemente nos ta haña artículonan pa yuda nos apreciá Jehova su personalidad, esunnan aki a toca mi curason. Nan a duna hopi detaye tocante e creacion cu ta yuda nos comprendé mas mihó Jehova su amor.”

For dje friu di winter na Wisconsin, Merca, Anne a skirbi: “Berdaderamente el a yudá mi apreciá e beyesa di creacion. Tin biaha den winter ta difícil pa haña esei. E mésun dia cu mi a lesa e artículo, mi a bai pafó i a ripará e partículanan di ijs riba un taki, un blachi di mata cubrí cu sneu, rastronan di animalnan den e sneu. Un bes mas, danki pa recordá nos con nos por apreciá ‘e Artista Mayor.’”

Si bo ta deseá di ricibí e revista aki regularmente, por fabor, tuma contacto cu Testigonan di Jehova den bo becindario of skirbi n’e adres mas cerca di bo mencioná na página 5.